JABIN

[lagmit, May Katakos sa Pag-ila; Pagsabot; o, Usa nga Nagtukod].

Tingali usa ka ngalan sa dinastiya o titulo sa Canaanhong mga hari sa Hazor.

1. Ang hari sa Hazor sa dihang gisulong ni Josue ang Yutang Saad. Giporma ni Jabin ang panag-abin sa Canaanhong mga hari sa amihanan, ug kini sila nagtingob sa pagpakig-away batok sa Israel uban ang kasundalohan nga “ingon ka daghan sa balas nga anaa sa baybayon . . . [lakip] ang daghan kaayong kabayo ug mga karo nga iggugubat.” Sa dihang nagkampo dapit sa katubigan sa Merom, ang ilang natingob nga kasundalohan gipildi sa kalit nga pag-atake ug paggukod ni Josue. Gipatay si Jabin sa dihang ang Hazor sa ulahi nailog ug gisunog.​—Jos 11:1-14; 12:​7, 19.

2. Usa ka ulahing hari sa Canaan nga nagmando gikan sa natukod pag-usab nga Hazor; lagmit kaliwat sa Num. 1. Ang pagtawag kang Jabin “nga hari sa Canaan” lagmit nagpasabot sa iyang pagkalabaw sa ubang mga hari sa Canaan, nga naghatag kaniya ug talagsaong gahom ug awtoridad; mopatim-aw nga dihay ubang mga hari nga nakig-alyansa kaniya. Sa laing bahin, ang maong mga pulong basin nagpalahi lamang kaniya gikan sa mga hari sa ubang kayutaan. Ang kasundalohan ni Jabin, lakip ang 900 ka karo nga tinaoran ug puthawng mga sanggot, maoy ubos sa pagmando ni Sisera, nga mas prominente diha sa asoy kay kang Jabin mismo.​—Huk 4:​2, 3; 5:​19, 20.

Pinaagi sa pagtugot ni Jehova, hilabihang gidaogdaog ni Jabin ang apostatang Israel sulod sa 20 ka tuig. Apan sa ilang pagsangpit sa Diyos alang sa kaluwasan, gipatindog ni Jehova si Barak ug Debora aron manguna sa Israel sa pagbuntog sa kasundalohan ni Jabin. Si Sisera gipatay sa asawa ni Heber nga Kenihanon, kinsa nakigdait kang Jabin. (Huk 4:3-22) Ang mga Israelinhon nagpadayon sa pagpakiggubat batok kang Jabin ug sa kataposan nagpatay kaniya.​—Huk 4:​23, 24; Sal 83:​9, 10.