Gikan ba Gayod sa Diyos ang Maayong Balita?

1. Kinsa ang Awtor sa Bibliya?

Ang maayong balita nga ang mga tawo mabuhi sa walay kataposan sa yuta nasulat sa Bibliya. (Salmo 37:29) Ang Bibliya naglangkob ug 66 ka gagmayng basahon. Mga 40 ka matinumanong lalaki ang gigamit sa Diyos sa pagsulat niana. Ang unang lima ka basahon gisulat ni Moises mga 3,500 ka tuig kanhi. Ang kataposang basahon gisulat ni apostol Juan kapig 1,900 ka tuig kanhi. Kansang hunahuna ang gisulat sa mga magsusulat sa Bibliya? Gigamit sa Diyos ang balaang espiritu sa pagpakigkomunikar sa mga magsusulat sa Bibliya. (2 Samuel 23:2) Ilang gisulat ang hunahuna sa Diyos, dili ang ilang kaugalingong hunahuna. Busa si Jehova mao ang Awtor sa Bibliya.​—Basaha ang 2 Timoteo 3:16; 2 Pedro 1:20, 21.

Tan-awa ang video nga Kinsa ang Awtor sa Bibliya?

2. Nganong makaseguro kita nga ang Bibliya pulong gayod sa Diyos?

Kita nahibalo nga ang Bibliya gikan sa Diyos kay kini tukma ug detalyadong nagtagna sa umaabot. Walay tawong makahimo niana. (Josue 23:14) Ang Labing Gamhanang Diyos lamang ang tukmang makahibalo kon unsay umaabot sa tawo.​—Basaha ang Isaias 42:9; 46:10.

Makadahom kita nga ang basahong gikan sa Diyos maoy linain, ug tinuod kana. Bilyonbilyong kopya sa Bibliya ang napanagtag sa gatosan ka pinulongan. Bisag karaan, ang Bibliya nahiuyon sa siyensiya. Ang 40 ka magsusulat niini wala usab magkasumpakiay.a Dugang pa, ang giingon sa Bibliya bahin sa gugma maggikan lang sa matuod nga Diyos—ang Diyos sa gugma, ug kini may gahom gihapon sa pagbag-o sa kinabuhi sa tawo. Tungod niini, milyonmilyon ang kombinsido nga ang Bibliya Pulong sa Diyos.​—Basaha ang 1 Tesalonica 2:13.

Tan-awa ang video nga Nganong Makaseguro Kita nga ang Bibliya Pulong Gayod sa Diyos?

3. Bahin sa unsa ang Bibliya?

Usa sa pangunang mga tema sa Bibliya mao ang maayong balita nga ang Diyos dunay mahigugmaong katuyoan alang sa katawhan. Gipatin-aw sa Kasulatan kon nganong ang tawo nawad-ag pribilehiyo nga mabuhi sa paraisong yuta sa sinugdan sa kasaysayan ug kon sa unsang paagi mapasig-uli ang paraiso.​—Basaha ang Pinadayag 21:4, 5.

Ang Pulong sa Diyos naundan usab ug mga balaod, prinsipyo, ug tambag. Dugang pa, narekord sa Bibliya ang kasaysayan sa pagpakiglabot sa Diyos sa katawhan, nga nagpadayag sa iyang personalidad. Busa, ang Bibliya makatabang nga makaila ka sa Diyos. Kini nagpadayag kon sa unsang paagi mahimo ka niyang higala.​—Basaha ang Salmo 19:7, 11; Santiago 2:23; 4:8.

4. Sa unsang paagi masabtan nimo ang Bibliya?

Kini nga brosyur makatabang kanimo nga masabtan ang Bibliya kay kini nagsundog sa paagi ni Jesus. Siya nagkutlog lainlaing teksto sa Bibliya ug nagsaysay sa “kahulogan sa Balaang Kasulatan.”​—Basaha ang Lucas 24:27, 45.

Makaiikag gayod ang maayong balita gikan sa Diyos. Apan dili interesado niini ang pipila ka tawo, ug masuko pa gani ang uban. Ayawg kaluya. Aron may paglaom ka nga mabuhi sa walay kataposan, kinahanglan nimong mailhan ang Diyos.​—Basaha ang Juan 17:3.