LOBITOS

Gagmayng bangagan nga mga pahiyas nga gama gikan sa mga materyales sama sa bildo, mutya, bulawan, ug plata. Kini sagad nga isul-ob ingong mga kulentas ug nakaplagan diha sa gipreserbar nga mga patayng lawas sa Ehipto, diha sa mga lubnganan sa mga Grego ug mga Romano, ug sa mga kagun-oban sa Asiryanhong mga templo, maingon man didto sa Megido, Asdod, ug Bet-semes.

Mahitungod sa maanyag nga dalagang Sulamita sa Awit ni Solomon, kini giingon: “Ang imong mga aping matahom taliwala sa mga sinalapid nga buhok, ang imong liog nga gikulentasan ug mga lobitos.” (Aw 1:10) Busa, tin-aw nga ang tinuhog nga mga lobitos maoy lakip sa mga dayandayan nga gigamit sa mga babayeng Hebreohanon sa karaang kapanahonan.​—Tan-awa ang DAYANDAYAN, PAHIYAS.