ADAR

Ang ngalan sa ika-12 nga lunar nga bulan sa sagradong kalendaryo sa mga Hudiyo human sa pagkadestiyero, apan ang ika-6 sa sekular nga kalendaryo. (Est 3:7) Kini katumbas sa bahin sa Pebrero ug bahin sa Marso. Human sa bulan sa Adar nga ang isal-ot nga bulan, nga gitawag ug Veadar, o ang ikaduhang Adar, idugang sa partikular nga mga tuig.

Niining bulana, nga modangat sa naghinapos ang tingtugnaw ug mosunod ang tingpamulak, ang mga kahoyng algaroba mosugod sa pagpamulak sa mga bahin sa Palestina, ug sa mainit nga ubos nga mga kayutaan ang mga kahoyng kahel ug lemon mahimo nang pupoan.

Pinaagi sa harianong sugo ni Haring Ahasuero sa Persia, ang ika-13 nga adlaw sa Adar nagtimaan sa kalaglagan sa tanang Hudiyo diha sa sakop nga mga distrito sa iyang dominyo, tungod kini sa pagsiba sa iyang primer ministro nga si Haman. Ang usa ka bag-ong sugo, nga gipagula tungod sa pagpataliwala ni Rayna Ester, naghatag ug kadaogan sa mga Hudiyo batok sa mga mopatay unta kanila, ug human niana gisugo ni Mardokeo nga ang ika-14 ug ika-15 nga adlaw sa Adar pagasaulogon ingong paghinumdom sa ilang kaluwasan. (Est 3:13; 8:​11, 12; 9:​1, 15, 20, 21, 27, 28) Kini nga Hudiyohanong pista nailhan nga Purim, usa ka ngalan nga naggikan sa “Pur, nga mao, ang Ripa.”​—Est 9:24-26; tan-awa ang PURIM.

Ang Adar mao usab ang bulan nga natapos ni Gobernador Zorobabel ang pagtukod pag-usab sa templo sa Jerusalem. (Esd 6:15) Sa ubang teksto sa Bibliya kini gihisgotan lamang ingong ang “ikanapulog-duha ka bulan.”​—2Ha 25:27; 1Cr 27:15; Jer 52:31; Eze 32:1.