SEKSIYON 2
Unsa ang Tinuod nga Pagtuo?
Sama sa kuwarta, ang pagtuo kinahanglang tinuod aron kini may bili
ANG pagbaton ug tinuod nga pagtuo dili lamang pagtuo nga adunay Diyos. Milyonmilyong tawo ang nagtuo sa Diyos apan tinuyong nagbuhat sa pagkadaotan. Kana nga “pagtuo” samag peke nga kuwarta. Kini morag tinuod tan-awon, pero wala diay bili. Nan, unsa ang tinuod nga pagtuo?
Ang tinuod nga pagtuo gibase sa tukmang kahibalo sa Balaang Kasulatan. Kining inspiradong mga sinulat nagtug-an kanato sa kamatuoran bahin sa Diyos ug makatabang kanato nga mailhan siya. Kini nagpahayag sa iyang mga balaod, katuyoan, ug mga pagtulon-an. Ang maong mga pagtulon-an naglakip sa:
Ang Diyos usa ra. Siya walay katumbas.
Si Jesus dili ang Labing Gamhanang Diyos. Siya propeta sa Diyos.
Ang Diyos nagdumot sa tanang matang sa pagsimbag idolo.
Ang mga tawo moatubang sa umaabot nga adlaw sa paghukom.
Ang daghan kaayong patayng tawo pagabanhawon sa Paraiso.
Ang tinuod nga pagtuo magtukmod kanato sa paghimog maayong mga buhat. Ang maong mga buhat magpasidungog sa Diyos ug makahatag usab ug benepisyo kanato ug sa uban. Kana naglakip sa
pagsimba sa Diyos.
pag-ugmad sa diyosnong mga hiyas—ilabina ang gugma.
pagsalikway sa daotang panghunahuna ug mga tinguha.
pagpadayon sa pagtuo sa Diyos bisan pa sa mga problema ug kalisdanan.
pagtudlo sa uban bahin sa Diyos.
Ang tinuod nga pagtuo moresulta sa maayong mga buhat
Sa Unsang Paagi Maugmad Nimo ang Tinuod nga Pagtuo?
Ang pagtuo, sama sa kaunoran o muscle, modako kon gamiton
Pangayog tabang sa Diyos. Si propeta Moises miampo: “Pahibaloa ako, palihog, sa imong mga dalan, aron ako makaila kanimo, aron ako makakaplag ug pabor sa imong mga mata.”a Gidungog sa Diyos ang iyang pag-ampo. Si Moises nahimong talagsaong panig-ingnan sa pagtuo. Ang Diyos motabang usab kanimo sa pag-ugmad sa tinuod nga pagtuo.
Tun-i ang Balaang Kasulatan. Ang inspiradong Kasulatan, nga naglakip sa Torah, mga Salmo, ug mga Ebanghelyo, makaplagan diha sa Balaang Bibliya, ang basahong nahubad sa daghan kaayong pinulongan ug napanagtag sa tibuok kalibotan. May kopya ka ba niini?
Ipadapat ang tambag sa Balaang mga Sinulat sa imong pagkinabuhi. Ang pagtuo, sama sa kaunoran o muscle, modako kon gamiton. Sa dihang ipasundayag nimo ang imong pagtuo, kini usab modako. Imong makita nga mapuslanon ang tambag sa Diyos. Sa pagkatinuod, ang praktikal nga tambag sa Balaang Kasulatan nakapabag-o sa kinabuhi sa daghan. Basaha ang pipila ka pananglitan sa sunod nga seksiyon.