HIGANTE

Ang Bibliya naghisgot sa mga lalaki nga talagsaon kaayo ang gidak-on. Anaa si Og nga hari sa Basan, usa sa mga Repaim, kansang andas maoy siyam ka maniko (4 m; 13.1 p) ang gitas-on ug upat ka maniko (1.8 m; 5.8 p) ang gilapdon. (Deu 3:11) Si Goliat nga taga-Gat, kinsa gipatay ni David, maoy unom ka maniko ug usa ka dangaw (2.9 m; 9.5 p) ang gitas-on. Makita ang gidak-on ug kusog ni Goliat sa gibug-aton sa iyang armadura. Ang iyang kotamaya nga tumbaga may gibug-aton nga 5,000 ka siklo (57 kg; 126 lb); ang ohas sa iyang bangkaw may gibug-aton nga 600 ka siklo (6.8 kg; 15 lb).​—1Sa 17:4-7.

Gawas kang Og ug Goliat, diha pay ubang talagsaon ug gidak-on nga mga lalaki sa mga Repaim, lakip kanila mao si Isbi-benob, kansang bangkaw may gibug-aton nga 300 ka siklo nga tumbaga (3.4 kg; 7.5 lb) (2Sa 21:16); si Sap, o Sipai (2Sa 21:18; 1Cr 20:4); si Lami nga igsoong lalaki ni Goliat, “kansang kuptanan sa bangkaw sama sa likisan sa mga maghahabol” (1Cr 20:5); ug ang usa ka lalaki nga talagsaon ang gidak-on kansang mga tudlo sa kamot ug tiil maoy tagun-om, nga ang tanan 24 (2Sa 21:20).

Ang walay-pagtuo nga mga espiya nagtaho ngadto sa mga Israelinhon nga didto sa Canaan ilang “nakita ang mga Nepilim, ang mga anak ni Anak, nga gikan sa mga Nepilim; mao nga kami nahimong sama sa mga apan-apan sa among panan-aw, ug sa ilang mga mata kami nahimo usab nga ingon.” (Num 13:33) Kini nga mga lalaki nga talagsaon ang gidak-on, nga gitawag ug mga anak ni Anak (lagmit nagkahulogang “Taas ug Liog [nga mao, taas ug pamarog]”), sa pagkatinuod dili mga Nepilim, ingon sa gitaho, apan maoy mga lalaki nga talagsaon lamang ang gitas-on, kay ang mga Nepilim, ang mga kaliwat sa mga manulonda ug mga babaye (Gen 6:4), nangalaglag sa panahon sa Lunop.