HENNA

[Heb., koʹpher].

Usa ka kahoykahoy nga may mga pungpong sa gagmay, dalagon ug bulok, upat-ug-gihay nga mga bulak diha sa mga tumoy sa mga sanga niini; ang mga tawo sa Tungang Sidlakan ganahan kaayo sa labihang kahumot niini. Sagad ang usa ka gamayng sanga sa henna nga may mga dahon ilakip diha sa pangdayandayan nga pungpong sa mga bulak, ug ang mga babaye magbutang niini diha sa ilang buhok ug diha sa ilang dughan. Sukad sa karaang kapanahonan ang henna gigamit usab ingong kosmetiko.

Kini nga kahoykahoy (Lawsonia inermis), nga kinaiyanhong nabuhi gihapon didto sa Palestina, moabot sa gitas-on nga mga 4 m (13 p). Gihisgotan lamang kini diha sa Awit ni Solomon (1:14; 4:13; 7:11).

Ang henna paste, nga naggikan sa pinolbos nga mga dahon sa tanom, gigamit ingong kosmetiko. Sa dihang ang parte sa lawas nga gipahiran niini mahugasan na, sagad magpabilin ang orens o pulahon nga kolor. Ang henna gigamit sa pagkolor sa mga kuko sa kamot ug tiil, mga tumoy sa tudlo, mga kamot, mga tiil, mga bungot, buhok, ug bisan sa mga lambungay ug sa mga ikog sa mga kabayo, ingon man usab sa mga panit. Ang lintunganayng pulong nga Hebreohanon diin gituohang naggikan ang pulong nga koʹpher gihubad ingong “tabon,” nga mopatim-awng nagpaila nga kini gigamit ingong tina.​—Itandi ang Gen 6:14.