Hinungdanon ang Buluhaton sa Ministeryal nga mga Alagad

SI APOSTOL Pablo misulat sa kongregasyon sa Filipos: “Gikan kang Pablo ug Timoteo, mga ulipon ni Kristo Jesus, ngadto sa tanang balaan sa Filipos nga nahiusa kang Kristo Jesus, apil ang mga tigdumala ug mga ministeryal nga alagad.” (Filip. 1:1) Matikdi nga iyang gipangomosta ang ministeryal nga mga alagad. Dayag nga dako silag papel sa pagtabang sa mga ansiyano sa kongregasyon kaniadto. Mao man usab sa atong panahon karon. Ang ministeryal nga mga alagad naghimog mga buluhaton nga makatabang sa mga tigdumala ug makaamot sa kahapsay sa kongregasyon.

² Nakaila ba ka sa ministeryal nga mga alagad sa inyong kongregasyon? Nahibalo ba ka kon unsay ilang ginahimo para sa imong kaayohan ug sa tibuok kongregasyon? Gipabilhan gayod ni Jehova ang ilang mga paningkamot. Si Pablo misulat: “Ang mga lalaki nga nag-alagad sa maayong paagi dunay maayong reputasyon ug dakong kagawasan sa pagsulti diha sa pagtuo maylabot kang Kristo Jesus.”​—1 Tim. 3:13.

KASULATANHONG MGA KUWALIPIKASYON PARA SA MINISTERYAL NGA MGA ALAGAD

³ Ang ministeryal nga mga alagad gidahom nga sulondan sa Kristohanong pagkinabuhi, mahimong responsable, ug kasaligan sa pagtuman sa ilang mga asaynment. Uyon kana sa giingon ni Pablo bahin sa mga kuwalipikasyon sa ministeryal nga mga alagad diha sa iyang sulat kang Timoteo: “Ang mga ministeryal nga alagad kinahanglan sab nga seryoso, dili duhay sinultihan, dili magpalabig inom ug bino, dili magtinguha nga mamentaha, nga nangupot sa sagradong tinago sa pagtuo uban ang hinlong konsensiya. Kinahanglan sab nga sulayan una sila kon angayan ba; unya kon walay akusasyon kanila, mahimo silang mga ministeryal nga alagad. Ang mga ministeryal nga alagad kinahanglang usa ray asawa, nga nagdumala sa ilang mga anak ug panimalay sa maayong paagi.” (1 Tim. 3:8-10, 12) Dihang ang mga ansiyano magrekomendar ug brader nga mahimong ministeryal nga alagad, seguroon nila nga nakab-ot sa maong brader ang Kasulatanhong mga kuwalipikasyon. Pinaagi niini, maprotektahan ang kongregasyon gikan sa mga akusasyon bahin sa kon unsang matanga sa mga brader ang gipiyalan ug linaing mga responsibilidad.

⁴ Batan-on man o edaran, ang ministeryal nga mga alagad aktibo sa ministeryo matag bulan. Agig pagsundog kang Jesus, sila nagpakitag kadasig sa ministeryo. Sa pagbuhat niana, ilang gipakita nga sama kang Jehova, gusto sab nilang maluwas ang mga tawo.​—Isa. 9:7.

⁵ Ang ministeryal nga mga alagad maayo sab nga panig-ingnan sa ilang sininaan, pamostura, sinultihan, tinamdan, ug panggawi. Sila maayog panghunahuna mao nga gitahod sila sa uban. Dugang pa, gipabilhan nila pag-ayo ang ilang relasyon kang Jehova ug ang ilang mga pribilehiyo sa kongregasyon.​—Tito 2:2, 6-8.

⁶ Kini nga mga brader ‘nasulayan’ na kon sila ba kuwalipikado. Bisan sa wala pa sila matudlo, sila nailhan na ingong madasigong mga brader. Ilang gipakita nga giuna nila ang Gingharian sa ilang kinabuhi ug nangab-ot silag bisan unsang pribilehiyo nga bukas alang kanila. Sila sulondan gayod sa mga igsoon sa kongregasyon.​—1 Tim. 3:10.

KON SA UNSANG PAAGI SILA NAG-ALAGAD

⁷ Ang ministeryal nga mga alagad naghimog lainlaing mapuslanong mga buluhaton alang sa mga igsoon, maong ang mga tigdumala makagahin ug mas daghang panahon sa pagtudlo ug pag-shepherding. Dihang hatagan silag mga asaynment, konsiderahon sa mga ansiyano ang katakos sa matag ministeryal nga alagad ug ang mga panginahanglan sa kongregasyon.

⁸ Kini ang pipila sa ilang mga buluhaton: Dunay iasayn sa pag-atiman sa literatura aron duna tay magamit alang sa personal ug sa ministeryo. Ang uban iasayn sa pag-atiman sa account sa kongregasyon o sa rekord sa teritoryo. Naa poy iasayn sa pagpasag mikropono, pag-operate sa sound, pag-alagad ingong attendant, ug sa pagtabang sa mga ansiyano sa ubang paagi. Daghan ang angayng himoon aron mamentinar ang Kingdom Hall ug kanunay kining hinlo, busa ang ministeryal nga mga alagad sagad hangyoon nga maoy motabang sa pag-atiman niini nga mga responsibilidad.

⁹ Sa ubang kongregasyon, posible tingaling mag-asayn ug usa ka ministeryal nga alagad sa matag usa niini nga mga buluhaton. Sa pipila ka kongregasyon, ang usa ka ministeryal nga alagad tingali mag-atiman ug daghang asaynment. Sa ubang kahimtang, puwedeng kapin sa usa ka ministeryal nga alagad ang mag-atiman sa usa ka buluhaton. Kon kulang ug ministeryal nga mga alagad nga moatiman niana nga mga responsibilidad, ang mga ansiyano mahimong mag-asayn ug ubang sulondan ug bawtismadong mga brader sa paghimo nianang importanteng buluhaton. Pinaagi niini, sila makabaton ug kasinatian nga magamit nila dihang sila kuwalipikado na nga itudlo ingong ministeryal nga mga alagad. Kon walay magamit nga brader, mahimong hangyoon ang sulondang sister sa pagtabang sa pipila ka buluhaton bisan tuod siya dili itudlo ingong ministeryal nga alagad. Ang usa ka brader o sister matawag nga sulondan kon ang iyang panggawi ug pag-alagad maayong panig-ingnan sa uban. Sulondan siya sa pagtambong sa mga tigom, pagministeryo, pamilyahanong kinabuhi, pagpilig mga kalingawan, sininaan ug pamostura, ug uban pa.

¹⁰ Sa mga kongregasyon nga gamay ra kaayog ansiyano, ang takos nga ministeryal nga mga alagad mahimong gamiton sa pagrepaso niadtong mga kandidato sa bawtismo alang sa mga pangutana maylabot sa mga doktrina. Makita kini sa Apendise “Bahin 1: Kristohanong mga Pagtulon-an.” Kay ang “Bahin 2: Kristohanong Pagkinabuhi” naghisgot man ug sensitibong personal nga mga butang, ansiyano ang angayng modumala niini nga seksiyon.

¹¹ Kon gikinahanglan, ang mga ansiyano puwedeng mohukom nga ang ministeryal nga mga alagad magpulihay usahay ug mga asaynment. Pero naa poy dakong bentaha kon ang mga brader iasayn sa samang mga asaynment sa taastaas nga panahon aron mahanas sila niana.

¹² Depende sa lokal nga kahimtang, dunay ubang responsibilidad nga puwedeng iasayn sa ministeryal nga mga alagad kansang “pag-uswag klarong makita sa tanan.” (1 Tim. 4:15) Kon kulang ang mga ansiyano, ang ministeryal nga alagad mahimong iasayn ingong asistant sa tigdumala sa grupo o, sa pipila ka kahimtang, ingong alagad sa grupo, ubos sa pagdumala sa mga ansiyano. Ang ministeryal nga mga alagad mahimong gamiton sa pagdumala sa pipila ka bahin sa Tigom nga Kinabuhi ug Ministeryo, apil ang pagdumala sa Pagtuon sa Kongregasyon sa Bibliya kon gikinahanglan, ug sa paghatag ug mga pakigpulong publiko. Ang ubang pribilehiyo mahimong iasayn ngadto sa mga ministeryal kon dunay espesipikong panginahanglan ug kon sila kuwalipikado sa maong asaynment. (1 Ped. 4:10) Ang ministeryal nga mga alagad angay nga kinabubut-ong motabang sa mga ansiyano.

¹³ Bisag ang ilang buluhaton lahi kay sa mga ansiyano, kini maoy sagradong pag-alagad sa Diyos ug hinungdanon alang sa kahapsay sa kongregasyon. Sa ngadtongadto, kon ang ministeryal nga mga alagad magkugi pagtuman sa ilang obligasyon ug mokuwalipikar sa pag-alagad ingong mga magbalantay ug magtutudlo, sila mahimong irekomendar ingong mga ansiyano.

¹⁴ Kon ikaw tin-edyer o bag-ong nabawtismohan nga brader, naningkamot ba ka nga mokuwalipikar ingong ministeryal nga alagad? (1 Tim. 3:1) Kay daghan ang mabawtismohan kada tuig, gikinahanglan ang kuwalipikadong mga brader sa pag-atiman sa mga responsibilidad sa kongregasyon. Makab-ot nimo kini nga pribilehiyo pinaagi sa pag-ugmad sa tinguha nga motabang sa uban. Ang usa ka paagi sa paghimo niini mao ang pagpamalandong sa maayong ehemplo ni Jesus. (Mat. 20:28; Juan 4:6, 7; 13:4, 5) Modako ang imong tinguha sa pagtabang sa uban kon imong masinatian ang kalipay sa paghatag. (Buh. 20:35) Busa puwede kang moboluntaryo sa pagtabang sa uban, sa pagmentinar sa Kingdom Hall, o sa paghulip sa asaynment sa estudyante panahon sa Tigom nga Kinabuhi ug Ministeryo. Mahimo sab nimong ugmaron ang diyosnong mga hiyas pinaagi sa regular nga personal nga pagtuon. (Sal. 1:1, 2; Gal. 5:22, 23) Dugang pa, ang brader nga nangab-ot ug pribilehiyo kasaligan ug matinumanon dihang hatagag mga asaynment sa kongregasyon.​—1 Cor. 4:2.

¹⁵ Ang ministeryal nga mga alagad gitudlo sa balaang espiritu para sa kaayohan sa kongregasyon. Mapakita sa tanang igsoon sa kongregasyon nga ilang giapresyar ang paghago sa ministeryal nga mga alagad pinaagi sa pagpakigkooperar kanila samtang ginahimo nila ang ilang mga asaynment. Pinaagi niini, mapakita sa kongregasyon nga ilang gipabilhan ang tagana ni Jehova sa pagmentinar sa kahapsay sa kongregasyon.​—Gal. 6:10.