MINISTERYO

Ang buluhaton ug pag-alagad nga gihimo sa usa ka ministro, alagad o sulugoon, o tig-alagad nga may kaakohan ngadto sa usa ka mas labaw nga awtoridad. Sa karaang Israel, ang mga Levihanon nag-alagad ingong mga ministro o mga alagad ni Jehova. Ang mga manalagna gigamit usab aron sa pag-alagad diha sa linain nga paagi. (Deu 10:8; 21:5; tan-awa ang LEVIHANON; ALAGAD, MINISTRO; SASERDOTE.) Apan, sa pag-anhi ni Jesu-Kristo sa yuta, ang usa ka bag-ong ministeryo gisugdan. Iyang gisugo ang iyang mga sumusunod sa paghimog mga tinun-an sa katawhan sa tanang kanasoran. (Mat 28:​19, 20) Busa, ngadto sa usa ka kalibotan nga nahimulag sa Diyos, ang mga Kristohanon adunay mensahe sa pagpasig-uli ngadto sa Diyos pinaagi kang Kristo.​—2Co 5:18-20.

Kadtong positibong misanong sa “ministeryo sa pagpasig-uli” (2Co 5:18) kinahanglang mabansay, matudloan, maabagan, ug matultolan sa hustong paagi aron mahimo ug magpabilin nga malig-on sa pagtuo, ingon man sa pagpalampos sa buluhaton sa ilang paghimog mga tinun-an. (Itandi ang 2Ti 4:​1, 2; Tit 1:​13, 14; 2:1; 3:8.) Busa, human sa iyang pagkayab sa langit, si Kristo Jesus, ingong ulo sa kongregasyon, naghatag ug “mga gasa nga mga lalaki,” mga apostoles, mga manalagna, mga tig-ebanghelyo, mga magbalantay, ug mga magtutudlo, “alang sa pagpasibo ug balik sa mga balaan, alang sa ministeryal nga buluhaton, alang sa pagpalig-on sa lawas ni Kristo.”​—Efe 4:7-16; tan-awa ang GASA GIKAN SA DIYOS.

Ang laing bahin sa ministeryo sulod sa kongregasyon naglangkit sa pag-atiman sa materyal nga paagi sa mga nanginahanglan apan takos tabangan nga mga igsoon. Ang ministeryo diin gitudlo si Esteban ug ang laing unom ka lalaki nga napanghimatud-ang maayo naglangkit sa pag-apod-apod sa taganang pagkaon ngadto sa Kristohanong mga babayeng balo. (Buh 6:1-6) Sa ulahi, ang mga kongregasyon sa Macedonia ug Acaya nakig-ambit sa usa ka ministeryo sa pagpadalag hinabang alang sa kabos nga mga igsoon sa Judea. (2Co 8:1-4; 9:​1, 2, 11-13) Sa dihang ang mga amot sa kataposan natigom na ug si Pablo nangandam aron sa pagdala niini ngadto sa Jerusalem, iyang gihangyo ang mga igsoon sa Roma sa pag-ampo uban kaniya nga kini nga ministeryo sa pagpadalag hinabang mahimong dalawaton sa mga balaan nga kanila kini gipadala.​—Rom 15:​25, 26, 30, 31.

Pipila ka tuig una pa niini, ang susamang pagpasundayag sa gugma gihimo sa mga Kristohanon sa Antioquia sa Sirya, sa dihang sila nakig-ambit sa pag-alagad pinaagi sa pagpadalag hinabang alang sa mga igsoon nga nagpuyo sa Judea sa panahon sa usa ka gutom.​—Buh 11:28-30.