MINI

Usa ka karaang gingharian nga gisugo sa Diyos nga makig-away sa Babilonya. Nianang panahona ang Mini nakig-alyansa sa mga gingharian sa Ararat ug Askenaz, ang tanan ilalom sa pagmando ni Ciro.​—Jer 51:27-29.

Ang tukmang nahimutangan niining karaan nga gingharian ug sa katawhan niini dili tino. Ang pipila ka tiggama ug mapa nagbutang niini diha sa rehiyon tali sa Lanaw sa Van ug sa Suba sa Araxes. Apan ang kadaghanang komentarista mipabor sa opinyon nga kini nahimutang sa dapit nga HS sa Lanaw sa Van.

Kon ang mga Mannai o mga Manneanhon maoy mga molupyo sa Mini, ingon sa gisulti sa pipila ka eskolar, nan sumala sa cuneiform nga mga inskripsiyon ang Mini nailalom sa pagmando sa nagkalainlaing yugto, una sa mga Asiryanhon ug dayon sa Imperyo sa Media. Sumala sa usa ka Babilonyanhong cronica, sa iyang ikanapulong tuig nga paghari (636 W.K.P.) si Nabopolasar “nagbihag sa mga Manneanhon nga mitabang kanila (nga mao, sa mga Asiryanhon).” (Assyrian and Babylonian Chronicles, ni A. K. Grayson, 1975, p. 91) Apan sa dihang ang Babilonya napukan niadtong 539 W.K.P. ang Mini gigamhan sa Imperyo sa Medo-Persia.