HAZAZON-TAMAR

[Graba [Bakilid] sa Kahoyng Palma].

Usa ka siyudad nga gipuy-an sa mga Amorihanon ug lagmit nahimutang sikbit sa Ubos nga Patag sa Sidim. Si Haring Kedorlaomer ug ang iyang mga kaalyado nagpildi sa mga Amorihanon nga nagpuyo sa Hazazon-tamar. (Gen 14:5-8) Kasiglohan sa ulahi ang nag-abin nga kasundalohan sa Moab, Ammon, ug sa bukirong rehiyon sa Seir misulong batok sa Juda agi sa “Hazazon-tamar, buot ingnon, En-gedi.” (2Cr 20:​2, 10, 11) Daghang eskolar ang nagtuo nga ang gihisgotan sa Genesis nagpunting sa usa ka lugar nga medyo halayo dapit sa H sa En-gedi ug busa nag-isip sa mga pulong nga “buot ingnon, En-gedi,” ingong usa ka pagdugang sa ulahi. Apan, ang ngalang “Hazazon-tamar” mopatim-awng napreserbar diha sa ngalang Wadi Hasasa (Nahal Hazezon) nga mga 10 km (6 mi) sa A sa gituohang nahimutangan sa En-gedi. Dugang pa, ang kahulogan sa Hazazon-tamar mohaom sa rehiyon sa En-gedi, nga gihubit ni Josephus ingong usa ka dapit diin nanubo “ang kinamaayohang mga kahoyng palma.” (Jewish Antiquities, IX, 7 [i, 2]) Busa kon ang teksto sa Genesis nagtumong sa usa ka dapit nga nahimutang sa habagatan pa gayod nga bahin, lagmit nga dihay duha ka dapit nga gitawag ug Hazazon-tamar: ang usa nalangkit sa En-gedi; ang lain tingali mao ang dapit sa HK sa Patayng Dagat nga gitawag lamang ug Tamar.​—Eze 47:19; 48:28.