DISTRITO

Ang pulong nga “distrito” nagtumong sa usa ka administratibong dibisyon, usa ka rehiyon palibot sa usa ka siyudad, o usa ka rehiyon sulod sa tinong mga utlanan.

Sa dihang giorganisar ni Nehemias ang pagtukod pag-usab sa paril sa Jerusalem, siya nagpahat ug mga bahin ngadto sa mga pangulo, o mga “prinsipe,” ug sa mga molupyo sa pipila ka “distrito.” Kini nga mga distrito ginganlan sumala sa ngalan sa ilang pangunang siyudad, ug ang pipila niini (Jerusalem, Bet-zur, Keila) maoy doble. (Neh 3:​9, 12, 14-18) Dayag nga mga subdibisyon kini sa Persianhong “sakop nga distrito,” o “lalawigan,” sa Juda. (Neh 1:3; KJ, RS) Ang Hebreohanong pulong nga gigamit alang niini nga mga distrito (peʹlekh) gikaingon nga naggikan sa Akadianhong pulong nga pilku, tingali nagpaila nga kini gimugna sa mga Babilonyanhon human sa pagkapukan sa Jerusalem.​—Tan-awa ang SAKOP NGA DISTRITO.

Ang Hebreohanon nga terminong kik·karʹ nagpasabot sa ideya sa usa ka butang nga lingin. Kini gigamit sa pagtumong sa usa ka “lingin nga tinapay” (Ex 29:23), usa ka “lingin nga taklob” nga tingga (Zac 5:7), usa ka “talanton” nga bulawan o plata (Ex 25:39; 1Ha 20:39), ug sa usa ka “distrito” o “dal-as” nga linginon ug porma.​—Gen 13:​10, ftn sa Rbi8; Neh 12:28.

Diha sa Kristohanon Gregong Kasulatan, ang pulong nga hoʹri·on (kanunayng plural) sa literal nagtumong sa “mga utlanan” sa usa ka dapit (Buh 13:50; Mat 19:1), apan kini mahimong magtumong usab sa usa ka dapit nga maoy gipalibotan, nga mao, usa ka “distrito” o “rehiyon.” (Mat 2:16; 15:22) Ang terminong me·risʹ, nga gigamit sa pagtumong sa “distrito” sa Macedonia diha sa Buhat 16:​12, sa literal nagpasabot sa usa ka “bahin.”​—Itandi ang Int; Buh 8:21.