JAZER

[Hinaot [ang Diyos] Motabang].

Usa ka Amorihanong siyudad nga may sakop nga mga lungsod, nga nahimutang sa S sa Jordan. Sa panahon ni Moises, giilog sa mga Israelinhon ang Jazer ug ang naglibot nga rehiyon. (Num 21:​25, 32) Ang Jazer sa sinugdan gihatag ngadto sa Gad ug gipalig-on sa maong tribo, sa ulahi kini gihatag ngadto sa mga Levihanon. (Num 32:​1, 3-5, 34, 35; Jos 13:​24, 25; 21:​34, 38, 39; 1Cr 6:​77, 81) Mao kini ang usa sa mga dapit nga gihisgotan maylabot sa ruta nga gisubay ni Joab ug sa mga pangulo sa kasundalohan sa dihang ilang gihimo ang pagsenso nga gisugo ni David bisag wala hatagig awtorisasyon sa Diyos. (2Sa 24:​4, 5) Sa naghinapos ang paghari ni David ang pipila ka gamhanang mga tawo nga Hebronhon nga nagpuyo sa Jazer gihatagan ug administratibong mga katungdanan sa teritoryo sa Israel sa S sa Jordan.​—1Cr 26:​31, 32.

Sa ikawalong siglo W.K.P., ang Jazer nailalom sa mga kamot sa Moab. Mopatim-aw nga ang rehiyon niadtong tungora, kon dili man una pa niana, nabantog tungod sa pagpananom niini ug kaparasan. Ang Jazer ug ang ubang Moabihanon nga mga siyudad gitagna nga makaagom ug umaabot nga katalagman.​—Isa 16:8-10; Jer 48:​32, 33.

Lainlain ang mga dapit nga gituohang lagmit mao ang karaang Jazer, apan ang tukmang nahimutangan niini wala mahibaloi.