NASON

[gikan sa lintunganayng pulong nga nagkahulogang “halas”].

Usa ka pangulo sa tribo ni Juda didto sa kamingawan. Si Nason maoy anak nga lalaki ni Aminadab ug lakip sa ikalima nga gitalang kaliwatan gikan kang Juda. (1Cr 2:3-10) Ang iyang igsoong babaye mao ang asawa ni Aaron. (Ex 6:23) Si Nason nahimong dugtong sa linya sa kagikan nga mitultol ngadto kang David ug Jesus, nga nahimong amahan ni Salmon, kinsa naminyo kang Rahab, ug apohan nga lalaki ni Boaz, kinsa, sa baylo, naminyo kang Ruth.​—1Cr 2:11-15; Ru 4:20; Mat 1:4-6, 16; Luc 3:32.

Ingong pangulo sa Juda, ang pangunang tribo sa Israel, si Nason mitabang kang Moises sa unang pagrehistro sa mga lalaking manggugubat didto sa kamingawan. Siya mitanyag ug amot alang sa pag-alagad sa tabernakulo sa dihang giinagurahan ang halaran, ug siya nangulo sa 74,600 ka kasundalohan sa Juda nga maoy nanguna sa Israel diha sa han-ay sa pagmartsa.​—Num 1:2-7; 2:​3, 4; 7:​2, 11-17; 10:14.