BAT-SEBA

[Anak nga Babaye sa Kadagaya; lagmit, Anak nga Babaye nga [Natawo sa] Ikapito [nga Adlaw]].

Anak nga babaye ni Eliam (Amiel, sa 1Cr 3:5); lagmit apo nga babaye ni Ahitopel. (2Sa 11:3; 23:34) Sa sinugdan siya maoy asawa ni Urias nga Hitihanon, usa sa gamhanang mga tawo ni David; sa ulahi siya naminyo kang David human malangkit sa usa sa labing mangiob nga mga panghitabo sa kinabuhi ni David.​—2Sa 23:39.

Usa ka gabii niana sa adlaw nga tingpamulak, si Bat-seba naligo sa dihang ang usa ka silingan, si Haring David, nga didto sa atop sa iyang palasyo, nakakita niining matahom nga babaye, nga gihubit ingong ‘matahom kaayo sa panagway.’ Sa pagkahibalo nga ang iyang bana atua sa gubat, ang hari nga napukaw sa iyang hilabihang kaibog nagsugo nga dad-on si Bat-seba ngadto sa palasyo, diin siya nakigdulog kaniya. “Unya siya mipauli sa iyang balay,” ug sa paglabay sa pipila ka panahon si Bat-seba nagpahibalo kang David nga siya nagmabdos. Human niadto naglaraw si David nga padulogon si Urias sa iyang asawa aron matago ang pagpanapaw, apan sa dihang napakyas kining maong laraw, ang hari nagpapatay kang Urias didto sa panggubatan. Sa dihang natapos na ang yugto sa pagbangotan, si Bat-seba nahimong asawa ni David ug nanganak sa bata.​—2Sa 11:1-27.

‘Apan kadto daotan sa mga mata ni Jehova.’ Gibadlong sa iyang manalagna nga si Natan ang hari pinaagi sa usa ka ilustrasyon nga niana iyang gipakasama si Bat-seba ingong “usa ka bayeng nating karnero” sa kabos nga tawo, si Urias, nga gikuha sa tawong dato, si David, aron idalit sa iyang bisita. Sa dakong kasubo si David naghinulsol (Sal 51), apan ang bata nga anak sa pagpanapaw, nga wala hinganli, namatay. (Tan-awa ang DAVID.) Katuigan sa ulahi, dugang kadaotan ang midangat kang David tungod sa iyang sala, ang iyang kaugalingong mga puyopuyo gipasipad-an ni Absalom nga iyang anak nga lalaki.​—2Sa 11:27–​12:23; 16:​21, 22.

Si Bat-seba nakakaplag ug paghupay sa iyang mahinulsolong bana, nga sublisubling nagtawag kaniya nga “akong ginoo,” sama sa gibuhat ni Sara sa iyang bana (1Ha 1:15-21; 1Pe 3:6), ug sa ulahi siya nanganak kaniya ug usa ka anak nga lalaki nga ginganlan ug Solomon, nga gihigugma ug gipanalanginan ni Jehova. (2Sa 12:​24, 25) Nakabaton usab siya ug laing tulo ka anak nga lalaki, si Simea, Sobab, ug Natan, ang ulahi nahimong katigulangan ni Maria nga inahan ni Jesus. Sanglit si Jose naggikan kang Solomon, ang duha ka yutan-ong ginikanan ni Jesus naggikan sa ilang katigulangang si Bat-seba ingon man usab kang David.​—1Cr 3:5; Mat 1:​6, 16; Luc 3:​23, 31.

Gihisgotan pag-usab si Bat-seba diha sa asoy sa hapit nang matapos ang 40-ka-tuig nga pagmando ni David. Si David nanumpa kaniya: “Si Solomon nga imong anak mao ang mahimong hari sunod kanako.” Busa sa dihang ang magulang nga igsoon-sa-amahan ni Solomon nga si Adonias misulay sa pag-ilog sa trono sa wala pa mamatay si David, si Bat-seba, pinaagi sa tambag sa manalagna nga si Natan, nagpahinumdom kang David sa iyang panumpa. Dihadiha gipalingkod ni David sa trono si Solomon, ug sa ingon si Bat-seba nahimong rayna nga inahan.​—1Ha 1:5-37.

Human matukod nga malig-on ang trono ni Solomon, si Bat-seba nagpakita sa iyang atubangan ingong impluwensiyadong tigpataliwala nga may hangyo alang kang Adonias. Si Solomon dihadiha “mitindog sa pagsugat kaniya ug miyukbo kaniya,” ug nagsugo nga ipahimutang ang usa ka trono alang sa iyang inahan, “aron siya molingkod sa iyang tuo.” Apan, ang iyang hangyo nagbutyag lamang sa pagkamalinglahon ni Adonias, busa si Adonias gipapatay ni Solomon.​—1Ha 2:13-25.