PAGBANHIG

Ang pag-atang diha sa usa ka tagong dapit alang sa usa ka kalit nga pag-atake. Ang tulo ka Hebreohanong mga pulong alang sa “pagbanhig” (ʼeʹrev, ʼoʹrev, ug ma·ʼaravʹ) naggikan sa lintunganayng pulong nga ʼa·ravʹ, nga nagkahulogang “pag-atang.” (Job 37:8; Jer 9:8; Sal 10:8; Huk 9:32) Sa susama, ang Gregong pulong alang sa “pagbanhig” (e·neʹdra) kaamgid sa berbo nga e·ne·dreuʹo, nga nagkahulogang “pag-atang.”​—Buh 25:3; 23:21.

Si Josue sa kabatid migamit ug pagbanhig batok sa Ai, nga nagpuwesto ug 5,000 ka tawo dapit sa K sa siyudad panahon sa kagabhion, samtang nagpahimutang sa pangunang hugpong sa iyang kasundalohan dapit sa A. Pagkaugma, ang mga tigdepensa sa siyudad iyang gipahilayo gikan sa siyudad pinaagi sa pagpakaaron-ingnon nga napildi, sa ingon nahimo ang pagbanhig ug nailog ang siyudad. (Jos 8:2-21) Dihay mga pagbanhig sa dihang nahitabo ang panagbangi tali sa mga tag-iyag yuta sa Sekem ug sa anak nga lalaki ni Gideon nga si Abimelek. (Huk 9:​25, 31-45) Si Samson mao ang tumong sa mga pagbanhig nga gihimo sa mga Filistehanon. (Huk 16:1-12) Si Saul mihimog pagbanhig batok kang Amalek ug sa ulahi nag-akusar kang David nga nagbanhig kaniya. (1Sa 15:5; 22:8) Ang ubang mga pagbanhig mao kadtong nahitabo sa pagpakig-away sa Israel batok sa tribo ni Benjamin (Huk 20:29-44), ang dili-malamposong pagbanhig ni Jeroboam batok sa Juda (2Cr 13:13-19), ang pagbanhig nga nagpahinabog kaguliyang taliwala sa mga tig-atake sa Juda sa mga adlaw ni Jehosapat (2Cr 20:​22, 23), kadtong gihisgotan sa dihang gihubit ang pagkapukan sa Jerusalem (Lam 4:19), ug ang pagbanhig nga gimando ni Jehova batok sa Babilonya (Jer 51:12). Ang namauli nga Hudiyong mga destiyero gipanalipdan ni Jehova batok sa pagbanhig.​—Esd 8:31; tan-awa ang GUBAT.

Ang Hebreohanong nombre nga ʼeʹrev, nga nagkahulogang “pagbanhig,” gigamit sa paghubit sa mga taktika sa pagpangayam. (Job 37:8; 38:40) Ang Hebreohanong berbo nga a·ravʹ gigamit sa mahulagwayong paagi sa paghubit sa pampam samtang siya nag-atang sa mga lalaki (Pr 7:12; 23:28) ug sa paghubit sa mga taktika sa daotang mga tawo batok sa inosente ug sa mga matarong. (Sal 10:9; Pr 1:​11, 18; 12:6; 24:15; Miq 7:2; itandi ang Job 31:9.) Sa Israel ang silot nga kamatayon gipahamtang ngadto sa tawo nga makaplagang sad-an sa pagpatay sa laing tawo human siya mag-atang aron mohimog pagbanhig.​—Deu 19:​11, 12.

Ang kapin sa 40 ka Hudiyo nga “nagpailalom sa ilang kaugalingon sa usa ka tunglo” naglaraw ug pagbanhig batok kang apostol Pablo apan napakyas tungod sa pag-umangkong lalaki ni Pablo.​—Buh 23:12-35.