Pagtungha sa Mesiyas

KAPIG 500 ka tuig human sa pagtagna ni Daniel, ang anghel sa Diyos nga si Gabriel mipakita sa birhen nga si Maria, nga kaliwat ni Haring David. “Maayong adlaw, usa nga pinaboran kaayo, si Jehova nagauban kanimo,” si Gabriel miingon kaniya. (Lucas 1:28) Apan si Maria nahadlok. Unsay ipasabot sa pagtimbaya ni Gabriel?

“Ayaw kahadlok, Maria, kay ikaw nakakaplag ug pabor sa Diyos; ug, tan-awa! ikaw manamkon sulod sa imong tagoangkan ug manganak ug usa ka anak nga lalaki, ug pagatawgon mo ang iyang ngalan nga Jesus,” misaysay si Gabriel. “Ihatag kaniya ni Jehova nga Diyos ang trono ni David nga iyang amahan, ug . . . walay pagkatapos ang iyang gingharian.” (Lucas 1:30-33) Pagkatalagsaong balita! Ipanganak ni Maria ang Mesiyas, ang dugay-nang-gipaabot nga “binhi”!

Pagkasunod tuig, si Jesus natawo sa Betlehem. Niadtong gabhiona, usa ka anghel ang nagpahibalo sa mga magbalantay sa karnero: “Tan-awa! ako nagapahayag kaninyo ug maayong balita sa dakong kalipay . . . tungod kay natawo kaninyo karong adlawa ang usa ka Manluluwas, nga mao ang Kristo nga Ginoo, sa siyudad ni David.” (Lucas 2:10, 11) Sa ulahi, ang pamilya ni Jesus mibalhin sa Nasaret, diin siya nagdako.

Pagka 29 C.E.—ang tuig nga angayng motungha ang Mesiyas—si Jesus nagsugod pag-alagad ingong propeta sa Diyos, sa dihang siya “mga katloan ka tuig.” (Lucas 3:23) Daghang tawo ang nakaamgo nga siya gipadala sa Diyos. Sila miingon: “Usa ka dakong manalagna [o propeta] gipatindog sa atong taliwala.” (Lucas 7:16, 17) Apan unsay gitudlo ni Jesus?

Si Jesus nagtudlo sa mga tawo sa paghigugma ug sa pagsimba sa Diyos: Siya mipahayag: “Si Jehova nga atong Diyos maoy usa ka Jehova, ug higugmaon mo si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong kaisipan ug sa tibuok mong kusog.” (Marcos 12:29, 30) Siya miingon usab: “Si Jehova nga imong Diyos ang imong pagasimbahon, ug siya lamang ang imong pagahatagan ug sagradong pag-alagad.”—Lucas 4:8.

Si Jesus nag-awhag sa mga tawo sa paghigugma sa usag usa: “Higugmaon mo ang imong silingan sama sa imong kaugalingon,” siya miingon. (Marcos 12:31) Siya miingon usab: “Ang tanang butang nga buot ninyo nga pagabuhaton sa mga tawo nganha kaninyo, kinahanglang pagabuhaton usab ninyo sa ingon ngadto kanila; sa pagkatinuod, mao kini ang kahulogan sa Balaod ug sa mga Manalagna.”—Mateo 7:12.

Si Jesus masibotong nagsulti sa uban bahin sa Gingharian sa Diyos: “Kinahanglan nga . . . ipahayag ko ang maayong balita sa gingharian sa Diyos, tungod kay alang niini gipadala ako,” siya miingon. (Lucas 4:43) Nganong importante kaayo ang Gingharian sa Diyos?

Ang Kasulatan nagtudlo nga ang Gingharian sa Diyos maoy usa ka langitnong kagamhanan nga magmando ibabaw sa yuta. Si Jesus, ang Mesiyas, mao ang Hari nga gitudlo sa Diyos. Gitagna ni propeta Daniel nga didto sa langit ang Diyos maghatag sa Mesiyas sa “pagmando ug dignidad ug gingharian.” (Daniel 7:14) Ipasig-uli sa maong Gingharian ang Paraiso sa tibuok yuta ug gantihan niini ang mga alagad sa Diyos ug kinabuhing walay kataposan. Dili ba kana maayong balita?