BET-HARAN, BET-HARAM

Usa ka siyudad sa sidlakang bahin sa Jordan sa teritoryo nga gipangayo sa tribo ni Gad tungod sa maayong sibsibanan niini. Kini gitukod o kaha gitukod pag-usab sa mga Gadhanon, ug bisan tuod nahimutang sa ubos nga patag, kini nahimong usa sa ilang kinutaang mga siyudad.​—Num 32:​1, 34, 36; Jos 13:27.

Kini nga ngalan daw napreserbar diha sa ngalan sa Tell er-Rameh sa Wadi er-Rameh (Wadi Husban) sa Kapatagan sa Moab, apan ang orihinal nga dapit sa Bet-haran (Bet-haram) gituohan nga mao ang Tell Iktanu, mga 13 km (8 mi) sa SAS sa dapit diin ang Jordan moagos paingon sa Patayng Dagat. Kining dapita maoy duol sa tinubdan sa iladong mainit nga mga tubod, nga lagmit usa sa mga hinungdan nga si Haring Herodes nagpatukod ug palasyo niining dapita. Sa unang bahin sa Komong Panahon, ang dapit sa Tell er-Rameh nailhang Livias, nga maoy gingalan niini ni Herodes Antipas, ug sa ulahi ang ngalan niini giilisdan ug Julias.