BET-EZEL

Usa ka lungsod, dayag nga nahimutang sa Juda, nga gihisgotan lamang diha sa tagna ni Miqueas bahin sa katalagman nga tinong modangat sa dili-matinumanong Samaria ug Jerusalem. (Miq 1:11) Niining bahina sa tagna, ang manalagna sublisubling migamit ug mga pulong nga kaamgid ug tunog ug may kaatbang nga kahulogan sa mga ngalan sa ubay-ubayng mga lungsod, mao nga sa pagkatinuod siya miingon: “Didto sa balay sa Apra [lagmit nagkahulogang “Abog”] ligid sa abog. Agi, Oh babayeng molupyo sa Sapir [nagkahulogang “Maanindot; Pinasinaw; Kahimut-anan”], diha sa makauulawng pagkahubo. Ang babayeng molupyo sa Zaanan wala mogula. Ang pagminatay sa Bet-ezel [nagkahulogang “Balay sa Duol (Tupad)”] mokuha gikan kaninyo sa nahimutangan niini. Kay ang babayeng molupyo sa Marot [gikan sa lintunganayng pulong nga nagkahulogang “mapait”] naghulat sa maayo, apan daotan ang miabot gikan kang Jehova ngadto sa ganghaan sa Jerusalem.” (Miq 1:10-12) Busa, ang pasidaan sa manalagna, nga gitumong alang niadtong makaagom sa katalagman, nagsulti kanila nga ang pagminatay mokaylap hangtod sa Jerusalem.

Bisag pangagpas lamang ang gituohang nahimutangan niini, gihunahuna nga ang Bet-ezel nahimutang sa dapit sa presenteng-adlaw nga Deir el-ʽAsal, mga 16 km (10 mi) sa KHK sa Hebron.