REHASREHAS

Usa ka gambalay nga ginama sa gikuroskuros nga mga piraso sa kahoy, nga nahimong ginambat ug kasagarang gigamit sa pagtabon sa usa ka bentana. Sa kasiglohan ang mga rehasrehas sa bentana nahimong komon sa Tungang Sidlakan. Kini nagpabugnaw sa mga balay pinaagi sa pagsalipod sa direktang mga silaw sa adlaw samtang naghatag ug bentilasyon, ug kini usab nakahatag ug kaanindot sa katibuk-ang hitsura sa mga tinukod. Ang pipila ka balay sa kapanahonan sa Bibliya may mga bentana sa unang andana nga nag-atubang sa sulod nga sawang ug ang uban nag-atubang sa dalan. Ang mga bentana nga nag-atubang sa dalan sagad anaa sa ibabawng bahin sa bungbong o diha sa lawak-sa-atop ug girehasrehasan.

Ang usa ka tawo diha sa balay makalantaw sa gawas pinaagi sa girehasrehasan nga bentana ug makakita kon unsay atua sa gawas samtang siya dili makita gikan sa gawas. Diha sa awit ni Debora ug Barak, ang inahan sa namatay nga si Sisera gihulagway ingong kawang nga mitambo sa bentana ug naghulat sa iyang anak “diha sa mga rehasrehas.” (Huk 5:​1, 28) Gikan sa bentana lahos sa usa ka rehasrehas, posibleng makita sa usa nga nagtan-aw “ang usa ka batan-ong lalaki kansang kasingkasing nakulangan” samtang siya nakigkita sa usa ka pampam. (Pr 7:6-13) Dugang pa, diha sa Awit ni Solomon (2:9), gihisgotan ang maylabot sa ‘pagtan-aw diha sa mga bentana, paglili diha sa mga rehasrehas.’

Ang ubang mga rehasrehas sa bentana dayag nga gibutangan ug bisagra aron kini mabuksan ug masirad-an. Ang mga bentana sa lawak ni Daniel nga didto sa atop, nga gikan niana siya makitang nag-ampo kang Jehova tulo ka beses kada adlaw, lagmit adunay mga rehasrehas nga mabuksan o masirad-an.​—Dan 6:10.