Sulat Gikan sa Nagamandong Lawas

Minahal nga mga Isigkamagmamantala sa Maayong Balita:

Pagkatalagsaong pribilehiyo nga nagkahiusa ta sa pagsimba sa bugtong matuod nga Diyos, si Jehova! Kita iyang “mga isigkamagbubuhat,” nga gipiyalan sa sagrado ug makaluwas ug kinabuhi nga buluhaton​—ang pagsangyaw ug pagtudlo sa maayong balita sa iyang natukod na nga Gingharian. (1 Cor. 3:9; Mat. 28:19, 20) Aron matuman nato kining tibuok kalibotang buluhaton uban ang kalinaw ug panaghiusa, kita kinahanglang organisado gayod.​—1 Cor. 14:40.

Kini nga libro makatabang nimo nga masabtan ang mga kalihokan sa Kristohanong kongregasyon karon. Hisgotan niini ang imong mga pribilehiyo ug responsibilidad ingong Saksi ni Jehova. Kon imong pabilhan ang imong mga pribilehiyo ug tumanon ang imong mga responsibilidad, mahimo kang ‘lig-on diha sa pagtuo.’​—Buh. 16:4, 5; Gal. 6:5.

Busa gidasig ka namo nga tun-an pag-ayo kining libroha. Pangitag mga paagi nga mapadapat nimo ang impormasyon sa imong kinabuhi. Pananglitan, kon bag-o kang nahimong dili bawtismadong magmamantala, unsang mga lakang ang kinahanglan nimong himoon aron mabawtismohan ingong Saksi ni Jehova? Sa laing bahin, kon bawtismado na ka, unsa pay imong himoon aron mohamtong sa espirituwal ug mouswag sa pag-alagad kang Jehova? (1 Tim. 4:15) Unsay imong ikaamot sa kalinaw sa kongregasyon? (2 Cor. 13:11) Pangitaa ang mga tubag niana nga mga pangutana niini nga libro.

Kon ikaw bawtismadong brader, unsay imong himoon aron mokuwalipikar ingong ministeryal nga alagad ug sa ulahi ingong ansiyano? Samtang libolibong bag-ohan ang padayong nagpanon paingon sa organisasyon sa Diyos, dunay dinaliang panginahanglan alang sa kuwalipikadong mga brader nga manguna. Kining libroha makatabang nimo aron imong mahibaloan ang mga kinahanglanon sa ‘pagkab-ot’ niining espirituwal nga mga tumong.​—1 Tim. 3:1.

Kinasingkasing namong giampo nga kining libroha makatabang nimo nga masabtan ang imong papel sa kahikayan ni Jehova ug pabilhan kini. Kamong tanan gimahal namo pag-ayo ug padayon ming nag-ampo nga maapil mo niadtong malipayong magsimba sa atong langitnong Amahan, si Jehova, sa walay kataposan.​—Sal. 37:10, 11; Isa. 65:21-25.