ASTEROT-KARNAIM

Ang dapit diin gipildi ni Kedorlaomer nga hari sa Elam ang mga Repaim. (Gen 14:5) Gihunahuna sa pipila nga mao kini ang bug-os nga ngalan sa Astarot ug nga ang pagdugang ug “karnaim” (mga sungay) nagtumong sa duha ka sungay sa haya nga bulan nga nagsimbolo sa diyosang si Astarte o ngadto sa duha ka bukid nga kasikbit sa lungsod. Apan, gisugyot usab nga ang ngalan nagkahulogang “Asterot Duol sa Karnaim” ug busa kini nagtumong sa siyudad sa Astarot uban sa Karnaim nga gihisgotan ingong bulag apan kasikbit nga lungsod. Ang Karnaim gituohan nga nahimutang sa Sheikh Saʽad, nga nahiluna sa kasikbit nga dapit nga giila sa kadaghanan nga mao ang nahimutangan sa Astarot (Tell ʽAshtarah).​—Tan-awa ang ASTAROT.