EN-ROGEL

[Tuboran (Tubod) sa Rogel (Tiilan)].

Usa ka tubod o atabay duol sa Jerusalem nga nagsilbing timaan sa utlanan tali sa Juda ug Benjamin. (Jos 15:7; 18:16) Ang mga espiya ni David nga si Jonatan ug Ahimaaz nagpaabot ug mga taho didto sa En-rogel maylabot sa pagrebelde ni Absalom. (2Sa 17:17) Duol dinhi ang laing rebelyosong anak nga lalaki ni David nga si Adonias sa ulahi naghimog kombira aron makakuhag pagpaluyo sa iyang pag-ilog sa trono.​—1Ha 1:9.

Giuyonan sa kadaghanan nga ang En-rogel katumbas sa modernong Bir Ayyub, o atabay ni Job. Nahimutang kini sa H sa HS nga eskina sa paril sa Jerusalem, diha sa tiilan sa kasadpang tampi sa Walog sa Kidron nga mga 100 m (330 p) sa H gikan sa dapit diin kini misumpay sa Walog sa Hinnom. Ang giladmon sa atabay miabot hangtod sa usa ka sapasapa o tubod sa ilalom sa yuta, nga tungod niana human sa usa ka pag-ulan, usahay mobugwak kinig kusog nga magpataas sa lebel sa tubig hangtod sa ibabaw niini.