HOREB

[Uga; Awaaw].

Ang “bukid sa matuod nga Diyos,” mopatim-aw nga kini mao ra usab ang Bukid sa Sinai. (1Ha 19:8; Ex 33:6) Hinuon, sa katibuk-an ang Horeb daw nagtumong sa bukirong rehiyon nga naglibot sa Bukid sa Sinai, nga gitawag usab ug Kamingawan sa Sinai.​—Deu 1:​6, 19; 4:​10, 15; 5:2; 9:8; 18:16; 29:1; 1Ha 8:9; 2Cr 5:10; Sal 106:19; Mal 4:4; itandi ang Ex 3:​1, 2; Buh 7:30; tan-awa ang SINAI Num. 1 ug 2.

Didto sa Horeb, ang manulonda ni Jehova nagpakita kang Moises sa taliwala sa nagdilaab nga tunokong tanom, nga nagsugo kaniya sa pagpanguna sa Israel sa paggula gikan sa Ehipto. (Ex 3:1-15) Sa ulahi, samtang didto sa Repidim, ang napagawas nga mga Israelinhon nagreklamo tungod kay walay tubig nga mainom. Dayon, ubos sa sugo ni Jehova, si Moises, nga inubanan sa mga ansiyano sa Israel, miadto sa usa ka bato didto sa Horeb, dayag nga ang bukirong rehiyon sa Horeb, ug naghampak sa bato pinaagi sa iyang sungkod. Sa milagrosong paagi ang tubig migula gikan niini nga bato. (Ex 17:1-6; itandi ang Sal 105:41.) Kasiglohan human niadto, ang manalagnang si Elias mikalagiw ngadto sa Horeb agi sa Beer-seba tungod sa mapanimaslong si Rayna Jezebel.​—1Ha 19:2-8.