TIMOS

[Heb., char·golʹ].

Usa ka matang sa tiglukso nga insekto nga pamilya sa apan-apan, hinuon lahi kini sa apan-apan tungod sa nagtuybong mga siwil sa tumoy sa tiyan niini. Ang timos sa balay ug ang timos sa uma pulos makaplagan sa kayutaan sa Bibliya. Ang bugtong paghisgot niini nga insekto makita sa Levitico 11:​22, diin kini gitala ingong hinlo nga pagkaon.

Ang daghang hubad sa Bibliya (KJ; Yg) naghubad sa Hebreohanon nga terminong char·golʹ ingong “bakukang,” nga ang kadaghanan niini nga matang sa insekto mokamang inay nga molukso. Apan giuyonan sa kadaghanan nga ang Hebreohanong pulong nagtumong sa usa ka matang sa molukso nga insekto, ingon sa gipakita sa pagtala niini uban sa dulon. Hinuon, dili tino kon unsay tukmang ipasabot dinhi sa molukso nga insekto. Ang mga maghuhubad naghubad sa char·golʹ sa lainlaing paagi ingong “molupad nga dulon” (AT) ug “timos” (AS; NW; RS); ug usahay kining Hebreohanon nga pulong gihatagan lamang ug katumbas nga espeling.​—Le; Da; JB.