Pag-ila sa Papel sa Kristo Diha sa Kahikayan sa Diyos

“SA SINUGDAN gibuhat sa Diyos ang langit ug ang yuta,” ug ang tanan niyang gibuhat “maayo kaayo.” (Gen. 1:1, 31) Gilalang ni Jehova ang mga tawo uban ang nindot nga kaugmaon. Pero temporaryong nabalda ang malipayong kahimtang sa mga tawo tungod sa rebelyon didto sa Eden. Bisan pa niana, wala mausab ang katuyoan ni Jehova para sa yuta ug sa katawhan. Gitagna sa Diyos nga ang masinugtanong mga kaliwat ni Adan hatagag kaluwasan. Ang matuod nga pagsimba ipasig-uli, ug laglagon sa Diyos ang usa nga daotan ug ang tanan niyang daotang buhat. (Gen. 3:15) Busa mabalik na ang “maayo kaayo” nga kahimtang. Buhaton kini ni Jehova pinaagi sa iyang Anak, si Jesu-Kristo. (1 Juan 3:8) Busa angay natong ilhon ang papel sa Kristo diha sa kahikayan sa Diyos.​—Buh. 4:12; Filip. 2:9, 11.

KON UNSAY PAPEL SA KRISTO

² Dihang atong hunahunaon ang papel sa Kristo diha sa kahikayan sa Diyos, makita nato nga duna siyay daghang posisyon. Si Jesus nag-alagad ingong Manunubos sa katawhan, Hataas nga Saserdote, Ulo sa Kristohanong kongregasyon, ug karon, ingong Hari sa Gingharian sa Diyos. Ang pagpamalandong niini makapalalom sa atong apresasyon sa kahikayan sa Diyos ug sa atong gugma sa Kristo. Gipakita sa Bibliya ang pipila ka bahin sa papel ni Jesus.

³ Panahon sa ministeryo ni Jesus sa yuta, tin-aw niyang gipaila nga ang masinugtanong katawhan ipasig-uli ngadto sa Diyos pinaagi kaniya. (Juan 14:6) Ingong Manunubos sa katawhan, gihatag ni Jesus ang iyang kinabuhi ingong lukat baylo sa daghan. (Mat. 20:28) Busa gawas nga sulondan siya sa diyosnong panggawi, naa sab siyay importante kaayong papel sa pagtuman sa katuyoan ni Jehova alang sa katawhan. Pinaagi lang kaniya nga mabatonan nato pag-usab ang pag-uyon sa Diyos. (Buh. 5:31; 2 Cor. 5:18, 19) Tungod sa kamatayon ni Jesus ug sa iyang pagkabanhaw, ang masinugtanong katawhan makatagamtam ug walay kataposang panalangin nga itagana ubos sa pagmando sa langitnong Gingharian sa Diyos.

⁴ Ingong Hataas nga Saserdote, si Jesus “makasabot sa atong mga kahuyangan” ug makahimo sa pagtabon sa mga sala sa iyang dedikadong mga sumusunod sa yuta. Si apostol Pablo mipatin-aw: “Ang atong hataas nga saserdote makasabot sa atong mga kahuyangan, kay siya nasulayan sa tanang paagi sama kanato, apan walay sala.” Unya gidasig ni Pablo kadtong nagpakitag pagtuo kang Jesu-Kristo nga bug-os pahimuslan kini nga kahikayan sa pagpasig-uli sa katawhan ngadto sa Diyos, pinaagi sa pag-ingon: “Busa moduol ta sa trono sa dili hitupngang pagkamaayo nga may kagawasan sa pagsulti, aron kita makadawat ug kaluoy ug dili hitupngang pagkamaayo sa Diyos dihang manginahanglan tag tabang.”​—Heb. 4:14-16; 1 Juan 2:2.

⁵ Si Jesus sab ang Ulo sa Kristohanong kongregasyon. Sama sa iyang mga sumusunod sa unang siglo, kita karon wala magkinahanglag tawhanong pangulo. Si Jesus naghatag ug direksiyon pinaagi sa balaang espiritu ug sa kuwalipikadong mga magbalantay, kinsa manubag kaniya ug sa iyang langitnong Amahan sa ilang pag-atiman sa panon sa Diyos. (Heb. 13:17; 1 Ped. 5:2, 3) Diha sa tagna bahin kang Jesus, si Jehova miingon: “Tan-awa! Gihimo nako siyang saksi ngadto sa kanasoran, usa ka pangulo ug komandante ngadto sa kanasoran.” (Isa. 55:4) Gipamatud-an ni Jesus nga natuman kining tagnaa dihang iyang giingnan ang iyang mga tinun-an: “Ayaw mo pagpatawag nga pangulo, kay usa ra ang inyong Pangulo, ang Kristo.”​—Mat. 23:10.

⁶ Ingong pagpakita sa iyang pagkaandam motabang kanato, si Jesus midapit: “Ari kamo kanako, kamong tanang gikapoy ug nabug-atan, ug ako magpalagsik kaninyo. Isangon ang akong yugo ug pagkat-on gikan kanako kay ako malumo ug mapainubsanon, ug kamo mobatig kahayahay. Kay ang akong yugo sayon dad-on, ug ang akong luwan gaan.” (Mat. 11:28-30) Ang malumo ug makapadasig nga paagi ni Jesu-Kristo sa pagdumala sa Kristohanong kongregasyon nagpamatuod nga siya “ang maayong magbalantay” nga nagsundog sa iyang langitnong Amahan, si Jehova nga Diyos.​—Juan 10:11; Isa. 40:11.

⁷ Sa iyang unang sulat sa mga taga-Corinto, gipatin-aw ni Pablo ang laing papel ni Jesu-Kristo dihang siya miingon: “Kinahanglan siyang magmando ingong hari hangtod mabutang na sa Diyos ang tanang kaaway ilalom sa iyang mga tiil. Apan dihang ang tanang butang mapasakop na ngadto kaniya, niana ang Anak magpasakop usab sa Usa nga nagpasakop sa tanang butang ngadto kaniya, aron ang Diyos mahimong tanang butang ngadto sa tanan.” (1 Cor. 15:25, 28) Sa wala pa moanhi si Jesus sa yuta, siya ang “batid nga magbubuhat” sa Diyos, kay siya ang una sa mga gilalang sa Diyos. (Prov. 8:22-31) Dihang gipadala sa Diyos si Jesus dinhi sa yuta, kanunay niyang gibuhat ang kabubut-on sa Diyos. Iyang giantos ang pinakalisod nga pagsulay ug namatay nga matinumanon sa iyang Amahan. (Juan 4:34; 15:10) Kay siya nagmaunongon hangtod sa kamatayon, ang Diyos nagbanhaw kaniya ngadto sa langit ug naghatag kaniyag katungod nga mahimong Hari sa langitnong Gingharian. (Buh. 2:32-36) Ingong Hari, si Kristo Jesus gihatagan sa Diyos ug makapahinganghang pribilehiyo sa pagpanguna sa minilyon ka gamhanang espiritung linalang sa pagwagtang sa tawhanong pagmando ug sa tanang pagkadaotan sa yuta. (Prov. 2:21, 22; 2 Tes. 1:6-9; Pin. 19:11-21; 20:1-3) Unya ang tibuok yuta mandoan sa usa lang ka gobyerno, ang langitnong Gingharian sa Diyos pinaagi sa Kristo.​—Pin. 11:15.

KON UNSAY IPASABOT SA PAG-ILA SA IYANG PAPEL

⁸ Si Jesu-Kristo, nga atong sulondan, hingpit. Siya gipiyalan sa pag-atiman kanato. Aron makabenepisyo sa iyang mahigugmaong pag-atiman, kinahanglang magmaunongon ta kang Jehova ug moduyog sa pag-uswag sa iyang organisasyon.

⁹ Ang mga sumusunod ni Jesus sa unang siglo bug-os miila sa papel sa Kristo diha sa kahikayan sa Diyos. Gipakita nila kini pinaagi sa pag-alagad nga may panaghiusa ubos sa pagpanguna sa Kristo, nga nagpasakop sa iyang paggiya pinaagi sa balaang espiritu. (Buh. 15:12-21) Gihisgotan ni apostol Pablo ang panaghiusa sa dinihogang Kristohanong kongregasyon dihang siya misulat: “Mosulti kita sa kamatuoran ug magpakitag gugma aron bug-os kitang mohamtong agig pagsundog sa Kristo, ang ulo. Gikan kaniya, ang tibuok lawas takdo nga nagdugtongay ug nagtinabangay pinaagi sa matag lutahan aron kini molihok sumala sa gikinahanglan. Kon ang matag parte sa lawas molihok sa hustong paagi, makatabang kini sa pagtubo sa lawas, mao nga kini molig-on diha sa gugma.”​—Efe. 4:15, 16.

¹⁰ Dihang ang matag usa sa kongregasyon mokooperar ug ang tanan magkahiusa sa pagbuhat sa mga buluhaton ubos sa pagpanguna sa Kristo, makita diha sa kongregasyon ang pag-uswag ug tinuod nga gugma, nga maoy “hingpit nga bugkos sa panaghiusa.”​—Juan 10:16; Col. 3:14; 1 Cor. 12:14-26.

¹¹ Ang mga panghitabo sa kalibotan nga maoy katumanan sa mga tagna sa Bibliya tin-awng nagpamatuod nga sukad sa 1914, si Jesu-Kristo gihatagag awtoridad sa pagmando sa Gingharian. Siya nagmando na karon taliwala sa iyang mga kaaway. (Sal. 2:1-12; 110:1, 2) Unsay kahulogan niini para sa mga nagpuyo karon sa yuta? Sa dili madugay, ipakita ni Jesus ang iyang papel ingong Hari sa mga hari ug Ginoo sa mga ginoo dihang iyang ipahamtang ang paghukom sa Diyos batok sa iyang mga kaaway. (Pin. 11:15; 12:10; 19:16) Dayon, ang saad ni Jehova bahin sa kaluwasan nga iyang gipahayag dihang mirebelde ang tawo matuman na alang niadtong giuyonan sa Kristo. (Mat. 25:34) Malipayon gyod ta kay giila nato ang papel sa Kristo diha sa kahikayan sa Diyos! Hinaot kanunay tang magkahiusa sa pagtuman sa atong tibuok kalibotang ministeryo ubos sa pagpanguna sa Kristo niining kataposang mga adlaw.