PAGKULIT

Ang kabatid sa paghimog mga disenyo o mga letra diha sa mga materyales sama sa kahoy (1Ha 6:​29, 32), metal (Ex 39:30), o bato (Zac 3:9). Lagmit ang kinaunahang paghisgot bahin sa pagkulit diha sa Kasulatan mao ang may kalabotan sa timbre nga singsing ni Juda. (Gen 38:18) Ang pagkulit komon nga gihimo pinaagig talinis nga mga himan nga puthaw o kaha pinaagig mga himan nga diamante ang tumoy. (Jer 17:1) Apan ang Napulo ka Sugo gikulit diha sa bato pinaagi sa “tudlo” sa Diyos.​—Ex 31:18; 32:16; 34:1; 2Co 3:7.

Ang matag usa sa duha ka batong onyx nga gibutang diha sa mga sul-otan sa abaga nga gipatapot sa epod sa hataas nga saserdote gikulitan sa mga ngalan sa unom ka nagkalainlaing mga tribo sa Israel, ug ang matag usa sa 12 ka mahalong mga bato nga gidayandayan sa iyang tabon sa dughan gikulitan sa ngalan sa usa sa mga tribo. Ang balaang ilhanan sa pagpahinungod, nga mao ang sinaw nga bulawang plaka diha sa purong sa hataas nga saserdote, gikulitan sa mga pulong: “Ang pagkabalaan iya ni Jehova.” Kay napuno sa espiritu sa Diyos, si Bezalel, uban ni Oholiab, nahimong kuwalipikado sa paghimo niining linain nga buluhaton sa pagkulit ingon man sa pagbansay sa uban.​—Ex 35:30-35; 28:9-12; 39:6-14, 30.