ALELUYA

Kini ang katumbas nga Cebuanong espeling sa Hebreohanong ekspresyon nga ha·lelu-Yahʹ, nga unang makaplagan sa Salmo 104:35. Sa Bag-ong Kalibotang Hubad kini kanunayng gihubad nga “dayega ninyo si Jah.” Kini nga ekspresyon makita sa 24 ka higayon diha sa Hebreohanong Kasulatan ug mao ang sinugdanan ug/o ang kataposan sa Mga Salmo diin kini makaplagan. (Tan-awa ang Sal 112:1; 115:18; 135:3; 146:​1, 10; 147:​1, 20; 148:​1, 14; 149:​1, 9; 150:​1, 6.) Kini nga ekspresyon makita tapad sa “Amen” sa kataposan sa Ikaupat nga Basahon sa Mga Salmo (Sal 106:48), ug ang Gregong porma niini makita sa upat ka higayon sa Pinadayag 19:1-6, diin gihisgotan ang kalipay nga gibati tungod sa kalaglagan sa Dakong Babilonya ug nga gilangkit sa pagsugod ni Jehova sa pagmando ingong Hari.​—Tan-awa ang JAH.