HALLEL

Usa ka awit sa pagdayeg kang Jehova. Ang Salmo 113 hangtod sa 118 mao ang nailhan sa Hudiyohanong mga sinulat ingong ang “Ehiptohanon nga Hallel.” Sumala sa Mishnah, kini nga Hallel giawit didto sa templo ug sa mga sinagoga panahon sa Paskuwa (Pesahim 10:​5-7) ug sa mga pista sa Pentekostes, sa mga Balongbalong, ug sa Pagpahinungod (Sukkah 4:8; Taʽanit 4:5). Sa pagsaulog sa Paskuwa diha sa balay, ang unang bahin niini nga Hallel (ang Salmo 113 [sumala sa Tunghaan ni Shammai] o kaha ang Salmo 113 ug 114 [sumala sa Tunghaan ni Hillel]) litokon human ibubo ang ikaduhang kopa sa bino ug human ipatin-aw ang kahulogan sa Paskuwa. Ang Hallel matapos sa ikaupat nga kopa sa bino. Ang “Dakong Hallel” (nga gituohan sa pipila nga mao ang Salmo 136 lamang, ug gituohan usab sa uban nga mao ang Salmo 120-136, o ang Salmo 135:4–​136:26) giingon nga giawit sa malipayong mga okasyon ug niadtong migamit ug ikalimang kopa sa bino sa pagsaulog sa Paskuwa.