KANTERO

Usa ka artesano sa tisa o sa bato. (2Ha 12:12; 22:6) Ang kantero sa karaang kapanahonan mosapsap ug motabas ug mga bato ug dayon gamiton kini sa pagtukod ug mga paril ug sa lainlaing matang sa mga bilding. (2Sa 5:11; 1Ha 7:9-12; 1Cr 22:2; 2Cr 24:12) Ang ubang mga konstruksiyon naglakip usab sa mga lubnganan (Isa 22:16) ug mga tunel sa tubig.​—2Ha 20:20.

Lakip sa mga himan nga gigamit sa mga kantero mao ang martilyo, atsa, gabas sa bato, nibel, pising igsusukod, ug ang tunton. (1Ha 6:7; 7:9; Isa 28:17; Zac 4:10) Ingon sa makita sa mga monyumento, ang mga galamiton nga gigamit sa Ehiptohanong mga kantero naglakip sa pakang ug tigib, nga dayag nga gigamit usab sa Israelinhong mga kantero. Sa pagpanukod didto sa Ehipto, ang mga bato sukdon ug markahan ug itom nga mga linya, nga nagsilbing mga giya alang sa mga magtatabas sa bato, ug ang puwesto sa matag bato diha sa bilding timan-an pinaagig marka o numero nga ibutang diha sa bato.

Ang karaang mga kantero makatabas nga tul-id kaayo sa mga bato nga tungod niana dili na kinahanglang mogamit pa ug argamasa. Hangtod karong adlawa imposible ang pagsuksok ug kutsilyo tali sa dagkong mga bato sa pipila ka nahibiling mga estruktura sa Palestina nga sukad pa sa yugto ni Herodes.​—Tan-awa ang ARKITEKTURA.