JOTAM

[Si Jehova Maoy Hingpit; o, Hinaot Kompletohon ni Jehova].

1. Usa ka kaliwat ni Juda nga gipaila ingong usa ka ‘anak nga lalaki’ ni Jadai.​—1Cr 2:47.

2. Kamanghorang anak nga lalaki ni Maghuhukom Gideon (Jerubaal) nga nagpuyo sa Opra. (Huk 8:35; 9:5) Human mamatay si Gideon, si Abimelek nga iyang anak nga lalaki pinaagi sa usa ka ulipong babaye, nagbuno sa tanang ubang mga anak nga lalaki ni Gideon, ang iyang mga igsoon sa amahan, gawas lang kang Jotam nga nakatago. Human niadto, sa dihang ang mga tag-iyag yuta sa Sekem naghimo kang Abimelek nga ilang hari, si Jotam mibarog ibabaw sa Bukid sa Gerizim ug, pinaagi sa usa ka ilustrasyon maylabot sa mga kahoy, nagpahayag ug matagnaong maldisyon batok sa mga tag-iyag yuta sa Sekem ug batok kang Abimelek. Unya si Jotam mikalagiw ug mipuyo sa Beer.​—Huk 9:6-21, 57.

3. Anak nga lalaki ni Haring Uzzias (Azarias) sa Juda pinaagi kang Jerusa nga anak nga babaye ni Zadok. (2Ha 15:​32, 33; 1Cr 3:12; 2Cr 27:1; Mat 1:9) Human hampaka si Uzzias pinaagig sanla sa dihang siya nasuko sa mga saserdote nga nagbadlong kaniya tungod sa iyang pagsulod sa templo nga supak sa balaod ug sa pagsulay sa paghalad ug insenso, si Jotam mao nay nag-atiman sa mga katungdanan sa hari puli sa iyang amahan. Apan dayag nga sa pagkamatay na ni Uzzias nagsugod ang 16-ka-tuig nga pagmando (777-762 W.K.P.) sa 25-anyos nga si Jotam.​—2Ha 15:​5, 7, 32; 2Cr 26:18-21, 23; 27:8.

Si Isaias, Oseas, ug Miqueas nag-alagad ingong mga manalagna sa panahon ni Jotam. (Isa 1:1; Os 1:1; Miq 1:1) Bisan tuod ang iyang mga sakop nakig-ambit sa sayop nga pagsimba sa hatag-as nga mga dapit, si Jotam mismo nagbuhat sa kon unsay matarong sa mga mata ni Jehova.​—2Ha 15:35; 2Cr 27:​2, 6.

Daghang pagpanukod ang nahimo sa panahon sa paghari ni Jotam. Siya nagtukod sa ibabaw nga ganghaan sa templo, nakahimog daghang tinukod ibabaw sa paril sa Opel, nagtukod usab ug mga siyudad sa bukirong rehiyon sa Juda ingon man sa kinutaang mga dapit ug mga torre didto sa kakahoyan.​—2Cr 27:3-7.

Apan ang paghari ni Jotam dili malinawon. Nakiggubat siya sa mga Ammonhanon ug sa kataposan nakadaog batok kanila. Tungod niana, sulod sa tulo ka tuig sila nagbayad ug tinuig nga tributo nga 100 ka talanton nga plata ($660,600) ug 10,000 ka cor (2,200 kl) sa trigo ug sa sebada. (2Cr 27:5) Sa panahon sa paghari ni Jotam, ang yuta sa Juda nakasagubang usab ug militaryong mga pagpiot gikan ni Haring Rezin sa Sirya ug ni Haring Peka sa Israel.​—2Ha 15:37.

Sa dihang siya namatay, si Jotam gilubong sa Siyudad ni David, ug ang iyang anak nga lalaki nga si Ahaz, kinsa mga kuwatro anyos na sa dihang si Jotam nahimong hari, milingkod sa trono sa Juda.​—2Cr 27:7–​28:1.

Sanglit si Jotam nagmando lamang sulod sa 16 ka tuig, ang paghisgot sa 2 Hari 15:30 bahin sa “ikakawhaang tuig ni Jotam” dayag pagasabton nga nagkahulogang sa ika-20 nga tuig sukad nga siya nahimong hari, nga mao, ang ikaupat nga tuig sa paghari ni Ahaz. Ang magsusulat sa asoy sa Mga Hari lagmit mipalabing dili ipaila ang manununod ni Jotam nga si Ahaz niining tungora tungod kay kinahanglan pa niyang ihatag ang mga detalye bahin sa paghari ni Jotam.