Mga Tigdumala nga Magbantay sa Panon

PANAHON sa ministeryo ni Jesus sa yuta, iyang gipakita nga siya “ang maayong magbalantay.” (Juan 10:11) Pagkakita niya sa panon sa katawhan nga misunod kaniya, “siya naluoy kanila kay sila pinanitan ug nagkatibulaag samag mga karnero nga walay magbalantay.” (Mat. 9:36) Namatikdan ni Pedro ug sa ubang apostoles ang iyang gugma ug kabalaka kanila. Lahi gayod si Jesus sa bakak nga mga magbalantay sa Israel kay ilang gipasagdan ang panon, maong ang mga karnero nagkatibulaag ug gigutom sa espirituwal! (Ezeq. 34:7, 8) Ang maayong panig-ingnan ni Jesus sa pagpanudlo ug pag-atiman sa mga karnero, nga naghalad pa gani sa iyang kinabuhi alang nila, nagtudlo sa mga apostoles kon unsaon pagtabang niadtong naay pagtuo nga gustong mobalik kang Jehova, ang “magbalantay ug tigdumala sa [ilang] kinabuhi.”​—1 Ped. 2:25, footnote.

² Dihang nakigsulti si Jesus kang Pedro, iyang gipasiugda ang kahinungdanon sa pagpakaon ug pagbantay sa mga karnero. (Juan 21:15-17) Dayag nga natandog gayod si Pedro niadto, ug sa ulahi iyang gitambagan ang mga ansiyano sa Kristohanong kongregasyon sa unang siglo: “Bantayi ang panon sa Diyos nga gipaatiman kaninyo, nga mag-alagad ingong mga tigdumala, nga dili pinugos, kondili kinabubut-on atubangan sa Diyos; dili tungod sa tinguha nga mamentaha, kondili kinasingkasing; dili magharihari sa mga gipanag-iya sa Diyos, kondili mga ehemplo sa panon.” (1 Ped. 5:1-3) Ang mga pulong ni Pedro maaplikar sab sa mga tigdumala sa kongregasyon karon. Aron masundog sa mga ansiyano si Jesus, sila kinabubut-on ug kinasingkasing nga mag-alagad ingong ehemplo sa panon, nga manguna sa pag-alagad kang Jehova.​—Heb. 13:7.

³ Mapasalamaton kita sa mga tigdumala sa kongregasyon nga gitudlo sa espiritu. Daghang kaayohan ang atong madawat tungod sa ilang pag-atiman. Pananglitan, dasigon ug hatagag pagtagad sa mga tigdumala ang matag usa diha sa kongregasyon. Kada semana, makugihon nilang dumalahon ang mga tigom sa kongregasyon diin ang tanan mapalig-on sa espirituwal. (Roma 12:8) Kita mobatig kasegurohan kay sila maningkamot nga panalipdan ang panon gikan sa bisan unsa nga makadaot nato, sama sa mga tawong daotan. (Isa. 32:2; Tito 1:9-11) Ang ilang pagpanguna sa ministeryo magdasig nato nga magmaaktibo sa pagsangyaw sa maayong balita kada bulan. (Heb. 13:15-17) Kini nga “gasa nga mga lalaki” gitagana ni Jehova aron mapalig-on ang kongregasyon.​—Efe. 4:8, 11, 12.

MGA KUWALIPIKASYON SA PAGKAHIMONG TIGDUMALA

⁴ Aron maatiman pag-ayo ang kongregasyon, ang mga brader nga itudlo ingong mga tigdumala kinahanglang makakab-ot sa mga kuwalipikasyon nga naa sa Pulong sa Diyos. Sila ikaingon nga gitudlo sa balaang espiritu kon makab-ot nila ang mga kuwalipikasyon. (Buh. 20:28) Taas gayod ang mga sukdanan sa Bibliya para sa mga tigdumala kay bug-at ang ilang responsibilidad. Pero ang mga sukdanan dili sobra ka taas nga dili na kini makab-ot sa mga brader nga may tinuod nga gugma kang Jehova ug andam nga magpagamit kaniya. Kinahanglang dayag sa tanan nga ang mga tigdumala nagpadapat sa mga tambag sa Bibliya diha sa ilang adlaw-adlawng pagkinabuhi.

⁵ Gihisgotan ni apostol Pablo ang pangunang Kasulatanhong mga kuwalipikasyon alang sa mga tigdumala diha sa iyang unang sulat kang Timoteo ug sa iyang sulat kang Tito. Sa 1 Timoteo 3:1-7, atong mabasa: “Kon dunay mangab-ot sa pagkahimong tigdumala, siya nagtinguhag maayong buhat. Busa ang tigdumala kinahanglang dili salawayon, usa ray asawa, may pagpugong sa kaugalingon, maayog panghunahuna, talahoron, maabiabihon, kuwalipikadong manudlo, dili palahubog, dili bayolente, kondili makataronganon, dili palaaway, dili mahigugmaon sa kuwarta, lalaki nga nagdumala sa iyang panimalay sa maayong paagi, nga ang mga anak mapinasakopon ug maayog panggawi (kay kon ang lalaki dili makamaong modumala sa iyang panimalay, unsaon man niya pag-atiman sa kongregasyon sa Diyos?), dili lalaki nga bag-ong magtutuo, kay basig mahimo siyang mapasigarbohon ug makadawat sab sa paghukom nga nadawat sa Yawa. Kinahanglang maayo sab siyag reputasyon sa mga tawo sa gawas, aron dili siya mapakaulawan ug dili mabitik sa Yawa.”

⁶ Si Pablo misulat kang Tito: “Gibilin ka nako sa Creta aron sa pagtul-id sa mga butang nga kinahanglang tul-iron ug sa pagtudlog mga ansiyano sa matag siyudad, sumala niining akong instruksiyon kanimo: ang ansiyano kinahanglang wala akusahig bisan unsa, usa ray asawa, may mga anak nga magtutuo nga wala akusahig dili maayong pagkinabuhi o pagkarebelyoso. Kay ingong piniyalan sa Diyos, ang tigdumala kinahanglang wala akusahig bisan unsa, dili mabuotbuoton, dili daling masuko, dili palahubog, dili bayolente, dili magtinguha nga mamentaha, kondili maabiabihon, mahigugmaon sa pagkamaayo, maayog panghunahuna, matarong, maunongon, may pagpugong sa kaugalingon, nga nangupot pag-ayo sa kasaligang mensahe kon bahin sa iyang paagi sa pagpanudlo, aron makapalig-on siya pinaagi sa maayong pagtulon-an ug makabadlong niadtong mosulti batok niini.”​—Tito 1:5-9.

⁷ Bisag ang Kasulatanhong mga kuwalipikasyon para sa mga tigdumala daw lisod kab-oton, ang mga brader kinahanglang dili magpanuko sa pagkab-ot niini. Dihang ipasundayag nila ang maayong mga hiyas nga angayng batonan sa mga tigdumala, madasig nila ang uban sa kongregasyon sa pagsundog niana. Si Pablo misulat nga ang “gasa nga mga lalaki” gitagana “aron sa pagbansay sa mga balaan, para sa buluhaton sa pag-alagad, aron sa pagpalig-on sa lawas sa Kristo, hangtod nga kitang tanan magkahiusa sa pagtuo ug sa tukmang kahibalo bahin sa Anak sa Diyos, ug mahimong hamtong nga tawo, sama sa pagkahamtong sa Kristo.”​—Efe. 4:8, 12, 13.

⁸ Ang mga tigdumala dili batan-on kaayo o bag-ong magtutuo nga mga lalaki. Hinuon, sila eksperyensiyado na sa Kristohanong pagkinabuhi, may lalom nga kahibalo ug pagsabot sa Kasulatan, ug may tinuod nga gugma sa kongregasyon. Sila dili mahadlok nga mosulti ug mobadlong sa mga nakasala, sa ingon mapanalipdan ang mga karnero batok niadtong gustong mag-abusar kanila. (Isa. 32:2) Ang mga tigdumala nailhan sa tanang sakop sa kongregasyon ingong hamtong sa espirituwal, nga may tinuod nga pagmahal sa panon sa Diyos.

⁹ Kadtong kuwalipikadong itudlo ingong mga tigdumala nagpakitag praktikal nga kaalam sa ilang pagkinabuhi. Kon minyo, ang usa ka tigdumala nagsunod sa Kristohanong sukdanan sa kaminyoon, nga mao, usa ray asawa ug nagdumala sa iyang panimalay sa maayong paagi. Kon siya dunay mga anak nga magtutuo nga mapinasakopon ug maayog panggawi ug wala akusahig dili maayong pagkinabuhi o pagkarebelyoso, ang kongregasyon makasalig sa iyang mga tambag bahin sa pamilyahanon ug Kristohanon nga pagkinabuhi. Ang tigdumala sab dili salawayon, wala akusahig bisan unsa, ug maayog reputasyon bisan sa mga tawo sa gawas. Kinahanglang walay balido nga sumbong bahin sa dili hustong panggawi batok kaniya nga makadaot sa reputasyon sa kongregasyon. Kinahanglang dili siya bag-ong nabadlong tungod sa seryosong sala. Ang uban sa kongregasyon madasig sa pagsundog sa iyang maayong panig-ingnan ug makasalig nga maatiman niya ang ilang espirituwalidad.​—1 Cor. 11:1; 16:15, 16.

¹⁰ Ang maong kuwalipikadong mga lalaki makaalagad diha sa Kristohanong kongregasyon nga susama sa papel sa mga ansiyano sa Israel kinsa gihubit ingong “maalamon, maayog pagsabot, ug eksperyensiyadong mga lalaki.” (Deut. 1:13) Ang mga ansiyano dili hingpit, pero sila nailhan sa kongregasyon ug sa komunidad ingong matarong ug may kahadlok sa Diyos, ug dugay nang nagkinabuhi sumala sa mga prinsipyo sa Bibliya. Kay dili salawayon, sila may kagawasang mosulti diha sa kongregasyon.​—Roma 3:23.

¹¹ Ang mga brader nga kuwalipikadong itudlo ingong tigdumala may pagpugong sa kaugalingon ug maayog pakiglabot sa uban. Dili sila panatiko. Hinuon, balanse ang ilang pagkinabuhi. Sila may pagpugong sa ilang pagkaon, pag-inom, paglingawlingaw, ug mga hilig. Dili sila magpalabig inom ug alkoholikong ilimnon aron dili sila akusahan nga nahubog o palahubog. Ang usa nga impluwensiyado sa alkoholikong ilimnon daling mawad-ag pagpugong sa kaugalingon ug dili takos nga moatiman sa espirituwal nga mga kalihokan sa kongregasyon.

¹² Ang magdumala sa kongregasyon kinahanglang talahoron, o organisado. Kini makita sa iyang panagway, panimalay, ug adlaw-adlawng kalihokan. Dili siya maglangaylangay kay nahibalo siya kon unsay gikinahanglan, ug magplano siya kon unsaon kana paghimo. Siya nagasunod sa mga prinsipyo sa Bibliya.

¹³ Ang tigdumala kinahanglang makataronganon. Kinahanglang makigkooperar siya sa tanang ansiyano sa kongregasyon. Siya may hustong panglantaw sa kaugalingon ug dili moinsistir sa iyang gusto. Dili niya isipong mas maayo ang iyang opinyon kay sa opinyon sa ubang ansiyano. Ang ubang ansiyano basin dunay maayong mga hiyas o abilidad nga wala niya. Ang usa ka ansiyano makataronganon dihang ibase gyod niya sa Kasulatan ang iyang panghunahuna ug dihang maningkamot siya sa pagsundog kang Jesu-Kristo. (Filip. 2:2-8) Ang ansiyano dili palaaway o bayolente, hinuon magpakita siyag hustong pagtahod sa uban kay giisip niya nga sila labaw kay kaniya. Siya dili mabuotbuoton, nga kanunayng moinsistir nga sundon ang iyang paagi o panghunahuna. Siya makigdaiton ug dili daling masuko.

¹⁴ Dugang pa, ang usa nga kuwalipikadong mag-alagad ingong tigdumala sa kongregasyon angayng maayog panghunahuna. Kini nagkahulogan nga siya kalmado, nga dili magdalidali sa paghukom. Siya nakasabot pag-ayo sa mga prinsipyo ni Jehova ug kon unsaon kini pagpadapat. Siya modawat ug tambag ug mosunod sa instruksiyon. Siya dili salingkapaw.

¹⁵ Gipahinumdoman ni Pablo si Tito nga ang usa ka tigdumala mahigugmaon sa pagkamaayo. Kinahanglang matarong siya ug maunongon. Kining mga hiyasa makita sa iyang pagpakiglabot sa uban ug sa iyang lig-ong baroganan sa kon unsay matarong ug maayo. Lig-on ang iyang debosyon kang Jehova ug kanunay siyang nagsunod sa matarong nga mga prinsipyo. Siya masaligan sa kompidensiyal nga mga butang. Kinasingkasing sab ang iyang pagkamaabiabihon, nga andam mosakripisyo sa kaugalingon ug sa iyang kabtangan para sa kaayohan sa uban.​—Buh. 20:33-35.

¹⁶ Aron epektibong makaalagad ingong tigdumala, siya kinahanglang kuwalipikadong manudlo. Sumala sa giingon ni Pablo kang Tito, ang tigdumala angayng “nangupot pag-ayo sa kasaligang mensahe kon bahin sa iyang paagi sa pagpanudlo, aron makapalig-on siya pinaagi sa maayong pagtulon-an ug makabadlong niadtong mosulti batok niini.” (Tito 1:9) Siya makahatag ug maayong pangatarongan, makahatag ug pamatuod, makatubag sa mga pagsupak, ug makapatin-aw sa Kasulatan sa paagi nga makapakombinsir ug makapalig-on sa pagtuo sa uban. Siya makahimo niana sa maayo man o lisod nga panahon. (2 Tim. 4:2) Naa siyay pailob nga gikinahanglan aron malumo niyang mabadlong kadtong nakahimog sala o aron makombinsir ang maduhaduhaon ug madasig niya siya sa pagbuhat ug maayo pinasukad sa pagtuo. Ang pagkahimong kuwalipikadong motudlo sa uban, sa personal man o sa publiko, nagpakita nga nakab-ot sa usa ka tigdumala kining importanteng kuwalipikasyon.

¹⁷ Importante nga ang mga ansiyano madasigon sa ministeryo. Kinahanglang makita diha kanila nga naningkamot sab sila sa pagsundog kang Jesus niining paagiha, nga gihimong prayoridad ang pagsangyaw sa maayong balita. Si Jesus nagpakitag interes sa iyang mga tinun-an, nga nagtabang kanila nga mahimong epektibong magsasangyaw. (Mar. 1:38; Luc. 8:1) Dihang ang mga ansiyano mogahin ug panahon sa ministeryo bisan sa ilang puliki nga eskedyul, kini makapalihok sa tibuok kongregasyon nga magpakitag samang kadasig. Ug dihang ang mga ansiyano mosangyaw uban sa ilang pamilya ug sa mga igsoon sa kongregasyon, kini moresultag ‘pagdinasigay’ sa usag usa.​—Roma 1:11, 12.

¹⁸ Kining tanan nagpakita nga daw dako kaayo ang gidahom alang sa usa ka tigdumala. Siyempre, walay tigdumala nga hingpit gyong makasunod sa taas nga sukdanan sa Bibliya. Apan kinahanglang dili dako kaayo ang iyang kulang sa bisan hain niini nga mga hiyas, nga maisip na kana ingong seryosong kahuyangan. Ang tagsatagsa ka ansiyano dunay talagsaong mga hiyas ug abilidad. Ingong resulta, ang tanang ansiyano sa kongregasyon sa katibuk-an nakabaton sa tanang maayong hiyas nga gikinahanglan aron hustong madumala ang kongregasyon sa Diyos.

¹⁹ Dihang ang mga ansiyano sa kongregasyon magrekomendar ug brader ingong tigdumala, maayong hinumdoman nila ang giingon ni apostol Pablo: “Sultihan ta mo nga dili maghunahuna nga importante kaayo mo, kondili magbaton ug maayong panghunahuna, sumala sa pagtuo nga gihatag sa Diyos sa matag usa kaninyo.” (Roma 12:3) Kinahanglang isipon sa matag ansiyano nga siya ubos kay sa uban. Angayng walay usa kanila ang ‘maghinobra sa pagkamatarong’ dihang susihon nila ang mga kuwalipikasyon sa usa nga irekomendar. (Eccl. 7:16) Base sa mga kuwalipikasyon sa pagkahimong tigdumala nga naa sa Bibliya, susihon sa mga ansiyano kon ang brader nga irekomendar nakakab-ot ba sa maong mga sukdanan sa makataronganong sukod. Ilhon sa mga ansiyano ang pagkadili-hingpit sa brader nga ilang irekomendar ug dili sila magpihigpihig ug magpakitag pagkasalingkapaw. Niining paagiha, sila makarekomendar sa paagi nga nagpakitag pagtahod sa matarong nga mga sukdanan ni Jehova ug naghunahuna sa kaayohan sa kongregasyon. Mainampoon nilang susihon ang matag rekomendasyon ug sundon nila ang paggiya sa balaang espiritu sa Diyos. Usa kini sa ilang bug-at nga mga responsibilidad ug kinahanglan nila kining tumanon sumala sa tambag ni Pablo: “Ayaw gayod pagdali sa pagpatong sa imong mga kamot kang bisan kinsa.”​—1 Tim. 5:21, 22.

BUNGA SA ESPIRITU

²⁰ Makita sa pagkinabuhi sa kuwalipikadong mga brader nga sila gigiyahan sa balaang espiritu, ug sila nagpasundayag sa bunga niini. Gihisgotan ni Pablo ang siyam ka bahin sa bunga sa espiritu nga mao ang “gugma, kalipay, kalinaw, taas nga pailob, pagkabuotan, pagkamaayo, pagtuo, kalumo, ug pagpugong sa kaugalingon.” (Gal. 5:22, 23) Ang maong mga tigdumala makapadasig sa mga igsoon ug makatabang sa panaghiusa sa kongregasyon sa paghimog sagradong pag-alagad. Makita sa ilang panggawi ug sa mga resulta sa ilang paghago nga sila gitudlo sa balaang espiritu.​—Buh. 20:28.

MGA BRADER NGA NAGPATUNHAY SA PANAGHIUSA

²¹ Importante nga magtinabangay ang mga ansiyano aron mapatunhay ang panaghiusa sa kongregasyon. Bisag magkalahi kaayo ang ilang personalidad, ilang gipatunhay ang panaghiusa pinaagi sa pagtahod sa opinyon sa kaubang mga ansiyano, bisan pa tingalig may mga butang nga dili sila magkauyon. Basta walay nalapas nga prinsipyo sa Bibliya, ang matag usa kinahanglang andam nga mopahiuyon ug mosuportar sa desisyon sa kadaghanang ansiyano. Kon ila nang himoon, kana nagpakita nga sila gigiyahan sa “kaalam nga gikan sa langit,” nga “makigdaiton, makataronganon.” (Sant. 3:17, 18) Dili angayng maghunahuna ang usa ka ansiyano nga siya labaw kay sa uban ug mosulay sa pagdominar kanila. Dihang ang mga ansiyano mokooperar sa usag usa, sila nakigkooperar kang Jehova alang sa kaayohan sa kongregasyon.​—1 Cor., kap. 12; Col. 2:19.

PAGPANGAB-OT NGA MAHIMONG ANSIYANO

²² Ang hamtong nga mga brader angayng magtinguha nga mahimong tigdumala. (1 Tim. 3:1) Pero ang pag-alagad ingong ansiyano nagkinahanglag paningkamot ug sakripisyo. Nagpasabot ni nga ang usa ka brader andam mogahin ug panahon sa pag-atiman sa panginahanglan sa mga igsoon para sa ilang espirituwal nga kaayohan. Aron mokuwalipikar ingong tigdumala, kinahanglang maningkamot ang usa nga makab-ot ang Kasulatanhong mga kuwalipikasyon.

MGA KAUSABAN SA KAHIMTANG

²³ Ang usa ka brader nga matinumanong nag-alagad sa taas nga panahon mahimong grabeng masakit o malimitahan pag-ayo tungod sa iyang kahimtang. Tungod tingali sa pagkatigulang, dili na niya maatiman ang mga responsibilidad ingong tigdumala. Bisan pa niana, siya isipon ug tahoron gihapon ingong ansiyano. Dili kinahanglang moresayn siya sa pagkaansiyano tungod sa iyang mga limitasyon. Siya takos gihapon sa dobleng pasidungog sama sa tanang kugihang ansiyano nga nag-alagad kutob sa ilang maarangan sa pagbantay sa panon.

²⁴ Pero kon nakita sa brader nga mas maayong moresayn siya kay nausab ang iyang kahimtang ug dili na niya bug-os mahimo ang iyang responsibilidad, puwede siyang moresayn. (1 Ped. 5:2) Kinahanglan gihapon siyang tahoron. Daghan siyag puwedeng mahimo para sa kongregasyon, bisan pag dili na siya hatagag asaynment ug buluhaton para sa mga ansiyano.

MGA RESPONSIBILIDAD DIHA SA KONGREGASYON

²⁵ Ang mga ansiyano dunay lainlaing responsibilidad diha sa kongregasyon. Dunay koordinetor sa mga ansiyano, sekretaryo, tigdumala sa pag-alagad, tigdumala sa Pagtuon sa Bantayanang Torre, ug tigdumala sa Tigom nga Kinabuhi ug Ministeryo. Ang ubang ansiyano mag-alagad ingong tigdumala sa grupo sa pagsangyaw. Walay takdang gidugayon ang pag-alagad sa mga ansiyano niini nga mga responsibilidad. Siyempre, kon ang usa ka ansiyano mobalhin sa laing kongregasyon o dili na makaatiman sa iyang mga responsibilidad tungod sa sakit o dili na kuwalipikado kay wala na makakab-ot sa Kasulatanhong mga kuwalipikasyon, naay laing ansiyano nga pilion aron mohimo sa maong asaynment. Sa mga kongregasyon nga diyutay rag tigdumala, tingali mas daghang responsibilidad ang atimanon sa usa ka ansiyano hangtod nga naa nay mga brader nga mokuwalipikar nga itudlo ingong mga ansiyano.

²⁶ Ang koordinetor sa mga ansiyano maoy mag-tsirman sa mga miting sa mga ansiyano. Ingong koordinetor, siya mapainubsanong mokooperar sa mga ansiyano sa pag-atiman sa panon sa Diyos. (Roma 12:10; 1 Ped. 5:2, 3) Siya kinahanglang maayong moorganisar ug kugihan sa pagdumala.​—Roma 12:8.

²⁷ Ang sekretaryo maoy mag-atiman sa mga rekord sa kongregasyon ug kanunayng magpahibalo sa mga komunikasyon nga importanteng mahibaloan sa tanang ansiyano. Kon gikinahanglan, ang laing ansiyano o takos nga ministeryal nga alagad iasayn sa pagtabang kaniya.

²⁸ Ang mga kahikayan sa pagsangyaw ug uban pang buluhatong nalangkit niini atimanon sa tigdumala sa pag-alagad. Mag-eskedyul siyag regular nga pagduaw sa tanang grupo sa pagsangyaw aron sa usa ka weekend, o hinapos sa semana, kada bulan mabisita niya ang lainlaing grupo. Sa gagmayng kongregasyon nga diyutay rag grupo, mahimo niyang duawon ang matag grupo kaduha sa usa ka tuig. Panahon sa iyang duaw, dumalahon niya ang mga tigom alang sa pagsangyaw, mosangyaw kauban sa grupo, ug mokuyog sa mga igsoon sa ilang mga balikduaw ug Bible study.

TIGDUMALA SA GRUPO

²⁹ Usa sa talagsaong mga pribilehiyo diha sa kongregasyon mao ang pag-alagad ingong tigdumala sa grupo. Lakip sa iyang responsibilidad ang (1) kanunayng paghatag ug atensiyon sa espirituwalidad sa matag sakop sa grupo; (2) pagtabang sa matag sakop sa grupo aron sila regular, madasigon, ug malipayon nga makapakigbahin sa ministeryo; (3) pagtabang ug pagbansay sa ministeryal nga mga alagad nga sakop sa grupo nga mangab-ot ug mokuwalipikar nga moatiman sa mga responsibilidad diha sa kongregasyon. Tinoon sa mga ansiyano kon kinsa nga mga brader ang labing kuwalipikadong moatiman niini nga asaynment.

³⁰ Tungod sa responsibilidad nga nalangkit niini nga asaynment, ang mga tigdumala sa grupo kinahanglang mga ansiyano, kon posible. Ang kuwalipikadong ministeryal nga alagad mahimong moatiman niini nga responsibilidad hangtod nga naa nay ansiyano nga makadumala. Ang ministeryal nga alagad nga gihatagan niini nga asaynment tawgong alagad sa grupo, kay dili man siya tigdumala sa kongregasyon. Hinuon, buhaton niya kini nga asaynment ubos sa pagdumala sa mga ansiyano.

³¹ Usa sa hinungdanong buluhaton sa tigdumala sa grupo mao ang pagpanguna diha sa ministeryo. Kon siya regular, madasigon, ug kugihan diha sa ministeryo, madasig niya ang iyang grupo. Kay ang mga magmamantala madasig ug matabangan dihang magkauban sila sa ministeryo, maayo nga ang eskedyul sa pagsangyaw sa grupo kombenyente sa kadaghanan. (Luc. 10:1-16) Angayng seguroon sa tigdumala sa grupo nga may igong teritoryo nga makobrehan. Sagad, siya ang magdumala sa tigom alang sa pagsangyaw ug mag-organisar sa mga magmamantala sa kalihokan nianang adlawa. Kon dili niya madumala ang pagsangyaw, iyang hikayon nga may laing ansiyano o ministeryal nga alagad nga manguna sa grupo sa pagsangyaw. Pero kon walay ansiyano o ministeryal, iyang hikayon nga may kuwalipikadong magmamantala nga manguna sa grupo.

³² Ang tigdumala sa grupo angayng mangandam sa pagduaw sa tigdumala sa pag-alagad, pahibaloon niya ang iyang grupo, ug dasigon sila sa pagpahimulos niini. Kon ang tanang sakop sa grupo nahibalo pag-ayo sa kahikayan sa pagduaw, sila madasigong makasuportar niana.

³³ Gituyo nga gamay ra ang matag grupo sa pagsangyaw aron masinati pag-ayo sa tigdumala ang tanang sakop sa iyang grupo. Ingong mahigugmaong magbalantay, siya interesado kaayo sa matag usa sa grupo. Maningkamot siya nga personal nga makatabang ug makadasig kanila sa pagsangyaw ug pagtambong sa mga tigom. Maningkamot usab siya sa paghatag ug nahiangayng tabang aron magpabiling lig-on sa espirituwal ang matag sakop sa grupo. Kadtong nasakit o na-depress makabenepisyo sa iyang personal nga pagduaw. Ang makapadasig nga sugyot o tambag posibleng makapalihok sa uban sa pagkab-ot ug dugang pribilehiyo sa kongregasyon ug sa ingon mas makatabang sila sa mga igsoon. Siyempre, ang tigdumala sa grupo pangunang motabang sa mga sakop sa iyang grupo. Apan ingong ansiyano ug magbalantay, siya angayng mahigugmaong mag-atiman sa tanang igsoon sa kongregasyon ug andam motabang niadtong nanginahanglan.​—Buh. 20:17, 28.

³⁴ Usa sa mga responsibilidad sa tigdumala sa grupo mao ang pagtabang sa pagkolektag mga report sa iyang grupo. Ang maong mga report ihatag niya sa sekretaryo. Ang matag magmamantala makatabang sa tigdumala sa grupo pinaagi sa paghatag dayon sa ilang report. Mahimong direkta nilang ihatag ang ilang report ngadto sa tigdumala sa grupo matag kataposan sa bulan o ihulog kini sa kahon alang sa mga report diha sa Kingdom Hall.

KOMITE SA PAG-ALAGAD SA KONGREGASYON

³⁵ May espesipikong mga buluhaton nga atimanon ang Komite sa Pag-alagad sa Kongregasyon, nga gilangkoban sa koordinetor sa mga ansiyano, sekretaryo, ug sa tigdumala sa pag-alagad. Pananglitan, ang komite sa pag-alagad maoy mag-aprobar sa paggamit sa Kingdom Hall alang sa kasal ug sa diskurso bahin sa patay. Responsibilidad sab nila kon asa nga grupo sa pagsangyaw iasayn ang mga magmamantala. Ang komite sab ang mag-aprobar sa mga aplikasyon alang sa regular ug oksilyare payunir ug sa uban pang pribilehiyo sa pag-alagad. Ang komite mag-alagad ubos sa direksiyon sa tanang ansiyano sa kongregasyon.

³⁶ Ang giya bahin sa espesipikong mga responsibilidad niini nga mga brader​—apil na nianang sa tigdumala sa Pagtuon sa Bantayanang Torre, sa tigdumala sa Tigom nga Kinabuhi ug Ministeryo, ug sa uban pang ansiyano sa kongregasyon​—naggikan sa sangang buhatan.

³⁷ Ang mga ansiyano sa kongregasyon regular nga magmiting aron hisgotan ang mga butang bahin sa espirituwal nga pag-uswag sa kongregasyon. Gawas pa sa miting sa mga ansiyano panahon sa duaw sa tigdumala sa sirkito, magmiting sab sila mga tulo ka bulan human sa matag duaw. Siyempre, puwede silang magmiting bisan kanus-a kon gikinahanglan.

MAGMAPINASAKOPON

³⁸ Ang mga tigdumala dili hingpit; pero ang tanan sa kongregasyon giawhag nga magpasakop kanila kay kahikayan kini ni Jehova. Ang mga tigdumala manubag kang Jehova sa ilang mga buhat. Sila nagrepresentar kaniya ug sa iyang teokratikanhong pagmando. Ang Hebreohanon 13:17 nag-ingon: “Magmasinugtanon mo sa mga nanguna kaninyo ug magpasakop kanila, kay sila nagabantay kaninyo sanglit manubag sila sa Diyos, aron himoon nila kini nga malipayon ug dili manghupaw, kay makadaot kini kaninyo.” Ingon nga si Jehova mogamit ug balaang espiritu sa pagtudlog tigdumala, o ansiyano, iyang gamiton ang mao ra gihapong espiritu sa pagtangtang sa tigdumala nga wala na magpakitag bunga sa espiritu ug wala na magkinabuhi uyon sa Kasulatanhong mga kuwalipikasyon.

³⁹ Dili ba gipabilhan gyod nato ang kakugi ug maayong panig-ingnan sa mga tigdumala sa kongregasyon? Dihang si Pablo misulat sa kongregasyon sa Tesalonica, iyang giawhag ang mga igsoon: “Kami naghangyo ninyo, mga igsoon, nga tahoron silang naghago taliwala kaninyo ug nagdumala kaninyo diha sa Ginoo ug nagtambag kaninyo; ug pakitaan silag labaw nga konsiderasyon ug higugmaon tungod sa ilang ginabuhat.” (1 Tes. 5:12, 13) Tungod sa kakugi sa mga tigdumala sa kongregasyon, ang atong pag-alagad sa Diyos mas sayon ug mas makapalipay. Dugang pa, sa iyang unang sulat kang Timoteo, gihisgotan ni Pablo ang tinamdan nga angayng ugmaron sa mga igsoon sa kongregasyon ngadto sa mga tigdumala, nga nag-ingon: “Ang mga ansiyano nga nagdumala sa maayong paagi kinahanglang isipon nga takos sa dobleng pasidungog, ilabina kadtong naghago sa pagpanulti ug pagpanudlo.”​—1 Tim. 5:17.

UBAN PANG RESPONSIBILIDAD DIHA SA ORGANISASYON

⁴⁰ Usahay, dunay mga ansiyano nga itudlo ingong membro sa mga Patient Visitation Group. Ang uban nag-alagad ingong membro sa mga Hospital Liaison Committee ug moduaw sa mga ospital ug doktor aron dasigon sila nga padayong mogamit sa alternatibong pamaagi sa pagtambal sa mga Saksi ni Jehova nga dili ra mag-abonog dugo. Ang ubang tigdumala nakasuportar sa buluhaton sa Gingharian pinaagi sa pagtabang sa pagpanukod ug pagmentinar sa mga Kingdom Hall ug Assembly Hall o pag-alagad ingong membro sa mga Komite sa Kombensiyon. Ang kakugi niini nga mga brader ug ang ilang pagkaandam mosakripisyo gipabilhan pag-ayo sa tanan diha sa organisasyon. Ato gyong ‘padayong gimahal ang mga igsoon nga sama nila.’​—Filip. 2:29.

TIGDUMALA SA SIRKITO

⁴¹ Ang Nagamandong Lawas mao ang maghikay sa pagtudlog kuwalipikadong mga ansiyano ingong mga tigdumala sa sirkito. Sila ang giasayn sa sangang buhatan sa pagduaw sa mga kongregasyon nga sakop sa ilang sirkito, sagad kaduha sa usa ka tuig. May mga panahon nga mobisita sab sila sa mga payunir sa hilit nga teritoryo. Ilang ieskedyul ang ilang pagduaw sa tibuok sirkito ug abante nila kining ipahibalo sa matag kongregasyon aron makabenepisyo pag-ayo ang mga kongregasyon sa ilang pagduaw.

⁴² Ang koordinetor sa mga ansiyano manguna sa pag-organisar sa mga kalihokan aron ang pagduaw makapadasig sa tanan. (Roma 1:11, 12) Pagkadawat niya sa sulat bahin sa duaw ug sa impormasyon bahin sa personal nga mga panginahanglan sa tigdumala sa sirkito ug sa iyang asawa (kon minyo), ang koordinetor sa mga ansiyano maghimog kahikayan nga may mga igsoong motagana sa sak-anan ug ubang kinahanglanon. Seguroon niya nga ang tanan, apil ang tigdumala sa sirkito, mahibalo niini nga mga kahikayan.

⁴³ Kontakon sa tigdumala sa sirkito ang koordinetor sa mga ansiyano bahin sa eskedyul sa mga tigom, apil ang mga tigom alang sa pagsangyaw. Kini hikayon sumala sa mga sugyot sa tigdumala sa sirkito ug sa direksiyon sa sangang buhatan. Ang tanan kinahanglang abanteng pahibaloon kon kanus-a ug asa ang mga tigom sa kongregasyon, miting sa mga payunir, miting sa mga ansiyano ug ministeryal nga alagad, ingon man ang mga tigom alang sa pagsangyaw.

⁴⁴ Sa Martes sa hapon, ang tigdumala sa sirkito magsusi sa mga Congregation’s Publisher Record, rekord sa attendance sa tigom, rekord sa teritoryo, ug sa account sa kongregasyon. Makatabang ni nga mahibaloan niya ang posibleng mga panginahanglan sa kongregasyon ug kon unsay iyang ikatabang sa nag-atiman sa maong mga rekord. Ang koordinetor sa mga ansiyano maghimog mga kahikayan aron abanteng madawat sa tigdumala sa sirkito ang mga rekord.

⁴⁵ Panahon sa duaw, ang tigdumala sa sirkito mogahin ug panahon nga makigsulti sa matag igsoon, kon posible​—sa mga tigom, pagsangyaw, pagpangaon, ug uban pa. Dugang pa, siya makigmiting sa mga ansiyano ug ministeryal nga alagad, ug mohatag ug haom nga tambag, sugyot, ug pagdasig gikan sa Bibliya nga makatabang nila sa pag-atiman sa ilang mga responsibilidad ingong magbalantay sa panon. (Prov. 27:23; Buh. 20:26-32; 1 Tim. 4:11-16) Siya makigmiting sab sa mga payunir aron dasigon sila ug hatagag personal nga tabang bahin sa mga problema sa ilang ministeryo.

⁴⁶ Kon may ubang butang nga nagkinahanglag pagtagad, paningkamotan sa tigdumala sa sirkito nga makatabang siya nianang semanaha. Kon dili kini mahuman o masulbad nianang panahona, ang tigdumala sa sirkito makatabang sa mga ansiyano o sa nalangkit nga mga indibiduwal sa pag-research ug mga prinsipyo sa Bibliya nga mapadapat. Kon i-follow up kini sa sangang buhatan, siya ug ang mga ansiyano magpadalag detalyadong report sa maong kahimtang.

⁴⁷ Tambongan sa tigdumala sa sirkito ang regular nga mga tigom sa kongregasyon panahon sa iyang duaw. Usahay, puwedeng usbon ang eskedyul sa mga tigom sumala sa direksiyon sa sangang buhatan. Mohatag siyag mga pakigpulong nga giandam alang sa pagdasig, pag-awhag, pagtudlo, ug paglig-on sa kongregasyon. Paningkamotan niyang mas molalom ang gugma sa mga igsoon kang Jehova, Jesu-Kristo, ug sa organisasyon.

⁴⁸ Ang usa sa mga tumong sa pagduaw sa tigdumala sa sirkito mao ang pagdasig sa mga igsoon nga magmakugihon sa ministeryo ug ang paghatag ug praktikal nga mga sugyot. Daghang igsoon ang makahimo tingali sa pag-adyas sa ilang eskedyul aron bug-os nga makasuportar sa ministeryo nianang semanaha, tingali pinaagi sa pag-aplay ingong oksilyare payunir sa bulan sa duaw. Kadtong gustong makigpartner kaniya o sa iyang asawa diha sa ministeryo puwedeng makigsabot daan. Dako gyod ug kaayohan kon iuban ang tigdumala sa sirkito o ang iyang asawa sa mga Bible study ug balikduaw. Ang imong paghimog dugang nga paningkamot aron bug-os makasuportar niining bahina sa semana sa duaw gipabilhan pag-ayo.​—Prov. 27:17.

⁴⁹ Kada tuig, duha ka sirkitong asembliya ang himoon sa matag sirkito. Ang tigdumala sa sirkito mao ang mag-organisar sa kahikayan sa asembliya. Siya ang magtudlo ug tigdumala sa asembliya ug asistant nga tigdumala sa asembliya. Sila makigkooperar sa tigdumala sa sirkito sa pag-organisar sa asembliya. Kini makatabang sa tigdumala sa sirkito nga mahatagan niyag prayoridad ang programa sa asembliya. Ang tigdumala sa sirkito magpili sab ug ubang kuwalipikadong brader sa pag-atiman sa lainlaing departamento. Hikayon sab niya nga may mag-awdit sa account sa sirkito human sa matag asembliya. Ang usa sa duha ka sirkitong asembliya matag tuig alagaran sa usa ka representante sa sangang buhatan, nga maoy mahimong bisitang mamumulong. Kay ang ubang asembliyahanan layo o gamay, ang pipila ka sirkito bahinon sa mga seksiyon, ug ang matag seksiyon dunay kaugalingong sirkitong asembliya.

⁵⁰ Ang tigdumala sa sirkito direktang magpadala sa iyang report sa pag-alagad sa kanataran ngadto sa sangang buhatan kada bulan. Kon nakagasto siyag rasonableng kantidad nga kinahanglang hulipan​—sama sa pagbiyahe, pagkaon, sak-anan, ug uban pa nga gikinahanglan sa iyang buluhaton​—ug wala kini mahulipi sa kongregasyon nga iyang giduaw, mahimo niya kining pahulipan sa sangang buhatan. Sila dunay pagsalig nga kon unahon nila ang mga buluhaton sa Gingharian ni Jehova, sila tagan-an ra sa ilang materyal nga panginahanglan, sumala sa gisaad ni Jesus. (Luc. 12:31) Ang mga kongregasyon maningkamot gayod nga himoon ang ilang pribilehiyo sa pag-abiabi niining debotadong mga ansiyano nga nag-alagad kanila.​—3 Juan 5-8.

KOMITE SA SANGANG BUHATAN

⁵¹ Sa matag sangang buhatan sa mga Saksi ni Jehova sa tibuok kalibotan, dunay tulo o kapin pang hamtong sa espirituwal nga mga brader nga mag-alagad ingong Komite sa Sangang Buhatan nga magdumala sa buluhatong pagsangyaw diha sa nasod o mga nasod nga sakop sa ilang pagdumala. Ang usa kanila mag-alagad ingong koordinetor sa Komite sa Sangang Buhatan.

⁵² Ang Komite sa Sangang Buhatan maoy magdumala sa mga kalihokan sa tanang kongregasyon nga sakop sa teritoryo sa sangang buhatan. Ang komite maoy magdumala sa pagsangyaw sa maayong balita sa Gingharian sa tibuok teritoryo sa sangang buhatan. Paneguroon sab sa komite nga ang mga kongregasyon ug sirkito naorganisar aron madumala sa hustong paagi ang mga panginahanglan sa teritoryo. Atimanon sab sa Komite sa Sangang Buhatan ang kalihokan sa mga misyonaryo, ug sa mga espesyal, regular, ug oksilyare payunir. Dihang himoon ang mga asembliya ug kombensiyon, ang komite maoy mag-organisar ug maghatag ug mga asaynment aron ‘mahimo ang tanang butang nga may kahapsay ug pinaagig kahikayan.’​—1 Cor. 14:40.

⁵³ Dunay itudlo nga Komite sa Nasod sa pipila ka lugar nga ilalom sa pagdumala sa Komite sa Sangang Buhatan sa laing lugar. Pinaagi niini, madumala pag-ayo ang buluhaton sa lugar diin nag-alagad ang Komite sa Nasod. Atimanon niini ang mga buluhaton sa Bethel Home ug opisina niini, mga sulat ug report, ug ang tanang kalihokan sa teritoryo. Ang Komite sa Nasod mokooperar sa Komite sa Sangang Buhatan alang sa pagpauswag sa buluhaton sa Gingharian.

⁵⁴ Ang Nagamandong Lawas maoy magtudlog mga membro sa Komite sa Sangang Buhatan ug Komite sa Nasod.

MGA REPRESENTANTE SA HEDKUWARTER

⁵⁵ Usahay, hikayon sa Nagamandong Lawas nga dunay moduaw nga kuwalipikadong mga brader sa matag sangang buhatan sa tibuok yuta. Ang brader nga mohimo niini nga pribilehiyo gitawag ug representante sa hedkuwarter. Ang iyang pangunang buluhaton mao ang pagdasig sa pamilyang Bethel ug pagtabang sa Komite sa Sangang Buhatan sa ilang mga problema o pagtubag sa mga pangutana bahin sa buluhatong pagsangyaw ug paghimog tinun-an. Siya makigmiting sab sa gipili nga mga tigdumala sa sirkito ug, usahay, sa mga misyonaryo. Siya makigsulti kanila bahin sa ilang mga problema ug panginahanglan, ug dasigon sila bahin sa ilang pinakaimportanteng buluhaton, ang pagsangyaw sa Gingharian ug paghimog tinun-an.

⁵⁶ Ang representante sa hedkuwarter interesado kaayo sa mga nalampos diha sa teritoryo kon bahin sa pagsangyaw sa Gingharian ug sa ubang kalihokan sa kongregasyon. Kon itugot sa panahon, duawon sab niya ang mga remote translation office. Dihang moduaw sa sangang buhatan ang representante sa hedkuwarter, mouban sab siya sa pagsangyaw kon posible.

MAHIGUGMAONG PAGDUMALA

⁵⁷ Nakabenepisyo gyod ta sa kakugi ug mahigugmaong pag-atiman sa hamtong nga Kristohanong mga brader. Samtang padayon tang magpasakop sa tinudlong mga tigdumala nga gipiyalan sa pagbantay sa panon, kita mahiusa uban sa Ulo sa kongregasyon, si Kristo Jesus. (1 Cor. 16:15-18; Efe. 1:22, 23) Tungod niana, makita nga ang espiritu sa Diyos naglihok diha sa mga kongregasyon sa tibuok kalibotan ug ang Pulong sa Diyos naggiya sa atong buluhaton sa tibuok yuta.​—Sal. 119:105.