HANANIAS

[nagkahulogang “Si Jehova Nagpakitag Pabor; Si Jehova Mapuangoron”].

1. Anak nga lalaki ni Sasak ug pangulo sa usa ka balay o banay ni Benjamin.​—1Cr 8:​1, 24, 25, 28.

2. Usa sa 14 ka anak nga lalaki ni Heman ug pangulo sa ika-16 sa 24 ka pundok nga tig-alagad sa Levihanong mga maghohoni nga gitudlo ni David nga mag-alagad sa sangtuwaryo.​—1Cr 25:​1, 4, 5, 8, 9, 23.

3. Usa ka taas-ug-ranggo nga opisyal, “prinsipe,” sa kasundalohan ni Haring Uzzias.​—2Cr 26:11.

4. Amahan ni Zedekias, kinsa usa ka prinsipe panahon sa paghari ni Jehoiakim nga hari sa Juda.​—Jer 36:12.

5. Anak nga lalaki ni Azur; usa ka mini nga manalagna gikan sa Benjaminhong siyudad sa Gabaon kinsa misupak sa manalagna ni Jehova nga si Jeremias. Sa panahon sa paghari ni Haring Zedekias sa Juda, samtang giawhag ni Jeremias ang katawhan nga magpasangon sa ilang mga liog ilalom sa yugo sa hari sa Babilonya ug sa ingon magpabiling buhi (Jer 27:12-14), si Hananias mitagna nga ang gahom sa Babilonya mapukan sulod sa duha ka tuig, ang nadestiyero nga mga Hudiyo didto pagabuhian, ug ang tanang gikompiskar nga mga galamiton sa templo igauli. Sa pag-ilustrar sa iyang punto, gikuha ni Hananias ang yugo nga kahoy gikan sa liog ni Jeremias ug gibali kini. Dayon gisugo ni Jehova si Jeremias sa pagpahibalo kang Hananias nga ang yugo nga kahoy pagailisan ug usa ka yugo nga puthaw ug nga ang kamatayon ni Hananias mahitabo sulod nianang tuiga. Ingong katumanan sa tagna, ang mini nga manalagna namatay nianang tuiga.​—Jer 28.

6. Lagmit apohang lalaki ni Irias nga opisyal sa ganghaan ni Benjamin kinsa maoy nagdakop kang manalagnang Jeremias, ug bakak nga nag-akusar kaniya nga misulay sa pagbiya aron modapig sa mga Caldeanhon.​—Jer 37:1-15.

7. Ang Hebreohanong ngalan ni Sadrak, usa sa tulo ka Hudiyong mga kauban ni Daniel nga gidala ngadto sa Babilonya niadtong 617 W.K.P.​—Dan 1:​6, 7; tan-awa ang SADRAK.

8. Anak nga lalaki ni Zorobabel ug amahan ni Pelatias ug Jesaias.​—1Cr 3:​19, 21.

9. Usa ka kaliwat ni Bebai nga lakip niadtong namati sa tambag ni Esdras sa pagpapahawa sa ilang langyawng mga asawa.​—Esd 10:​10, 11, 28, 44.

10. Usa ka Levihanong saserdote ug pangulo sa balay o banay sa amahan ni Jeremias sa panahon sa pagkagobernador ni Nehemias.​—Neh 12:​12, 26.

11. Usa ka membro sa mga tigsagol ug pahumot nga mihimog pagpang-ayo sa paril sa Jerusalem sa panahon ni Nehemias.​—Neh 3:8.

12. Anak nga lalaki ni Selemias; usa nga miapil sa pagpang-ayo sa paril sa Jerusalem niadtong 455 W.K.P.​—Neh 3:30.

13. Usa ka saserdote nga tigtrompeta nga miapil sa mga seremonyas nga gihikay ni Nehemias panahon sa inagurasyon sa paril sa Jerusalem.​—Neh 12:​31, 40, 41.

14. Usa sa mga pangulo sa katawhan kansang kaliwat, kon dili man siya mismo, nagpamatuod pinaagig timbre sa “kasaligang kontrata” nga gihimo panahon sa pagkagobernador ni Nehemias.​—Neh 9:38; 10:​1, 14, 23.

15. Ang prinsipe sa Kastilyo, usa ka kasaligang tawo nga mahinadlokon sa Diyos labaw kay sa daghang uban pa. Gitudlo siya ni Nehemias nga mangulo sa Jerusalem kauban ni Hanani.​—Neh 7:2.