EGLON

[Gamay nga Nating Baka].

1. Usa ka hari sa Moab sa mga adlaw sa mga Maghuhukom, kinsa naglupig sa Israel sulod sa 18 ka tuig, “tungod kay ilang gibuhat ang daotan sa mga mata ni Jehova.” (Huk 3:12-25) Si Eglon maoy nangulo sa panag-abin sa Moab, Ammon, ug Amalek sa ilang pag-atake sa Israel. Siya napukan sa dihang ang walhon nga si Ehud, human ihatag ang naandang tributo, miingon: “Aduna akoy sekretong pulong alang kanimo, Oh hari.” Sa dihang nag-inusara didto sa iyang mabugnaw nga lawak ibabaw sa lapad nga atop sa iyang palasyo, si Eglon, human papahawaa ang iyang mga tig-alagad, mitindog gikan sa iyang trono aron paminawon ang giingon ni Ehud nga “pulong sa Diyos.” Dayon giduslak ni Ehud ngadto sa tambok kaayong tiyan ni Eglon ang usa ka espada nga duhay-sulab mao nga “ang puloan midulot usab uban sa sulab,” ug “migula ang hugaw.” Bahin sa Maghuhukom 3:​22, ang Commentary ni Clarke nag-ingon: “Mahimong ang mga hugaw migula agi sa samad, o kaha siya nakalibang sa kinaiyanhong paagi tungod sa kalisang ug tumang kasakit.”

2. Usa ka harianong siyudad sa Canaan kansang hari miduyog sa panag-abin batok sa Gabaon sa dihang ang maong siyudad nakigdait kang Josue ug sa Israel. Gipatay ni Josue ang lima ka hari nga nalangkit, gibitay sila diha sa mga estaka, ug sa ulahi gisakop ang Eglon, gilaglag ang mga molupyo niini. (Jos 10:1-5, 22-27, 34, 35; 12:12) Human niadto kini gilakip sa teritoryo sa tribo ni Juda. (Jos 15:39) Ang orihinal nga dapit gituohang makaplagan didto sa Tell el-Hesi, mga 25 km (16 mi) sa SAS sa Gaza, ug mga 11 km (7 mi) sa K sa Lakis, ug busa duol sa ngilit sa Kapatagan sa Filistia. Apan, ang karaang ngalan napreserbar pinaagi sa mga kagun-oban sa Khirbet ʽAjlan, pipila ka milya pa ang gilay-on.