Sa Unsang Paagi Ka Mahimong Higala sa Diyos?

1, 2. Kinsa ang pipila sa mga higala ni Jehova?

KINSAY gusto nimong mahimong higala? Siyempre, kanang ganahan ka, magkasinabot mo, buotan, ug maayog kinaiya.

² Si Jehova nagpilig mga tawo nga mahimo niyang mga higala. Usa kanila mao si Abraham. (Isaias 41:8; Santiago 2:23) Higala sab ni Jehova si David. Siya miingon nga si David ‘usa ka tawo nga gikahimut-an sa iyang kasingkasing.’ (Buhat 13:22) Ug ang propetang si Daniel “gimahal pag-ayo” ni Jehova.​—Daniel 9:23.

3. Nganong nahimong higala ni Jehova si Abraham, David, ug Daniel?

³ Nganong nahimong higala ni Jehova si Abraham, David, ug Daniel? Si Jehova miingon kang Abraham: “Gituman nimo ang akong gisulti.” (Genesis 22:18) Si Jehova mahimong higala sa mapainubsanong mosunod kaniya. Bisan ang tibuok nasod puwedeng mahimong higala ni Jehova. Giingnan niya ang nasod sa Israel: “Pamatia ninyo ang akong tingog, ug ako mahimong inyong Diyos, ug kamo mahimong akong katawhan.” (Jeremias 7:23) Busa kon gusto gyod nimong mahimong higala ni Jehova, kinahanglan nimo siyang sundon.

PROTEKSIYONAN NI JEHOVA ANG IYANG MGA HIGALA

4, 5. Sa unsang paagi giproteksiyonan ni Jehova ang iyang mga higala?

⁴ Ang Bibliya nag-ingon nga si Jehova nangitag paagi “aron ipakita ang iyang kusog alang niadtong kansang kasingkasing bug-os alang kaniya.” (2 Cronicas 16:9) Sa Salmo 32:8, gisaaran ni Jehova ang iyang mga higala: “Hatagan ka nakog lawom nga pagsabot ug tudloan sa dalan nga angay nimong laktan. Tambagan ka nako samtang nagatan-aw ko kanimo.”

⁵ Dunay usa ka gamhanang kaaway nga dili gustong mahimo tang higala sa Diyos. Pero proteksiyonan ta ni Jehova. (Basaha ang Salmo 55:22.) Ingong higala ni Jehova, tibuok kasingkasing tang nag-alagad kaniya. Maunongon ta kaniya bisan pa sa mga kalisdanan. Ug masaligon ta sama sa salmista nga misulat bahin kang Jehova: “Kay ania siya sa akong tuong kamot, dili gyod ko matarog.” (Salmo 16:8; 63:8) Unsay gihimo ni Satanas aron dili ta mahimong higala sa Diyos?

AKUSASYON NI SATANAS

6. Unsay giingon ni Satanas bahin sa mga tawo?

⁶ Sa Kapitulo 11, nakat-onan nato nga gihagit ni Satanas si Jehova ug giakusahan nga bakakon ug dili patas kay wala niya tugoti si Adan ug Eva nga modesisyon para sa ilang kaugalingon kon unsay husto ug sayop. Ang basahon sa Job nagtudlo nato nga giakusahan sab ni Satanas ang mga tawo nga gustong mahimong higala sa Diyos. Miingon si Satanas nga nag-alagad sila sa Diyos tungod lang sa ilang madawat gikan Kaniya, dili tungod sa ilang gugma Kaniya. Miingon pa gani si Satanas nga kaya niyang pahunongon si bisan kinsa sa pag-alagad sa Diyos. Atong susihon kon unsay atong makat-onan kang Job ug kon giunsa siya pagpanalipod ni Jehova.

7, 8. (a) Unsay giingon ni Jehova bahin kang Job? (b) Unsay giingon ni Satanas bahin kang Job?

⁷ Kinsa si Job? Usa siya ka maayong tawo nga nabuhi mga 3,600 ka tuig na ang milabay. Si Jehova miingon nga niadtong panahona wala gyoy sama kang Job dinhi sa yuta. Gitahod niya pag-ayo ang Diyos ug gidumtan ang pagkadaotan. (Job 1:8) Si Job tinuod gyod nga higala ni Jehova.

⁸ Si Satanas miingon nga nag-alagad si Job sa Diyos tungod lang sa mga panalangin. Giingnan ni Satanas si Jehova: “Dili ba imo man siyang gipanalipdan ug ang iyang pamilya ug ang tanan niyang gipanag-iya? Imong gipanalanginan ang tanan niyang ginahimo, ug ang iyang kahayopan midaghan pag-ayo. Apan bakyawa ang imong kamot ug hampaka ang tanan niyang nabatonan, ug tan-awon nato kon dili ba ka niya tunglohon sa imong nawong mismo.”​—Job 1:10, 11.

9. Unsay gitugot ni Jehova nga buhaton ni Satanas?

⁹ Giakusahan ni Satanas si Job nga nag-alagad siya kang Jehova tungod lang sa mga panalangin nga iyang madawat. Miingon sab si Satanas nga kaya niyang pahunongon si Job sa pag-alagad kang Jehova. Wala mouyon si Jehova kang Satanas, pero gitugotan Niya si Satanas nga sulayan si Job aron makita kon gugma ba gyod ang iyang motibo sa pagpakighigala kang Jehova.

GISULAYAN NI SATANAS SI JOB

10. Sa unsang paagi gisulayan ni Satanas si Job, ug unsay reaksiyon ni Job?

¹⁰ Una, gikawat o gipatay ni Satanas ang tanang hayop ni Job. Dayon gipatay ni Satanas ang halos tanan niyang sulugoon. Nahurot ang kabtangan ni Job. Gipatay pa gyod ni Satanas ang 10 ka anak ni Job pinaagig kusog nga hangin. Pero nagmaunongon si Job kang Jehova. “Bisan pa sa tanan niyang nasinati, si Job wala makasala ug wala niya basola ang Diyos.”​—Job 1:12-19, 22.

11. (a) Unsa pay gihimo ni Satanas kang Job? (b) Unsay reaksiyon ni Job?

¹¹ Wala mohunong si Satanas. Gihagit niya ang Diyos: “Hampaka ang iyang bukog ug unod, ug tan-awon nato kon dili ba ka niya tunglohon sa imong nawong mismo.” Busa gihampak ni Satanas si Job ug ngutngot kaayong sakit. (Job 2:5, 7) Pero si Job maunongon gihapon kang Jehova. Siya miingon: “Hangtod nga ako mamatay, dili gyod nako wad-on ang akong integridad!”​—Job 27:5.

12. Giunsa pagpamatuod ni Job nga bakakon si Satanas?

¹² Wala mahibalo si Job sa akusasyon ni Satanas o kon nganong nag-antos siya pag-ayo. Nagtuo siya nga si Jehova maoy hinungdan sa iyang mga problema. (Job 6:4; 16:11-14) Bisan pa niana, nagmaunongon gihapon si Job kang Jehova. Dili na gyod madudahan ang motibo ni Job. Wala siya maghunahuna sa iya rang kaugalingon. Higala siya ni Jehova kay gihigugma niya Siya. Bakak ang tanang akusasyon ni Satanas!

13. Unsay resulta sa pagkamaunongon ni Job?

¹³ Bisag wala mahibalo si Job kon unsay nahitabo didto sa langit, nagmaunongon siya sa Diyos ug gipamatud-an niya nga daotan si Satanas. Gigantihan ni Jehova ang iyang maunongong higala nga si Job.​—Job 42:12-17.

IKAW GIAKUSAHAN NI SATANAS

14, 15. Unsay akusasyon ni Satanas sa tanang tawo?

¹⁴ Makakat-on kag importanteng mga leksiyon sa nahitabo kang Job. Giakusahan ta karon ni Satanas nga nag-alagad lang ta kang Jehova tungod sa atong makuha Kaniya. Sa Job 2:4, si Satanas miingon: “Ang tawo maghatag sa tanan niyang nabatonan alang sa iyang kinabuhi.” Busa dili lang si Job ang giakusahan ni Satanas, kondili ang tanang tawo. Gatosan ka tuig human mamatay si Job, giinsulto gihapon ni Satanas si Jehova ug giakusahan ang Iyang mga alagad. Pananglitan, ang Proverbio 27:11 nag-ingon: “Magmaalamon ka, anak ko, ug lipaya ang akong kasingkasing, aron matubag nako siya nga nagatamay [o, nagainsulto] kanako.”

¹⁵ Kon sundon nimo si Jehova, mahimo ka niyang maunongong higala ug mapamatud-an nga bakakon si Satanas. Bisan pag kinahanglan kang mohimog dagkong kausaban sa kinabuhi aron mahimong higala sa Diyos, kini ang pinakamaayong desisyon nga imong mahimo! Importante ni nga desisyon. Si Satanas miingon nga dili ka magmaunongon sa Diyos kon dunay mga problema. Giilad ta niya aron dili ta makapabiling maunongon sa Diyos. Sa unsang paagi?

16. (a) Unsa ang mga paagi ni Satanas aron pugngan ta sa pag-alagad kang Jehova? (b) Unsa kahay gamiton sa Yawa aron pugngan ka sa pag-alagad kang Jehova?

¹⁶ Si Satanas naggamit ug lainlaing paagi aron dili ta mahimong higala sa Diyos. Moatake siya “samag leyon nga nagngulob, nga nangitag matukob.” (1 Pedro 5:8) Ayawg katingala dihang pugngan ka sa imong mga higala, pamilya, o sa uban sa pagtuon sa Bibliya ug sa paghimog maayo. Tingali mobati kang giatake na ka.a (Juan 15:19, 20) Si Satanas nagpakaaron-ingnon sab nga “anghel sa kahayag.” Busa ilaron ta niya aron supakon nato si Jehova. (2 Corinto 11:14) Naa pay laing paagi si Satanas. Patuohon ta niya nga dili ta angayang moalagad sa Diyos.​—Proverbio 24:10.

SUNDA ANG MGA SUGO NI JEHOVA

17. Nganong mosunod ta kang Jehova?

¹⁷ Dihang sundon nato si Jehova, gipamatud-an natong bakakon si Satanas. Unsay makatabang aron mahimo tang masinundanon? Ang Bibliya nag-ingon: “Higugmaa si Jehova nga imong Diyos sa bug-os mong kasingkasing, sa bug-os mong kalag, ug sa bug-os mong kusog.” (Deuteronomio 6:5) Mosunod ta kang Jehova kay gihigugma nato siya. Samtang modako ang atong gugma kang Jehova, mahimo tang mas determinado nga buhaton ang tanan niyang ipabuhat. Si apostol Juan misulat: “Kini ang kahulogan sa paghigugma sa Diyos, nga atong tumanon ang iyang mga sugo; ug dili bug-at ang iyang mga sugo.”​—1 Juan 5:3.

18, 19. (a) Unsa ang pipila ka butang nga gidumtan ni Jehova? (b) Nganong nahibalo ta nga si Jehova dili gyod maghatag ug sugo nga dili nato mahimo?

¹⁸ Pero unsa ang pipila ka butang nga gidumtan ni Jehova? Ang pananglitan niini naa sa kahon nga “Dumti Kon Unsay Gidumtan ni Jehova.” Tingali sa primero maghunahuna ka nga dili ra kaayo daotan ang pipila niini. Pero kon basahon nimo ang mga teksto sa Bibliya ug hunahunaon kini pag-ayo, imong masabtan kon nganong maayo gyod nga sundon ang mga balaod ni Jehova. Basig mobati sab ka nga kinahanglan kang mohimog mga kausaban. Usahay lisod ni, pero kon imo ning buhaton, mobati kag kalinaw ug kalipay kay nahimo kang maunongong higala sa Diyos. (Isaias 48:17, 18) Nganong makaseguro ta nga kaya natong himoon kini nga mga kausaban?

¹⁹ Si Jehova dili gyod maghatag ug sugo nga dili nato mahimo. (Deuteronomio 30:11-14) Ingong tinuod nga Higala, mas nakaila siya nato kay sa atong pagkaila sa atong kaugalingon. Nahibalo siya sa atong mga katakos ug limitasyon. (Salmo 103:14) Gidasig ta ni apostol Pablo: “Ang Diyos kasaligan, ug dili niya itugot nga tentalon mo nga labaw sa inyong maantos, apan uban sa tentasyon siya magtaganag kalingkawasan aron makalahutay mo niini.” (1 Corinto 10:13) Makasalig ta nga si Jehova kanunayng motabang nato aron mahimo nato kon unsay husto. Tagaan ka niyag “gahom nga labaw sa kasarangan” aron makalahutay sa lisod nga mga situwasyon. (2 Corinto 4:7) Human tabangi ni Jehova si Pablo sa lisod nga kahimtang, siya nakaingon: “Naa koy kusog sa pag-atubang sa tanang butang tungod kaniya nga naghatag nakog gahom.”​—Filipos 4:13.

HIGUGMAA KON UNSAY GIHIGUGMA NI JEHOVA

20. Unsa nga mga kinaiya ang angay nimong sundogon, ug ngano?

²⁰ Kon gusto natong mahimong higala ni Jehova, kinahanglang mohunong ta sa paghimo sa mga buhat nga gidumtan niya. Pero naa pa tay laing himoon. (Roma 12:9) Ang mga higala ni Jehova nahigugma kon unsay iyang gihigugma. Gihisgotan kini sa Salmo 15:1-5. (Basaha.) Ang mga higala ni Jehova nagsundog sa iyang mga kinaiya ug nagpakitag “gugma, kalipay, kalinaw, taas nga pailob, pagkabuotan, pagkamaayo, pagtuo, kalumo, ug pagpugong sa kaugalingon.”​—Galacia 5:22, 23.

21. Unsay makatabang aron mapakita nimo ang mga kinaiya nga gihigugma ni Jehova?

²¹ Unsay makatabang aron mapakita nimo ang maong nindot nga mga kinaiya? Kinahanglan kang mahibalo kon unsay gihigugma ni Jehova pinaagi sa pagbasa ug pagtuon kanunay sa Bibliya. (Isaias 30:20, 21) Kon imo nang himoon, modako ang imong gugma niya, ug samtang nagkadako ang maong gugma, mahimo kang determinado nga sundon siya.

22. Unsay resulta kon sundon nato si Jehova?

²² Ang mga kausaban nga kinahanglan nimong himoon mahimong ikomparar sa paghukas sa daang sinina ug pagsul-ob ug bag-o. Ang Bibliya nag-ingon nga kinahanglan nimong ‘hukason ang daang personalidad’ ug “isul-ob ang bag-ong personalidad.” (Colosas 3:9, 10) Dili tingali ni sayon, pero kon buhaton nato kini ug sundon si Jehova, siya nagsaad natog “dakong ganti.” (Salmo 19:11) Sunda si Jehova ug pamatud-i nga bakakon si Satanas. Alagara si Jehova tungod sa gugma, dili tungod sa bisan unsang ganti sa umaabot. Sa ingon, mahimo kang tinuod nga higala sa Diyos!