HASABIAS

[Si Jehova Nag-isip (Nagtagad)].

1. Usa ka Levihanon sa linya sa kaliwat nga nagsugod kang Merari hangtod sa mag-aawit sa templo nga si Etan. (1Cr 6:​31, 44-47) Lagmit mao ra ang Num. 6.

2. Pangulo sa ika-12 sa 24 ka pundok sa Levihanong mga mag-aawit sa templo nga gibahin ni David; usa sa unom ka anak nga lalaki ni Jedutun ug lagmit usa ka kaliwat sa Num. 1.​—1Cr 25:​1, 3, 19.

3. Usa ka administrador “alang sa tanang buluhaton ni Jehova ug alang sa pag-alagad sa hari” kinsa gitudlo ni David kauban sa iyang mga igsoong lalaki sa pagdumala sa teritoryo sa K sa Jordan. Siya usa ka Levihanon, usa ka kaliwat sa anak nga lalaki ni Kohat nga si Hebron. (1Cr 26:30; 23:12) Lagmit mao ra ang Num. 4.

4. Usa ka prinsipe ug pangulo sa tribo ni Levi sa panahon sa paghari ni David. (1Cr 27:​16, 17, 22) Lagmit mao ra ang Num. 3.

5. Usa sa “mga pangulo sa mga Levihanon” nga miamot ug daghang hayop alang sa dakong pagsaulog ni Haring Josias sa Paskuwa.​—2Cr 35:​1, 9.

6. Usa ka Levihanon kansang kaliwat mipuyo sa Jerusalem human sa pagkadestiyero sa Babilonya. (1Cr 9:​2, 3, 14; Neh 11:​1, 4, 15, 20) Lagmit mao ra ang Num. 1.

7. Usa sa pangulong mga saserdote nga gisaligan ni Esdras sa pagdala sa bililhong mga butang gikan sa Babilonya ngadto sa Jerusalem niadtong 468 W.K.P. (Esd 8:24-30) Siya mao ra tingali ang gihisgotan sa bersikulo 19 ug lagmit mao ra ang Num. 9.

8. Usa ka Levihanon, tingali usa ka kaliwat sa Num. 1, kinsa nagpamatuod sa nasodnong kasabotan sa pagkamatinumanon sa adlaw ni Nehemias. (Neh 9:38; 10:​1, 9, 11) Lagmit siya mao ra ang Num. 10 o 11.

9. Usa ka saserdote nga pangulo sa balay sa amahan ni Hilkias sa panahon sa pag-alagad sa Hataas nga Saserdoteng si Joiakim nga manununod ni Jesua. (Neh 12:​10, 12, 21) Lagmit mao ra ang Num. 7.

10. Usa sa mga pangulo sa mga Levihanon nga nag-alagad sa panahon nga nangatungdanan si Joiakim.​—Neh 12:​23, 24, 26; tan-awa ang Num. 8.

11. Usa ka Levihanong prinsipe sa katunga nga distrito sa Keila nga nag-ayo sa usa ka seksiyon sa paril sa Jerusalem alang sa iyang distrito.​—Neh 3:17; tan-awa ang Num. 8.

12. Usa ka Levihanon sa “mga anak ni Asap” kansang kaliwat maoy magtatan-aw sa mga Levihanon sa Jerusalem human sa pagkadestiyero.​—Neh 11:22.