LOD

Usa ka siyudad nga may sakop nga mga lungsod nga lagmit gitukod sa Benjaminhon nga si Semed nga “anak nga lalaki” ni Elpaal. (1Cr 8:​1, 12) Human makabalik ang mga Hudiyo gikan sa pagkadestiyero sa Babilonya, ang Lod maoy usa sa ilang kabalangayan didto sa kinatumyang bahin sa kasadpan. (Esd 2:33; Neh 7:37; 11:35) Gituohan nga kini mao ra ang Lida, diin giayo ni Pedro si Eneas. (Buh 9:32-38) Nahimutang sa usa ka tabunok nga walog sa habagatang utlanan sa Patag sa Saron, ang el-Ludd (Lod) maoy mga 18 km (11 mi) sa HS sa Jope. Sa karaang panahon, ang siyudad nahimutang diha sa kinasang-an sa gituohang mao ang pangunang ruta tali sa Ehipto ug Babilonya ug sa pangunang dalan gikan sa Jope paingon sa Jerusalem. Sa Komong Panahon kini nga estratehikong posisyon nagladlad sa siyudad sa pagpanglaglag nga gihimo sa kasundalohang mga Romano, Saraceno, Tigkrusada, ug mga Mongol.