JULIO

Usa ka Romanong opisyal sa kasundalohan o senturyon sa pundok ni Agusto nga sa ilalom sa iyang pagbantay si Pablo mipanaw paingon sa Roma. (Buh 27:1; tan-awa ang OPISYAL SA KASUNDALOHAN; AGUSTO, PUNDOK NI.) Sa sinugdanan sa biyahe, si Julio dayag nga miila kang Pablo ingong dili ordinaryong binilanggo mao nga siya nagpakita kaniya ug kalulot, pananglitan, siya gitugotan nga manaog sa barko aron makaduaw sa iyang mga higala sa Sidon. Apan, sa dihang sa ulahi gisugyot ni Pablo nga niadtong panahona peligroso ang pagpadayon sa ilang paglawig, si Julio namati hinuon sa sukwahing opinyon sa timonil ug sa tag-iya sa barko. Sa ulahi, ang kasundalohan ni Julio nagsanta sa pag-ikyas sa mga tripulante, agig pagsunod sa mga pulong ni Pablo: “Gawas kon kining mga tawhana magpabilin sa sakayan, kamo dili gayod maluwas.” Sa dihang naguba ang barko, si Julio, kay wala magtugot sa mga sundalo nga patyon ang mga binilanggo, nagluwas sa kinabuhi ni Pablo.​—Buh 27:1-44.