ELTEKE(H)

Usa ka siyudad sa Dan (Jos 19:44) nga gihatag, lakip sa mga sibsibanan niini, ngadto sa Kohatnong mga Levihanon. (Jos 21:​20, 23) Diha sa Prisma ni Taylor, si Haring Senakerib sa Asirya (usa ka katalirongan ni Ezequias, 745-717 W.K.P.) nanghambog nga siya “naglikos, nag-ilog, ug nangagaw sa Eltekeh [Asiryanhon, Altaqu]” human pildiha ang Ehiptohanon ug Etiopianhong kasundalohan “diha sa patag sa Eltekeh.”

Gihunahuna kanhi sa kadaghanang eskolar nga ang Eltekeh nahimutang sa Khirbet el-Muqannaʽ (Tel Miqne), 36 km (22 mi) sa K sa Jerusalem. Apan, ingong resulta sa dili pa dugayng mga pagpangubkob, kanang dapita gituohan nga mao ang Ekron sa Bibliya. Busa, bisan tuod dili matino ang nahimutangan niini karon, ang pipila nagtuo nga ang Eltekeh lagmit nahimutang sa Tell esh-Shallaf (Tel Shalaf), 18 km (11 mi) sa AS sa Asdod.