JERBO

[Heb., ʽakh·barʹ].

Ang Hebreohanong pulong nga ʽakh·barʹ, nga gihubad sa lainlaing paagi ingong “taligatus,” “ilaga,” “jerbo,” ug “tigluksong ilaga,” gisabot sa daghang eskolar nga lagmit naglakip sa tanang matang sa mga ilaga, taligatus, ug sa mga hayop nga kapamilya niini sama sa jerbo. Apan, ang usa ka Hebreohanon ug Aramaikong leksikon ni Koehler ug Baumgartner naghatag sa kahulogan niini nga Hebreohanong termino ingong “jerbo.”

Ang jerbo maoy usa ka tiglukso nga ilaga nga samag gamayng kangaroo ug makaplagan gihapon sa umaw nga mga dapit sa Tungang Sidlakan. Ang gitas-on sa lawas sa jerbo sa desyerto (Jaculus jaculus) maoy tali sa 10 ngadto sa 15 sm (4-6 pul.) ug may gibug-atong 50 ngadto sa 70 g. Dagko ang ilang mga dalunggan ug mga mata. Ang mga tiil sa atubangan mugbo, apan ang duha ka pangulahiang mga tiil may gitas-ong mga dos-tersiya sa katibuk-ang gitas-on sa ulo ug lawas niini. Ang ikog mao ang kinatas-ang bahin niini nga hayop ug ang tumoy niini may gamayng pungpong sa tag-as nga mga balhibo. Kini nga hayop nga mogula sa gabii mas gusto sa mga yutang desyerto, nga magpalabay sa kainit sa adlaw sa kinubkob nga lungag sa ilalom sa yuta apan mogula sa pagpangitag pagkaon panahon sa bugnaw nga kagabhion.

Bisan tuod ang mga Arabo nga nagpuyo sa desyerto sa Sirya mokaon ug jerbo, sumala sa balaod kini maoy mahugaw alang sa mga Israelinhon. (Lev 11:29) Apan mopatim-awng ang apostatang mga Israelinhon wala manumbaling niini nga pagdili sa Balaod.​—Isa 66:​17, ftn sa Rbi8.

Ang mga jerbo makahimog dakong perdisyon sa lugasong mga tanom ug sa uban pang katanoman. Sa panahon nga ang sagradong Arka didto pa sa teritoryo sa mga Filistehanon, ang gipadala sa Diyos nga hampak sa mga jerbo nagdalag kadaot sa yuta.​—1Sa 6:​4, 5, 11, 18.