HERODIAS

Ang asawa ni Herodes Antipas, kinsa, pinaagi sa iyang anak nga babaye nga si Salome, naghangyo ug nagdawat sa ulo ni Juan nga Tigbawtismo niadtong 32 K.P. (Mar 6:22-28) Ang iyang amahan nga si Aristobulo, nga anak ni Herodes nga Bantogan pinaagi sa iyang ikaduhang asawa nga si Mariamne I ug ang iyang inahan maoy mag-agaw igtagsa. Ang iyang igsoong lalaki mao si Herodes Agripa I nga maoy nagpatay kang apostol Santiago nga igsoon ni Juan.​—Buh 12:​1, 2.

Si Herodias unang nakigminyo sa iyang uyoan (nga laing anak ni Herodes nga Bantogan pinaagi sa iyang ikatulong asawa nga si Mariamne II), ang igsoon-sa-amahan sa amahan ni Herodias, ug kining iyang uyoan-bana gitawag sa kadaghanan nga Herodes Felipe aron sa pagpalahi kaniya gikan kang Felipe nga magmamando sa distrito sa Iturea ug Trakonite. (Luc 3:1) Pinaagi kang Herodes Felipe, si Herodias nanganak kang Salome, lagmit nga iyang bugtong nga anak. Apan, si Herodias nagdiborsiyo kaniya ug nakigminyo sa igsoon-sa-amahan ni Herodes Felipe nga si Herodes Antipas, nga usa usab ka anak sa iyang apohan nga si Herodes nga Bantogan, pinaagi sa iyang ikaupat nga asawa nga si Malthace. Si Herodes Antipas, kinsa mao ang magmamando sa distrito (sa literal, “ang tetrarka”) niadtong panahona, ug kinsa gitawag ni Jesu-Kristo nga “kanang irong ihalas” (Luc 13:​31, 32), nagdiborsiyo usab sa iyang unang asawa nga usa ka anak sa Nabataeanhong hari nga si Aretas sa Arabia aron makigminyo kang Herodias.

Busa, si Juan nga Tigbawtismo may katarongan sa pagkondenar sa kaminyoon ni Herodias ug Herodes Antipas kay kini supak ug imoral ilalom sa Hudiyohanong balaod, ug tungod niana siya gibalhog sa bilanggoan ug sa ulahi gipunggotan sa ulo. Ang iyang walay-kahadlok ug matarong nga pagkondenar nakapukaw sa grabeng pagdumot ni Herodias, mao nga iyang gipahimuslan ang unang kahigayonan sa pagpapatay sa manalagna.​—Mat 14:1-11; Mar 6:16-28; Luc 3:​19, 20; 9:9.

Ang igsoong lalaki ni Herodias nga si Herodes Agripa I mibalik gikan sa Roma niadtong 38 K.P., nga natudlo ingong usa ka hari. Kini nakapasina kaayo kang Herodias, tungod kay ang iyang bana, bisan tuod nga anak sa hari, nagpabiling usa lamang ka magmamando sa distrito. Busa tungod niini siya walay puas nga namugos sa iyang bana hangtod nga miadto usab kini sa Roma nga naglaom nga purongpurongan usab ingong hari ug hatagan ug gingharian. Giasoy ni Flavius Josephus nga si Agripa nga igsoong lalaki ni Herodias sekretong nagpadala ug mga sulat ngadto kang Emperador Caligula nga nag-akusar kang Antipas sa pagpakigkunsabo sa mga Partianhon. Ingong sangpotanan, si Antipas gidestiyero ngadto sa Gaul; siya giubanan ni Herodias.​—Jewish Antiquities, XVIII, 240-256 (vii, 1, 2); The Jewish War, II, 181-183 (ix, 6).