LABING HATAAS
Kinatas-an kon bahin sa dapit, o posisyon. Ang Hebreohanong pulong nga ʽel·yohnʹ, nga gigamit maylabot kang Jehova ingong “Labing Hataas,” gipadapat usab ngadto sa ubang mga tawo o mga butang: Ang Mesiyanikong Hari, ang Dakong David, nga labaw sa ubang yutan-ong mga hari (Sal 89:20, 27), ang pagkalabaw nga gisaad ngadto sa Israel ibabaw sa kanasoran (Deu 26:18, 19), ang kinaibabwan nga bukag (Gen 40:17), ang ibabaw nga ganghaan (2Ha 15:35), ang ibabaw nga linaw (2Ha 18:17), ang ibabaw nga sawang (Jer 36:10), ang kinaibabwang andana (Eze 41:7), ang kinaibabwang mga lawak-kan-anan (Eze 42:5), Ibabaw nga Bet-horon (Jos 16:5), ug ang ibabawng tinubdan sa mga tubig sa Gihon (2Cr 32:30). Kini nga mga pagkagamit nagpakita nga ang ʽel·yohnʹ nagtumong sa posisyon o pagkabutang inay sa gahom.
Sa dihang gipadapat kang Jehova, ang “Labing Hataas” nagpasiugda sa iyang supremong posisyon nga labaw sa tanan. (Sal 83:18) Kini nga titulo unang makita sa Genesis 14:18-20 uban sa pulong nga ʼEl (Diyos), diin si Melquisedek gitawag nga “saserdote sa Labing Hataas nga Diyos” ug, sa maong katungdanan, nagpanalangin kang Abraham maingon man nagdayeg sa Labing Hataas nga Diyos. Ang terminong “Labing Hataas” gikombinar sa ngalan sa Diyos nga Jehova (Gen 14:22; Sal 7:17) ug sa plural nga nagpaila sa pagkahamili nga mao ang ʼElo·himʹ (Diyos) (Sal 78:56), ug kini usab makita nga nag-inusara lamang.—Deu 32:8; Sal 9:2; Isa 14:14.
Ang plural nga Aramaikong porma nga ʽel·yoh·ninʹ makita sa Daniel 7:18, 22, 25, 27, diin kini mahimong hubaron nga “Supremong Usa” (NW), ug kini nga plural nga porma nagpaila sa pagkahamili, pagkahalangdon. Ang Aramaikong porma nga singular, ʽil·laiʹ (Labing Hataas), gigamit sa Daniel 7:25.
Ang Gregong pulong nga hyʹpsi·stos (Labing Hataas), nga gipadapat ngadto kang Jehova, pangunang gigamit ni Lucas diha sa iyang Ebanghelyo (kaduha sa pagpahibalo ni Gabriel kang Maria bahin sa pagkatawo ni Jesus) ug diha sa Mga Buhat. (Luc 1:32, 35, 76; 6:35; 8:28; Buh 7:48; 16:17) Ang ubang mga teksto anaa sa Marcos 5:7 ug Hebreohanon 7:1.