Apendise

Mensahe Alang sa Kristohanong mga Ginikanan:

Ingong ginikanan, gusto nimong tabangan ang imong pinalanggang mga anak nga higugmaon si Jehova ug idedikar ang ilang kaugalingon kaniya. Unsay puwede nimong buhaton aron maandam sila para sa bawtismo? Kanus-a sila mahimong andam sa paghimo niining importanteng desisyon?

Gisugo ni Jesus ang iyang mga sumusunod: “Adtoa ninyo ang mga tawo sa tanang kanasoran ug tudloi sila aron mahimong akong mga tinun-an. Bawtismohi sila.” (Mat. 28:19) Sumala niini, ang pangunang kuwalipikasyon para sa bawtismo mao ang pagkahimong tinun-an​—sa ato pa, ang usa dili lang kay basta nakasabot ug nagtuo sa mga pagtulon-an sa Kristo kondili nagsunod sab pag-ayo niini. Puwede ning himoon bisan sa mga bata.

Pagpakitag maayong ehemplo sa imong mga anak, ug isilsil kanila ang mga pagtulon-an ni Jehova. (Deut. 6:6-9) Lakip niini ang paggamit sa impormasyon sa librong Mabuhi Ka Hangtod sa Hangtod! sa pagtudlo kanila sa pangunang mga kamatuoran sa Bibliya ug sa pagpangatarongan gamit ang mga prinsipyo sa Bibliya ug pagpadapat niini. Tabangi ang imong mga anak nga makapatin-aw sa ilang pagtuo sa kaugalingon nilang mga pulong. (1 Ped. 3:15) Ang kahibalo ug pagdasig nga ilang madawat gikan nimo ug sa personal nga pagtuon, pamilyahanong pagsimba, mga tigom, ug sa maayong mga kauban motabang nila nga mokuwalipikar sa bawtismo ug padayong mouswag. Tabangi sila kanunay nga mangab-ot ug espirituwal nga mga tumong.

Ang Proverbio 20:11 nag-ingon: “Bisan ang bata mailhan tungod sa iyang binuhatan, kon ang iya bang binuhatan matarong ug husto.” Unsay pipila ka ilhanan nga ang bata, lalaki man o babaye, nahimo nang tinun-an ni Jesu-Kristo ug andam nang magpabawtismo?

Ang bata nga nagauswag ug andam nang magpabawtismo kinahanglang masinugtanon sa iyang (mga) ginikanan. (Buh. 5:29; Col. 3:20) Dihang si Jesus 12 anyos, ang Bibliya nag-ingon nga siya “padayong nagpasakop [sa iyang ginikanan].” (Luc. 2:51) Siyempre, dili ka magdahom ug kahingpitan sa imong anak. Pero ang usa nga gusto nang magpabawtismo maningkamot sa pagsunod sa panig-ingnan ni Jesus ug sa pagpasakop sa iyang mga ginikanan.

Siya magpakita sab ug interes sa pagkat-on sa mga kamatuoran sa Bibliya. (Luc. 2:46) Ang imo bang anak gustong motambong ug makigbahin sa mga tigom? (Sal. 122:1) Ganahan ba siya sa paggahin ug panahon alang sa regular nga pagbasa sa Bibliya ug personal nga pagtuon?​—Mat. 4:4.

Ang bata nga hapit nang magpabawtismo maningkamot nga unahon ang Gingharian. (Mat. 6:33) Nahibalo siya sa iyang responsibilidad nga isulti ngadto sa uban ang iyang pagtuo. Siya makigbahin sa lainlaing paagi sa ministeryo ug dili maulaw nga mopaila sa iyang mga titser ug eskolmet nga siya Saksi ni Jehova. Iyang pabilhan ug pangandaman pag-ayo ang iyang mga bahin sa Tigom nga Kinabuhi ug Ministeryo.

Siya maningkamot sab nga magpabiling hinlo sa moral pinaagi sa paglikay sa daotang pakig-uban. (Prov. 13:20; 1 Cor. 15:33) Makita kini diha sa iyang pagpilig musika, salida, programa sa telebisyon, video game, ug paggamit sa Internet.

Daghan ang miapresyar sa kugi nga paningkamot sa ilang ginikanan, midawat sa kamatuoran, ug mikuwalipikar sa bawtismo bisag batan-on pa. Hinaot panalanginan mo ni Jehova samtang inyong tabangan ang inyong mga anak sa pagkab-ot niining importante kaayong bahin sa ilang relasyon kang Jehova.

Mensahe Alang sa Dili Bawtismadong Magmamantala:

Usa ka pribilehiyo ang pag-alagad sa kongregasyon ingong dili bawtismadong magmamantala. Angay kang komendahan tungod sa imong espirituwal nga pag-uswag. Nakaila na ka sa Diyos pinaagi sa imong pagtuon sa iyang Pulong ug nagtuo na sa iyang mga saad.​—Juan 17:3; Heb. 11:6.

Sa wala pa ka magtuon uban sa mga Saksi ni Jehova, tingali naa kay kalangkitan sa laing relihiyon o basin wala gyod kay relihiyon. Lagmit may ginahimo ka kaniadto nga supak sa mga prinsipyo sa Bibliya. Pero karon gipakita na nimo ang imong pagtuo pinaagi sa paghinulsol (sinserong pagbasol sa nangaging kasaypanan) ug pagkombertir (pagtalikod sa sayop nga binuhatan ug pagbuhat kon unsay matarong sa panglantaw sa Diyos).​—Buh. 3:19.

Sa laing bahin, lagmit nahibalo ka sa balaang mga sinulat “sukad sa imong pagkatawo.” Busa napanalipdan ka gikan sa dili Kristohanong panggawi ug seryosong mga sala. (2 Tim. 3:15) Nakakat-on ka sa pagsukol sa presyur sa ubang batan-on ug sa uban pang tentasyon nga mohimog daotan sa mga mata ni Jehova. Nagpakita na kag pagtuo pinaagi sa pagdapig sa matuod nga pagsimba ug sa pagpaambit sa imong gituohan ngadto sa uban. Nabansay na ka sa Kristohanong ministeryo. Karon nakadesisyon na ka sa pag-alagad kang Jehova ingong dili bawtismadong magmamantala.

Nakakat-on man ka sa kamatuoran dihang dako na ka o nakakat-on bahin kang Jehova sukad sa imong pagkatawo, tingali naghunahuna ka karon sa duha pa ka lakang aron mouswag sa espirituwal​—ang dedikasyon ug bawtismo. Idedikar nimo ang imong kaugalingon kang Jehova pinaagi sa pag-ampo ug pagpahayag sa imong desisyon nga ihatag kaniya ang eksklusibong debosyon hangtod sa hangtod. (Mat. 16:24) Ang imong dedikasyon simbolohan pinaagi sa bawtismo sa tubig. (Mat. 28:19, 20) Pinaagi sa dedikasyon ug bawtismo, ikaw mahimong ordinadong ministro ni Jehova nga Diyos. Pagkadakong pribilehiyo!

Pero sumala sa imong nakat-onan sa pagtuon sa Bibliya, posibleng makasinati kag lainlaing pagsulay. Hinumdomi nga wala madugay human siya mabawtismohi, “si Jesus gidala sa espiritu sa Diyos ngadto sa kamingawan. Didto, gitental siya sa Yawa.” (Mat. 4:1) Human sa imong bawtismo ingong tinun-an sa Kristo, makadahom ka ug dugang nga mga pagsulay. (Juan 15:20) Tingali lainlain kini nga pagsulay. Lagmit supakon ka sa imong pamilya. (Mat. 10:36) Basig biaybiayon ka sa imong mga eskolmet, kauban sa trabaho, ug kanhing mga higala. Hinumdomi kanunay ang giingon ni Jesus sa Marcos 10:29, 30: “Sa pagkatinuod sultihan mo nako, kadtong mibiya sa iyang balay o mga igsoon o inahan o amahan o mga anak o kaumahan tungod kanako ug sa maayong balita, makabaton karon ug 100 ka pilo niini​—mga balay, igsoon, inahan, anak, ug kaumahan, uban ang mga paglutos—​ug sa umaabot nga sistema sa mga butang, kinabuhing walay kataposan.” Busa paningkamot pag-ayo nga magpabiling suod kang Jehova ug magkinabuhi subay sa iyang matarong nga mga sukdanan.

Kon gusto na kang magpabawtismo, pahibaloa ang koordinetor sa mga ansiyano. Ang mosunod nga mga pangutana human niini nga mensahe maghatag sa mga ansiyano ug basehanan sa pagpakighisgot uban nimo aron matino kon kuwalipikado ba ka para sa bawtismo. Puwede nimong sugdan sa pagrepaso kining mga pangutanaha ingong bahin sa imong regular nga eskedyul sa personal nga pagtuon.

Aron maandam ka niini nga panaghisgot, gahinig panahon ang pagbasa ug pagpamalandong sa gikutlo nga mga teksto sa Bibliya. Puwede kang maghimog personal nga nota niini nga libro o bisan asa nga gusto nimo. Mahimo nimong gamiton kana nga mga nota ug kini nga libro panahon sa pagpakighisgot sa mga ansiyano uban nimo. Kon may pangutana nga wala nimo masabti, ayawg kaulaw nga mangayog tabang sa nag-Bible study nimo o sa mga ansiyano.

Sa inyong panaghisgot uban sa mga ansiyano, ayawg hunahunaa nga kinahanglan kang mohatag ug taas o komplikado nga mga tubag. Ang simple ug direktang tubag sa imong kaugalingong mga pulong mao ang pinakamaayong tubag. Diha sa daghang pangutana, mas maayo pod kon mogamit kag usa o duha ka teksto sa Bibliya nga mosuportar sa imong tubag.

Kon kulang pa ang imong kahibalo sa pangunang mga pagtulon-an sa Bibliya, hikayon sa mga ansiyano nga matabangan ka aron mapatin-aw nimo sa imong kaugalingong mga pulong ang hustong pagsabot sa Kasulatan ug mokuwalipikar sa bawtismo sa sunod higayon.

[Pahinumdom sa mga ansiyano sa kongregasyon: Ang mga instruksiyon sa pagpakighisgot uban sa kandidato sa bawtismo makita sa panid 208-212.]