DUMA

1. Ang ikaunom diha sa talaan sa 12 ka anak nga lalaki ni Ismael. Tungod sa kaminyoon sa iyang igsoong babaye nga si Mahalat, si Duma nahimong bayaw sa iyang ig-agaw-sa-amahan nga si Esau. Si Duma nahimo usab nga pangulo ug ulo sa usa ka banay, o nasod, ingong katumanan sa saad ni Jehova kang Abraham.​—Gen 17:20; 25:14-16; 28:9; 1Cr 1:30.

Pinasukad sa iyang ngalan ginganlan ni Duma nga Ismaelinhon ang usa ka rehiyon sa A sa Arabia nga nahimutang sa tungatunga sa Yutang Saad ug sa H sa Babilonya. Ang maong ngalan gigamit gihapon sa tubigang dapit sa Dumat al-Ghandal (karon nailhang Al-Jawf). Ang Asiryanhon nga si Haring Senakerib naghisgot sa usa ka dapit nga ginganlag Adummatu nga “nahimutang sa desyerto.” Si Esar-hadon nag-ingon nga nabuntog sa iyang amahan nga si Senakerib ang usa ka dapit nga ginganlag Adumu.

2. Usa ka siyudad nga gitala lakip niadtong gipahat alang sa tribo ni Juda human masakop ni Josue ang yuta. (Jos 15:52) Nahimutang kini sa bukirong rehiyon ug gituohang mao ang Khirbet Domeh ed-Deir (Duma), mga 15 km (9 mi) sa HK sa Hebron.

3. Sa Isaias 21:11 usa ka pahayag ang gihimo batok sa “Duma.” Hinunoa, gihisgotan dayon ang “Seir,” ug kini lagmit nagpakita nga ang mensahe gitumong batok sa Edom. (Gen 32:3) Ang Gregong Septuagint sa Isaias 21:11 nag-ingong “Idumea” (ang yuta sa mga Edomhanon) imbes nga “Duma.”