ELI, II

Sa dihang himalatyon na si Jesus diha sa estaka sa pagsakit, sa mga ikasiyam nga takna, o mga alas 3:00 s.h., siya mipatugbaw: “Eʹli, Eʹli, laʹma sa·bach·thaʹni?” (“Diyos ko, Diyos ko, nganong gitalikdan mo ako?”) (Mat 27:46; Mar 15:34) Ang mga tumatan-aw naghunahuna nga iyang gitawag si Elias. Tingali ilang nasaypan sa pagsabot ang mga pulong ni Jesus tungod kay ang iyang pagsulti dili klaro gumikan sa iyang hilabihang pag-antos o tungod kay ang iyang diyalekto lahi sa ilaha. (Mat 27:47; Mar 15:35) Pinaagi sa pagtawag ngadto sa iyang langitnong Amahan, nga nag-ila kaniya ingong iyang Diyos, gituman ni Jesus ang Salmo 22:1.