NABAL
[Walay Salabotan; Hungog].
Usa ka adunahang Maonhanon nga tag-iyag mga karnero nga nagpasibsib ug nag-alot sa iyang panon sa mga karnero didto sa Carmelo sa Juda. Si Nabal nailhan usab ingong kaliwat ni Caleb. Pipila lamang ka tawo diha sa Bibliya ang gihubit nga talamayon kaayo sama kang Nabal. “[Siya] mapig-oton ug daotan sa iyang mga binuhatan”; “sobra siya ka walay-silbing tawo [anak nga lalaki ni Belial] nga pakigsultihan”; ‘siya nagbalos ug daotan ilis sa maayo’; “ang kawalay-salabotan anaa kaniya.”—1Sa 25:2, 3, 17, 21, 25.
Gipanalipdan sa mga tawo ni David gikan sa pundok sa mga bandido ang panon sa kahayopan ni Nabal nga 3,000 ka karnero ug 1,000 ka kanding. Human ipakita kini nga kalulot ug dili sad-an sa bisan unsang pagpangawat, mihangyo si David kang Nabal nga hatagan siya ug ang iyang mga tawo ug materyal nga tabang panahon sa pagpang-alot, usa ka tradisyonal nga panahon sa kombira ug pagkamaabiabihon. Apan “gikasab-an” ni Nabal ang mga mensahero ni David ug gipalakaw sila nga walay dala. Ang mga tawo ni Nabal nahadlok sa mahimong reaksiyon ni David apan nagpanuko sa pagsulti bahin niini ngadto kang Nabal. Apan, ang usa kanila misulti sa asawa ni Nabal nga si Abigail. Sa dihang nagsingabot si David aron sa pagpatay kang Nabal, gisugat siya ni Abigail dala ang daghang gasa nga pagkaon ug ilimnon ug gikombinsir siya nga dili magpakasala pinaagi sa pag-ula sa dugo sa iyang bana. Sa iyang pagpauli sa balay, iyang nakita si Nabal nga “nahubog pag-ayo,” busa siya naghulat hangtod sa pagkaugma aron sultihan siya bahin sa iyang pagpakigkita kang David ug kon sa unsang paagi hapit na unta silang tanan mangamatay tungod kaniya. Tungod sa gisugilon sa iyang asawa, ang “kasingkasing [ni Nabal] namatay sa sulod niya, ug siya nahisama sa usa ka bato,” tingali nagpaila sa usa ka matang sa paralisis o kaha nagtumong sa epekto diha sa emosyon ni Nabal. (Itandi ang Deu 28:28; Sal 102:4; 143:4.) Mga napulo ka adlaw sa ulahi si Nabal gipatay ni Jehova. (1Sa 25:2-38) Unya gikuha ni David ang may-salabotan ug maisog nga si Abigail ingong iyang asawa.—1Sa 25:39-42; 27:3; 30:5; 2Sa 2:2; 3:3.