Pabiling Suod sa Organisasyon ni Jehova

ANG tinun-an nga si Santiago misulat: “Duol sa Diyos, ug siya moduol kaninyo.” (Sant. 4:8) Oo, si Jehova dili sobra ka taas o sobra ka layo nga tungod niana dili siya makadungog sa atong mga pag-ampo, bisan pa sa atong pagkadili-hingpit. (Buh. 17:27) Sa unsang paagi ta moduol, o makigsuod, sa Diyos? Pinaagi sa pag-ugmad ug suod nga relasyon kaniya nga naglakip sa sinserong pag-ampo. (Sal. 39:12) Masuod sab ta sa Diyos pinaagi sa regular nga pagtuon sa iyang Pulong, ang Bibliya. Niining paagiha, mailhan nato si Jehova nga Diyos ug mahibaloan ang iyang mga katuyoan ug kabubut-on alang kanato. (2 Tim. 3:16, 17) Busa nakakat-on ta sa paghigugma kaniya ug sa pag-ugmad ug hustong kahadlok nga mapaguol siya.​—Sal. 25:14.

² Pero posible lang tang masuod kang Jehova pinaagi sa iyang Anak, si Jesus. (Juan 17:3; Roma 5:10) Walay laing tawo nga makatabang kanato nga mas masabtan ang panghunahuna ni Jehova gawas kang Jesus. Suod kaayo siya sa iyang Amahan nga siya nakaingon: “Walay nakaila sa Anak gawas sa Amahan, ug walay nakaila sa Amahan gawas sa Anak ug niadtong buot tudloan sa Anak bahin sa Amahan.” (Luc. 10:22) Busa dihang tun-an nato ang Ebanghelyo aron masayran kon unsay panghunahuna ug pagbati ni Jesus, samag gitun-an sab nato ang panghunahuna ug pagbati ni Jehova. Kana nga kahibalo mas makapasuod nato sa Diyos.

³ Ubos sa pagpangulo sa Anak sa Diyos, atong maugmad ang suod nga relasyon kang Jehova pinaagi sa atong pagpabiling suod sa makitang organisasyon sa Diyos, nga maoy nagtabang nato sa pagkat-on kon unsaon pagbuhat ang iyang kabubut-on. Sumala sa gitagna sa Mateo 24:45-47, gitudlo sa Agalon, si Jesu-Kristo, ang “matinumanon ug maalamong ulipon” sa pagtaganag “pagkaon sa hustong panahon” alang sa panimalay sa pagtuo. Karon, ang matinumanong ulipon nagtagana kanatog dagayang espirituwal nga pagkaon. Pinaagi niini nga organisasyon, si Jehova nagtambag nato sa pagbasa sa iyang Pulong kada adlaw, pagtambong nga regular sa Kristohanong mga panagkatigom, ug sa bug-os nga pagpakigbahin sa pagsangyaw sa “maayong balita sa Gingharian.” (Mat. 24:14; 28:19, 20; Jos. 1:8; Sal. 1:1-3) Bisan pag ang matinumanong ulipon dili hingpit, segurado ta nga kini nga ulipon gigiyahan sa Diyos. Maningkamot gyod ta nga magpabiling suod sa makitang bahin sa organisasyon ni Jehova ug mosunod sa direksiyon niini. Kini mas makapasuod nato sa atong Diyos, si Jehova, ug maghatag natog kalig-on ug panalipod bisan pa sa mga pagsulay.

KON NGANONG NAGKADAGHAN ANG PAGSULAY

⁴ Tingali dugay na ka sa kamatuoran. Kon mao, seguradong nahibalo ka kon unsay kahulogan sa paglahutay sa mga pagsulay sa integridad. Pero bisag bag-o pa lang kang nakaila kang Jehova ug nakig-uban sa iyang katawhan, nahibalo ka nga si Satanas nga Yawa supak niadtong gustong magpasakop sa pagkasoberano ni Jehova. (2 Tim. 3:12) Grabe man o dili ang pag-antos nga imong nasinatian, dili ka angayng mahadlok o maluya. Si Jehova nagsaad nga iya kang palig-onon ug hatagag kaluwasan ug kinabuhing walay kataposan.​—Heb. 13:5, 6; Pin. 2:10.

⁵ Kitang tanan tingali makasinati pag mga pagsulay niining nahibiling mga adlaw sa sistema ni Satanas. Sukad nga natukod ang Gingharian sa Diyos niadtong 1914, si Satanas wala na tugoti nga makasulod sa kalangitan ni Jehova. Siya ug ang iyang daotang mga anghel gitambog dinhi sa yuta. Ang paggrabe sa kasakitan sa yuta, apil ang nagkagrabe nga paglutos batok sa mga alagad ni Jehova maoy resulta sa kasuko ni Satanas ug pamatuod sab kini nga nagkinabuhi na ta sa kataposang mga adlaw sa iyang daotang pagmando sa katawhan.​—Pin. 12:1-12.

⁶ Nasuko pag-ayo si Satanas sa pagtambog kaniya, ug nahibalo siya nga mubo na lang ang iyang panahon. Uban sa iyang mga demonyo, naningkamot siya pag-ayo nga mababagan ang buluhatong pagsangyaw sa Gingharian ug mabungkag ang panaghiusa sa mga alagad ni Jehova. Tungod niini, kita nag-atubang ug espirituwal nga pakiggubat nga gihubit ingong “pakig-away, dili batok sa dugo ug unod, kondili batok sa mga gobyerno, batok sa mga awtoridad, batok sa mga magmamando niining ngitngit nga kalibotan, batok sa daotang espiritung mga puwersa sa langit.” Aron magmadaogon ta dapig kang Jehova, dili ta angayng mosurender, hinuon kanunay natong isul-ob ang kompletong espirituwal nga armadura. Kita kinahanglang ‘lig-ong mobarog batok sa mga lit-ag’ sa Yawa. (Efe. 6:10-17) Busa kinahanglan gyod tang molahutay.

UGMARA ANG PAGKAMALAHUTAYON

⁷ Ang paglahutay mao “ang katakos sa pagsagubang sa kalisdanan o kasakitan.” Sa espirituwal nga diwa, ang paglahutay nagtumong sa determinasyon nga himoon kon unsay matarong bisan pa sa kalisdanan, pagsupak, paglutos, o uban pang paagi nga ang katuyoan mao ang pagbungkag sa atong integridad sa Diyos. Ang Kristohanong pagkamalahutayon kinahanglang ugmaron. Kini nagkinahanglag panahon. Ang atong katakos sa paglahutay mouswag samtang kita nag-uswag sa espirituwal. Pinaagi sa paglahutay sa ginagmayng pagsulay sa atong pagtuo sa bag-o pa kita sa kamatuoran, kita mas molig-on, nga makalahutay sa mas lisod nga mga pagsulay nga seguradong moabot. (Luc. 16:10) Mas maayo nga dili ta maghulat nga moabot ang dagkong pagsulay ayha pa ta modesisyong mobarog nga lig-on sa atong pagtuo. Kinahanglang determinado na ta nga magpabiling lig-on sa dili pa moabot ang pagsulay. Sa pagpasiugda nga kinahanglang ugmaron ang pagkamalahutayon ug ang uban pang diyosnong hiyas, si apostol Pedro misulat: “Paningkamoti pag-ayo nga idugang sa inyong pagtuo ang pagkamaayo, sa inyong pagkamaayo ang kahibalo, sa inyong kahibalo ang pagpugong sa kaugalingon, sa inyong pagpugong sa kaugalingon ang paglahutay, sa inyong paglahutay ang debosyon sa Diyos, sa inyong debosyon sa Diyos ang inigsoong pagmahal, sa inyong inigsoong pagmahal ang gugma.”​—2 Ped. 1:5-7; 1 Tim. 6:11.

⁸ Ang kaimportante sa pag-ugmad sa pagkamalahutayon gipasiugda ni Santiago diha sa iyang sulat: “Mga igsoon ko, ikalipay ninyo pag-ayo kon makaatubang mog lainlaing pagsulay, kay nahibalo mo nga kining sinulayang kalidad sa inyong pagtuo moresultag pagkamalahutayon. Apan ipatapos sa pagkamalahutayon ang katuyoan niini, aron nga mahimo mong bug-os ug maayo sa tanang bahin, nga dili makulangan sa bisan unsa.” (Sant. 1:2-4) Si Santiago miingon nga angayng dawaton ug ikalipay sa mga Kristohanon ang mga pagsulay kay kini makatabang nato sa pag-ugmad sa pagkamalahutayon. Ingon ana ba sab ang imong panglantaw? Dayon gipakita ni Santiago nga ang pagkamalahutayon makatabang aron mahingpit ang atong Kristohanong personalidad ug mahimo tang bug-os nga dalawaton sa Diyos. Oo, ang atong pagkamalahutayon ginapalig-on matag adlaw samtang atong giatubang ug gisagubang ang mga pagsulay. Sa baylo, ang pagkamalahutayon mopatunghag ubang maayong hiyas nga atong gikinahanglan.

⁹ Ang atong pagkamalahutayon makapalipay kang Jehova; kini magpalihok niya nga ihatag kanato ang ganti nga kinabuhing walay kataposan. Si Santiago dugang nga miingon: “Malipayon ang tawo nga padayong milahutay ubos sa pagsulay, kay dihang mabatonan niya ang pag-uyon madawat niya ang korona sa kinabuhi, nga gisaad ni Jehova niadtong padayong nahigugma Kaniya.” (Sant. 1:12) Oo, molahutay ta kay nagdepende niini ang atong kinabuhi. Kon dili ta molahutay, dili ta makapabilin sa kamatuoran. Kon magpadaog ta sa mga presyur sa kalibotan, madala ta pabalik sa kalibotan. Kon dili ta molahutay, mawala kanato ang espiritu ni Jehova ug busa dili na nato mapatungha ang bunga niini diha sa atong kinabuhi.

¹⁰ Aron padayon tang makalahutay niining lisod nga panahon, kinahanglang ugmaron nato ang hustong panglantaw sa pag-antos ingong mga Kristohanon. Hinumdomi nga si Santiago misulat: “Ikalipay ninyo pag-ayo kon makaatubang mog lainlaing pagsulay.” Tingali dili kana sayon kay lagmit apil niana ang pisikal o mental nga pag-antos. Pero hinumdomi nga nagdepende niana ang imong kinabuhi sa umaabot. Ang kasinatian sa mga apostoles makatabang nato kon sa unsang paagi ta magmalipayon bisan sa mga pag-antos. Ang asoy makita sa basahon sa Mga Buhat, nga nag-ingon: “Gipatawag nila ang mga apostoles, gibunalan sila, ug gibaoran nga mohunong na sa pagsulti pinasukad sa ngalan ni Jesus, ug gibuhian sila. Busa migawas sila sa Sanhedrin, nga nagsadya kay giisip sila nga takos pakaulawan tungod sa iyang ngalan.” (Buh. 5:40, 41) Nasabtan sa mga apostoles nga ang ilang pag-antos maoy pamatuod nga sila nagsunod sa sugo ni Jesus ug nga sila giuyonan ni Jehova. Katuigan sa ulahi, sa dihang gisulat ni Pedro ang iyang unang sulat, iyang gihisgotan ang bili sa maong pag-antos alang sa pagkamatarong.​—1 Ped. 4:12-16.

¹¹ Si Pablo ug Silas nakaagom sab ug mga pag-antos. Dihang nag-alagad ingong mga misyonaryo sa Filipos, sila gidakop ug gipasakaag sumbong nga ilang gitugaw ang siyudad ug nga sila nagmantalag mga kostumbreng dili subay sa balaod. Tungod niana, sila gibunalan pag-ayo ug gibilanggo. Ang asoy sa Bibliya nag-ingon nga samtang didto pa sila sa bilanggoan ug wala pa matambali ang ilang mga samad, “sa mga tungang gabii, si Pablo ug Silas nag-ampo ug nagdayeg sa Diyos pinaagig awit, ug ang mga binilanggo naminaw kanila.” (Buh. 16:16-25) Giisip ni Pablo ug Silas nga ang ilang pag-antos tungod sa Kristo dili lang pamatuod sa ilang integridad atubangan sa Diyos ug sa mga tawo kondili paagi sab kini nga makahatag ug dugang nga pamatuod niadtong gustong mamati sa maayong balita. Nalangkit niini ang kinabuhi sa uban. Niadtong gabhiona, ang guwardiya sa bilanggoan ug ang iyang panimalay namati ug nahimong tinun-an. (Buh. 16:26-34) Si Pablo ug Silas misalig kang Jehova, sa iyang gahom, ug sa iyang pagkaandam motabang kanila sa ilang mga pag-antos. Wala gyod sila mahigawad.

¹² Karon sab, si Jehova nagtagana sa tanan natong gikinahanglan aron palig-onon ta panahon sa pagsulay. Gusto niya nga makalahutay ta. Iyang gihatag kanato ang iyang Pulong aron makabaton tag tukmang kahibalo bahin sa iyang katuyoan. Kini nagpalig-on sa atong pagtuo. Duna tay kahigayonan nga makig-uban sa mga isigkamagtutuo ug makahatag ug sagradong pag-alagad. Duna sab tay pribilehiyo nga magpabiling suod kang Jehova pinaagi sa pag-ampo. Siya mamati sa atong mga pagdayeg ug sinserong mga hangyo nga tabangan ta sa paghupot ug hinlong baroganan sa iyang atubangan. (Filip. 4:13) Dugang pa, makabaton sab tag kusog pinaagi sa pagpamalandong sa paglaom nga gibutang sa atong atubangan.​—Mat. 24:13; Heb. 6:18; Pin. 21:1-4.

PAGLAHUTAY SA LAINLAING PAGSULAY

¹³ Ang mga pagsulay nga atong giatubang karon susama ra sa gisagubang sa unang mga tinun-an ni Jesu-Kristo. Sa modernong panahon, ang mga Saksi ni Jehova nag-antos sa berbal ug pisikal nga pag-abuso sa mga magsusupak nga dunay sayop nga impormasyon bahin kanato. Sama sa panahon sa mga apostoles, kadaghanan niini nga mga pagsupak nahitabo tungod sa pagpanulsol sa mga panatiko sa relihiyon kansang bakak nga mga pagtulon-an ug buhat giyagyag sa Pulong sa Diyos. (Buh. 17:5-9, 13) Usahay, ang katawhan ni Jehova makadawat ug tabang pinaagi sa pagdangop sa korte alang sa ilang legal nga mga katungod nga gigarantiya sa gobyerno. (Buh. 22:25; 25:11) Pero duna poy mga magmamando nga nagdili sa atong buluhaton aron pahunongon ang atong Kristohanong ministeryo. (Sal. 2:1-3) Bisan pa sa maong mga kahimtang, maisogon natong gisunod ang panig-ingnan sa matinumanong mga apostoles, nga miingon: “Kinahanglan namong sugton ang Diyos ingong magmamando imbes ang mga tawo.”​—Buh. 5:29.

¹⁴ Samtang nagkagrabe ang nasyonalismo sa tibuok yuta, nagkagrabe sab ang mga presyur nga nasinatian sa mga magsasangyaw sa maayong balita aron dili na nila ipadayon ang ministeryo nga gisugo sa Diyos kanila. Mas naapresyar sa tanang alagad sa Diyos ang pasidaan sa Pinadayag 14:9-12 bahin sa pagsimba sa “pintas nga mananap ug sa larawan niini.” Nakita gyod nato ang kahinungdanon sa gisulti ni Juan: “Nagkinahanglan kinig paglahutay sa bahin sa mga balaan, kadtong mga nagsunod sa mga sugo sa Diyos ug nangupot pag-ayo sa pagtuo diha kang Jesus.”

¹⁵ Tungod sa mga pagsulay nga ipahinabo sa gubat, rebolusyon, o mga paglutos ug pagdili sa gobyerno, tingali imposible na para nimo ang paghimo sa Kristohanong pagsimba nga may kagawasan. Tingali dili na mo makatigom ingong kongregasyon. Lagmit maputol na ang komunikasyon ngadto sa sangang buhatan. Ang mga tigdumala sa sirkito basin dili na makaduaw sa mga kongregasyon. Lagmit dili na moabot ang mga publikasyon. Kon mahitabo kini, unsay angay nimong himoon?

¹⁶ Ang tubag: Himoa ang kutob sa imong maarangan bisan pa sa maong mga kahimtang. Makahimo gihapon ka sa personal nga pagtuon. Sagad, ang ginagmayng grupo puwedeng magtigom para magtuon sa pribadong mga balay. Ang mga publikasyon nga gitun-an kaniadto ug ang Bibliya puwedeng gamiton sa pagtuon para sa mga tigom. Ayawg kabalaka o katarantar. Ang Nagamandong Lawas sagad makakita dayon ug paagi sa pagkontak sa responsableng mga brader.

¹⁷ Bisag mahimulag ka sa tanang igsoon, hinumdomi nga wala ka mahimulag kang Jehova ug sa iyang Anak, si Jesu-Kristo. Ang imong paglaom magpabiling lig-on kay dunggon gihapon ni Jehova ang imong mga pag-ampo, ug lig-onon ka niya pinaagi sa iyang espiritu. Pag-ampo alang sa giya. Hinumdomi nga alagad ka ni Jehova ug tinun-an ni Jesu-Kristo. Busa pahimusli ang mga kahigayonan sa pagpamatuod. Panalanginan ni Jehova ang imong mga paningkamot, ug basin sa ulahi ang uban moduyog kanimo sa matuod nga pagsimba.​—Buh. 4:13-31; 5:27-42; Filip. 1:27-30; 4:6, 7; 2 Tim. 4:16-18.

¹⁸ Pero kon nameligro ang imong kinabuhi, sama sa mga apostoles ug uban pa, salig “sa Diyos nga nagabanhaw sa mga patay.” (2 Cor. 1:8-10) Ang imong pagtuo sa iyang tagana nga pagkabanhaw makatabang nimo sa paglahutay bisan pa sa kinagrabehang pagsupak. (Luc. 21:19) Si Kristo Jesus maoy panig-ingnan nato; siya nahibalo nga ang iyang pagkamatinumanon bisan sa mga pagsulay makadasig sa uban sa paglahutay. Puwede pod kang mahimong panig-ingnan sa kaisog alang sa imong mga igsoon.​—Juan 16:33; Heb. 12:2, 3; 1 Ped. 2:21.

¹⁹ Gawas pa sa paglutos ug pagsupak, tingali duna pay ubang kalisdanan nga imong naagoman. Pananglitan, ang pipila naluya kay ang mga tawo sa ilang teritoryo dili interesado. Ang uban nag-antos tungod sa pisikal o emosyonal nga sakit o limitasyon tungod sa pagkatawhanon. Si apostol Pablo sab nagsagubang ug usa ka matang sa pagsulay nga nakababag o nakapalisod usahay sa iyang pag-alagad. (2 Cor. 12:7) Si Epafrodito sab, usa ka Kristohanon nga taga-Filipos niadtong unang siglo, ‘naguol pag-ayo kay nadunggan [sa iyang mga higala] nga nasakit siya.’ (Filip. 2:25-27) Ang atong pagkadili-hingpit ug nianang sa uban lagmit mopatunghag mga problema nga makapalisod nato sa paglahutay. Tingali motungha ang mga problema tungod sa lainlaing personalidad sa mga Kristohanon o bisan sulod sa pamilya. Pero makaya ra ug mabuntog ang maong mga problema pinaagi sa pagsunod sa tambag sa Pulong ni Jehova.​—Ezeq. 2:3-5; 1 Cor. 9:27; 13:8; Col. 3:12-14; 1 Ped. 4:8.

DETERMINADO NGA MAGPABILING MATINUMANON

²⁰ Kinahanglang mounong ta kang Jesu-Kristo, ang gitudlo ni Jehova ingong Ulo sa kongregasyon. (Col. 2:18, 19) Kinahanglang mokooperar ta pag-ayo sa “matinumanon ug maalamong ulipon” ug sa tinudlong mga tigdumala. (Heb. 13:7, 17) Pinaagi sa pagsunod pag-ayo sa teokratikanhong mga kahikayan ug pagkooperar niadtong nanguna, kita mahimong organisado sa pagbuhat sa kabubut-on ni Jehova. Kinahanglang bug-os natong pahimuslan ang pribilehiyo sa pag-ampo. Hinumdomi, bisan ang mga paril sa prisohan o bartolina dili makaputol sa atong komunikasyon sa atong mahigugmaong langitnong Amahan o makabungkag sa atong panaghiusa uban sa atong mga isigkamagsisimba.

²¹ Uban ang determinasyon ug pagkamalahutayon, himoon nato ang kutob sa atong maarangan sa pagtuman sa buluhatong pagsangyaw, nga magpadayon sa paghimo sa gisugo sa gibanhawng si Jesu-Kristo ngadto sa iyang mga sumusunod: “Adtoa ninyo ang mga tawo sa tanang kanasoran ug tudloi sila aron mahimong akong mga tinun-an. Bawtismohi sila sa ngalan sa Amahan ug sa Anak ug sa balaang espiritu. Tudloi ninyo sila sa pagtuman sa tanan nakong gisugo kaninyo.” (Mat. 28:19, 20) Sama kang Jesus, molahutay ta. Hinaot kanunayng tin-aw sa atong hunahuna ang paglaom sa Gingharian ug ang kahigayonan nga mabuhi sa walay kataposan. (Heb. 12:2) Ingong bawtismadong tinun-an sa Kristo, duna tay pribilehiyo nga makaambit sa katumanan sa tagna ni Jesus bahin sa “hinapos sa sistema sa mga butang.” Siya miingon: “Kining maayong balita sa Gingharian isangyaw sa tibuok yuta sa pagpamatuod ngadto sa tanang kanasoran, ug unya moabot ang kataposan.” (Mat. 24:3, 14) Kon tibuok kasingkasing natong himoon ang maong buluhaton karon, matagamtam nato ang kalipay nga mabuhi sa walay kataposan sa matarong nga bag-ong kalibotan ni Jehova!