HAZARMAVET

[Sawang (Balangay) sa Kamatayon].

Usa ka kaliwat ni Noe pinaagi kang Sem ug Joktan. (Gen 10:​1, 21, 25, 26; 1Cr 1:20) Gituohan sa kadaghanan nga ang mga kaliwat ni Hazarmavet namuyo sa rehiyon sa Hadhramaut sa habagatang Arabia. Gituohang may koneksiyon tali sa Hadhramaut ug Hazarmavet tungod sa pagkaamgid sa mga konsonante niini diha sa orihinal nga mga ngalang Hebreohanon ug Arabiko. Ang geograpikanhong mga utlanan sa Hadhramaut wala sa bug-os matino. Kini kapin kon kulang 880 km (550 mi) ang gitas-on ug 240 km (150 mi) ang gilapdon. Ang patag daplin sa baybayon niini maoy hiktin, ug unya ang yuta tungason kaayo, nga napormang usa ka batoong patag ibabaw sa bukid diin ang aberids nga gihabogon maoy tali sa 900 ug 1,200 m (3,000 ug 4,000 p). Latas sa hataas nga mga patag ibabaw sa bukid adunay daghang lawom nga bul-oganang mga walog sa kilid sa mga pangpang. Kini nga mga walog tabunok kaayo. Daghan kaayong mga palma ug mga datiles; ang mga karnero, kamelyo, asno, ug baka may mga sibsibanan; ug ang dawa, alfalfa, tagom, gapas, ug mais maoy lakip sa mga pananom nga gitanom didto. Ang kinadak-an sa bul-oganang mga walog mao ang Wadi Hadhramaut. Kini nga sapa nagsukad mga 480 km (300 mi) sa ilaya gikan sa K nga baybayon sa Peninsula sa Arabia ug inanay nga miliko pasidlakan nga mga 640 km (400 mi), ug sa kataposan moagos kini ngadto sa Dagat sa Arabia ingong Wadi Masila (kining ngalana maoy tawag sa ubos nga sapa niini). Ang rehiyon sa Hadhramaut sa karaang panahon hinungdanon kaayo tungod sa negosyo niini sa insenso. Apan ang mga kahoyng kamangyan, nga daghan kanhi, nihit na karon didto.