LEKSIYON 10
Unsay Kaayohan Kon Motambong Ka sa Tigom sa mga Saksi ni Jehova?
Naimbitar na ba ka sukad sa mga tigom sa mga Saksi ni Jehova? Kon wala pa ka makasulay ug tambong, basin makulbaan kang motambong. Tingali maghunahuna ka: ‘Unsa may ginahimo diha sa mga tigom? Nganong importante ang mga tigom? Nganong kinahanglan man kong motambong?’ Niini nga leksiyon, imong makat-onan kon sa unsang paagi ang pagtambong sa mga tigom makapasuod nimo sa Diyos ug makatabang nimo sa personal.
1. Unsa ang pinakaimportanteng rason nga magtigom?
Matikdi kon unsay giingon sa usa ka magsusulat sa Bibliya bahin sa pinakaimportanteng rason nga magtigom: “Dayegon nako si Jehova diha sa dakong kongregasyon.” (Salmo 26:12) Karon, ang mga Saksi ni Jehova malipay pod kaayong magtigom. Sa tibuok kalibotan, magtigom sila kada semana aron magdayeg sa Diyos, mag-awit, ug mag-ampo. Sa pipila ka higayon kada tuig, motambong pod sila ug dagkong tigom sa pagsimba.
2. Unsay imong makat-onan sa among mga tigom?
Sa mga tigom, magtudlo mi base sa Pulong sa Diyos, ‘nga magpatin-aw ug maghatag sa kahulogan niana.’ (Basaha ang Nehemias 8:8.) Sa among tigom, makakat-on ka bahin kang Jehova ug sa iyang nindot nga mga hiyas. Samtang magkalawom ang imong nahibaloan bahin sa iyang gugma kanimo, mas masuod ka kaniya. Mahibaloan pod nimo kon unsaon ka niya pagtabang nga mahimong malipayon.—Isaias 48:17, 18.
3. Sa unsang paagi ang mga tawo nga imong maestorya sa tigom makatabang nimo?
Si Jehova nag-ingon nga “hunahunaon nato ang usag usa aron magdinasigay sa pagpakitag gugma ug sa paghimog maayong mga buhat, nga dili pasagdan ang atong mga panagkatigom.” (Hebreohanon 10:24, 25) Sa among mga tigom, mailaila nimo ang mga tawo nga naay tinuod nga gugma sa usag usa, ug parehas nimo, sila interesado sa pagkat-on ug dugang bahin sa Diyos. Madungog nimo sila nga mosultig makapadasig nga mga pulong gikan sa Bibliya. (Basaha ang Roma 1:11, 12.) Mailaila pod nimo ang mga dalaga, ulitawo, ug mga minyo nga malipayon bisag naay mga problema. Pipila lang ni sa mga rason kon nganong gusto ni Jehova nga regular tang motambong sa mga tigom!
TUN-IG DUGANG
Sayra kon unsay ginahimo diha sa mga tigom sa mga Saksi ni Jehova ug kon nganong makabenepisyo ta kon maningkamot ta sa pagtambong.
4. Mga tigom sa mga Saksi ni Jehova
Sa unang siglo, ang mga Kristohanon regular nga nagtigom sa pagsimba kang Jehova. (Roma 16:3-5) Basaha ang Colosas 3:16, ug dayon hisgoti kini nga pangutana:
Sa unsang paagi ang unang mga Kristohanon nagsimba kang Jehova?
Karon, ang mga Saksi regular pod nga nagtigom sa Kingdom Hall. Aron imong makita kon unsay ginahimo sa ilang mga tigom, i-play ang VIDEO. Dayon, tan-awa ang hulagway sa tigom sa kongregasyon ug hisgoti ang mosunod nga mga pangutana:
Unsay imong namatikdan sa imong nabasa sa Colosas 3:16 nga ginahimo pod diha sa Kingdom Hall?
Diha sa video o sa hulagway, naa pa ba kay laing namatikdan nga nagustohan nimo bahin sa mga tigom?
Basaha ang 2 Corinto 9:7, ug dayon hisgoti kini nga pangutana:
Nganong walay pagpangolektag kuwarta diha sa tigom sa mga Saksi ni Jehova?
Sa tabang sa nag-Bible study nimo, tan-awa kon unsay hisgotan sa sunod nga tigom.
Para nimo, unsang bahin sa tigom ang makapainteres kaayo o makahatag ug kaayohan nimo?
Nahibalo ba ka?
Sa jw.org, imong mahibaloan kon asa ug kanus-a ginahimo ang mga tigom sa tibuok kalibotan.
Ang among mga tigom naay pakigpulong, pasundayag, ug video. Ang mga tigom sugdan ug taposon pinaagig awit ug pag-ampo
Sa pipila ka bahin sa programa, ang nanambong puwedeng mokomento
Ang tanan puwedeng motambong—mga pamilya, dalaga, ulitawo, tigulang, ug mga bata
Ang among mga tigom libre. Ang mga Saksi ni Jehova dili mangolektag kuwarta sa mga nanambong
5. Ang pagtambong ug tigom nagkinahanglag paningkamot
Matikdi ang ehemplo sa pamilya ni Jesus. Kada tuig, kinahanglan silang molakaw ug mga 100 ka kilometro agi sa kabukiran gikan sa Nasaret paingon sa Jerusalem aron moadto sa templo. Basaha ang Lucas 2:39-42, ug dayon hisgoti kini nga mga pangutana:
Sa imong hunahuna, kini ba nga biyahe padulong sa Jerusalem nagkinahanglan ug paningkamot?
Sa imong bahin, ngano tingaling nagkinahanglan ug paningkamot ang pagtambong ug tigom?
Sa imong hunahuna, maayo kahang motambong sa tigom bisag lisod ning himoon? Ngano?
Ang Bibliya nag-ingon nga ang pagtigom para sa pagsimba importante kaayo. Basaha ang Hebreohanon 10:24, 25, ug dayon hisgoti kini nga pangutana:
Nganong angay nga regular tang motambong ug tigom?
ANG UBAN MOINGON: “Dili na kinahanglang motambong ug tigom. Igo na nga magtuon kag Bibliya sa balay.”
Unsa nga teksto o ehemplo sa Bibliya ang nagpakita kon unsay gusto ni Jehova?
SUMARYO
Ang pagtambong sa mga tigom makatabang nimo nga mas mailhan pa si Jehova, mas masuod kaniya, ug makasimba kaniya duyog sa uban.
Review
Nganong gidasig ta ni Jehova nga magtigom?
Unsay imong makat-onan sa tigom sa mga Saksi ni Jehova?
Sa imong hunahuna, unsa pay mga kaayohan sa imong pagtambong sa mga tigom?
SUSIHA
Kulbaan ba kang motambong ug tigom? Tan-awa kon sa unsang paagi ang usa ka lalaki nga mibati ana giganahan na sa pagtambong sa mga tigom.
Tan-awa kon sa unsang paagi ang usa ka batan-on nag-enjoy sa tigom ug kon unsay iyang gihimo aron padayong makatambong.
Sayra kon unsay gibati sa uban bahin sa pagtambong sa mga tigom.
“Nganong Motambong sa mga Tigom sa Kingdom Hall?” (Web article)
Sayra kon sa unsang paagi nausab ang kinabuhi sa usa ka membro sa bayolente nga gang human makatambong ug tigom sa mga Saksi ni Jehova.
“Pirme Kong Magdaladalag Pusil” (Ang Bantayanang Torre, Hulyo 1, 2014)