EMIM

[Makalilisang nga mga Butang].

Usa ka tribo o katawhan nga nagpuyo sa teritoryo sa S sa Patayng Dagat. Sila gihubit nga dagko, daghan, ug tag-as “sama sa mga Anakim.” (Deu 2:10) Ang pagtandi kanila sa mga anak ni Anak nagpakita nga ang mga Emim maoy samag mga higante ug mabangis, kay si Moises nag-ingon sa Israel: “Ikaw . . . nakadungog nga giingon, ‘Kinsay lig-ong makabarog atubangan sa mga anak ni Anak?’” (Deu 9:2) Ang gigikanan sa mga Emim dili mapiho, bisan tuod gihunahuna sa pipila nga sila maoy kaliwat sa mga Repaim.

Sa panahon ni Abraham, ang Elamihanong hari nga si Kedorlaomer nagpildi sa mga Emim didto sa Saveh-kiriataim. (Gen 14:5) Lagmit nga ang mga Emim nagpadayon sa pagpuyo sa ilang yuta sa S sa Patayng Dagat sulod sa pipila ka panahon human niini, sanglit ang Bibliya naghisgot nga sila sa kataposan gipapahawa sa mga Moabihanon. Gigamit usab sa mga Moabihanon ang ngalang Emim sa pagtumong sa mga Repaim.​—Deu 2:11.